'ഞാനൊരു പുതിയ മൊബൈല് വാങ്ങി, അറിയാതെ നിന്റെ നമ്പറിലേക്ക് ഞാനൊരു കോഡ് അയച്ചു. അതൊന്ന് അയച്ചുതരുമോ?'- വാട്സ്ആപ്പ് നോക്കുന്നതിനിടയിലായിരിക്കും വര്ഷങ്ങളായി പരിചയമുള്ള ഒരു സുഹൃത്തില് നിന്ന് ഇങ്ങനെയൊരു മേസേജ് വരുന്നത്. അടുത്ത് പരിചയമുള്ള സുഹൃത്തിന്റെ നമ്പറില് നിന്നായതിനാല് നിങ്ങള്ക്ക് സംശയം ഒന്നും തോന്നില്ല. ആറക്ക നമ്പര് അയച്ചുകൊടുക്കും. പിന്നീട് നിങ്ങളെ കാത്തിരിക്കുന്നത് ഉറക്കമില്ലാത്ത രാത്രികളായിരിക്കും. കാരണം നിങ്ങളുടെ വാട്സ് ആപ്പ് ഹാക്ക് ചെയ്യപ്പെട്ടു.
സൂക്ഷിക്കുക, നിങ്ങളുടെ പ്രിയപ്പെട്ടവരുടെ പേരില് നിങ്ങളുടെ വാട്സ്ആപ്പില് എത്തുന്നവര് തട്ടിപ്പുകാരായിരിക്കും. നിങ്ങളുടെ വാട്സ്ആപ്പ് ഹാക്ക് ചെയ്താല് പിന്നീട് നിങ്ങളുടെ കോണ്ടാക്റ്റിലുള്ളവരെ ആകും അവര് ലക്ഷ്യമിടുക. നിങ്ങളേയും നിങ്ങളുടെ ചുറ്റുമുള്ളവരേയും ചതിക്കുഴിയില് വീഴ്ത്താന് ഒരു മെസേജിനാകും. വാട്സ്ആപ്പ് ഹാക്കിങ്ങിലൂടെയുള്ള തട്ടിപ്പ് രാജ്യത്ത് വര്ധിച്ചുകൊണ്ടിരിക്കുകയാണ്. ഫോണ് മാറുമ്പോള് വാട്സ്ആപ്പ് അയക്കുന്ന ആറക്ക നമ്പറിനെ മറയാക്കിയാണ് തട്ടിപ്പ് നടക്കുന്നത്. സെലിബ്രിറ്റികള് ഉള്പ്പടെ നിരവധി പേരാണ് ഇതിനോടകം ഈ തട്ടിപ്പിന് ഇരയായിരിക്കുന്നത്.
ഡിസംബര് ആറിനാണ് സന്തോഷ് ശിവന് തന്റെ വാട്സ്ആപ്പ് ഹാക്ക് ചെയ്യപ്പെട്ടെന്ന് വ്യക്തമാക്കിക്കൊണ്ട് സോഷ്യല് മീഡിയയില് ഒരു പോസ്റ്റ് പങ്കുവെക്കുന്നത്. തന്റെ നമ്പറില് നിന്ന് ഒരു മെസേജ് വന്നാല് മറുപടി നല്കരുതെന്നും അത് തട്ടിപ്പാണെന്നുമാണ് സന്തോഷ് ശിവന് കുറിച്ചത്. കൂടാതെ ഓഗസ്റ്റില് എന്സിപി എംപി സുപ്രിയ സൂളിന്റെ വാട്സ്ആപ്പും ഹാക്ക് ചെയ്യപ്പെട്ടിരുന്നു. ഇത്തരത്തില് നിരവധി പ്രമുഖരുടെ അക്കൗണ്ടുകള് ഹാക്ക് ചെയ്യപ്പെടുന്നുണ്ടെന്നാണ് റിപ്പോര്ട്ടുകള്. എന്നാല് എത്രപേര് വാട്സ്ആപ്പ് ഹാക്കിങ്ങിന് ഇരയായി എന്നതില് കൃത്യമായ കണക്കുകള് പുറത്തുവന്നിട്ടില്ല.
ഹാക്ക് ചെയ്യപ്പെട്ടുകഴിഞ്ഞാല് അക്കൗണ്ടിന്റെ നിയന്ത്രണം പൂര്ണമായും അവരുടെ കയ്യിലാകും. നിങ്ങളുടെ സുഹൃത്തുക്കള്ക്ക് മെസേജ് ചെയ്ത്, യുപിഐ ഇടപാട് നടത്താനും വ്യക്തിഗത വിവരങ്ങള് പങ്കുവെക്കാനും ഇവര് പറയും. തട്ടിപ്പാണ് എന്ന് മെസേജ് അയച്ചാല് അവര് അത് നീക്കം ചെയ്യും. തട്ടിപ്പുകാര് എഐ സാങ്കേതിക വിദ്യ കൂടി ഉപയോഗിക്കാന് തുടങ്ങിയതോടെ ഗുരുതര സാഹചര്യത്തിലേക്കാണ് ഇത് പോയിക്കൊണ്ടിരിക്കുന്നത്. ലോകത്തിലെ ഏറ്റവും വലിയ പരസ്യ ഗ്രൂപ്പായ ഡബ്ല്യൂപിപിയുടെ സിഇഒ മാര്ക്ക് റീഡ് അടുത്തിടെ ഡീപ് ഫേക്ക് സ്കാമിന് ഇരയായി. അദ്ദേഹത്തിന്റെ ചിത്രം ഉപയോഗിച്ച് വാട്സ്ആപ്പ് അക്കൗണ്ട് ആരംഭിക്കുകയും മൈക്രോസോഫ്റ്റ് ടീം മീറ്റിങ് നടത്തുകയുമായിരുന്നു. എഐ വോയ്സ് ക്ലോണും യൂട്യൂബ് വിഡിയോകളും ഉപയോഗിച്ചാണ് മാര്ക്ക് റീഡിനെ വ്യാജമായി സൃഷ്ടിച്ചത്.
എന്തിനും ഏതിനും സാങ്കേതിക വിദ്യയുടെ സഹായം തേടുന്ന ഈ കാലഘട്ടത്തില് ആരുവേണമെങ്കിലും തട്ടിപ്പിന് ഇരയാകാന് സാധ്യതയുണ്ട്. നിങ്ങളുടെ എത്ര പ്രിയപ്പെട്ടവരാണെങ്കിലും ആറക്ക കോഡ് ആര്ക്കും അയച്ച് കൊടുക്കാതിരിക്കുക എന്നതാണ് ഇതില് ചെയ്യാവുന്ന ആദ്യത്തെ കാര്യം. കൂടാതെ തട്ടിപ്പ് തടയാന് 3ചില കാര്യങ്ങള് നിങ്ങളുടെ വാട്സ്ആപ്പില് ചെയ്യാനാവും.
ടു സ്റ്റെപ് വെരിഫിക്കേഷന് നിങ്ങളുടെ വാട്സ്ആപ്പിന് അധിക സുരക്ഷ ഉറപ്പാക്കും. ഇത് ഓണ് ചെയ്യുന്നതിന് സെറ്റിങ്സിലെ അക്കൗണ്ടില് പോയി ടു സ്റ്റെപ് വെരിഫിക്കേഷന് ഓണ് ചെയ്യണം.
ഇ മെയില് അഡ്രസ് ഉള്പ്പെടുത്തുക. സെറ്റിങ്സിലെ അക്കൗണ്ടില് പോയാല് ഇമെയില് ലിങ്ക് ചെയ്യാനാവും.
പാസ്വേഡ് ഇടുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates