കോവിഡ് വ്യാപനത്തെതുടർന്ന് ഉണ്ടായ നിയന്ത്രണങ്ങൾ കൂടുതൽ ആളുകൾ വിഡിയോ കോൺഫറസിങ് പ്ലാറ്റ്ഫോമുകളെ പ്രയോജനപ്പെടുത്താൻ കാരണമായിട്ടുണ്ട്. ഓഫീസ് കാര്യങ്ങൾ മുതൽ ഉല്ലാസ പരിപാടികൾ വരെ ‌ഇത്തരം പ്ലാറ്റ്ഫോമുകൾ വഴിയാണ് നടക്കുന്നത്. വർക്ക് ഫ്രം ഹോം സംവിധാനം ഏർപ്പെടുത്തിയ കമ്പനികളുടെ ഓഫീസ് മീറ്റിങ്ങുകൾ, സം​ഗീത/ ഡാൻസ് ക്ലാസുകൾ മുതൽ വിവാഹങ്ങൾ വരെ വിഡിയോ കോൺഫറസിങ് പ്ലാറ്റ്ഫോമുകളിലൂടെ സാധ്യമാകുന്നുണ്ട്. സൗജന്യമായി ലഭിച്ചുകൊണ്ടിരുന്ന ഈ സേവനങ്ങൾക്ക് ഇനിമുതൽ ചില നിയന്ത്രണങ്ങൾ ഏർപ്പെടുത്തുകയാണ്. 

പ്രമുഖ വിഡിയോ കോൺഫറസിങ് പ്ലാറ്റ്ഫോമായ ​ഗു​ഗിൾ മീറ്റിന്റെ സേവനങ്ങൾ ഈ മാസം 30 മുതൽ പൂർണമായും സൗജന്യമല്ല. 60 മിനിറ്റ് (ഒരു മണിക്കൂർ) വരെയാണ് ഗൂഗിൾ മീറ്റ് ഉപയോഗപ്പെടുത്തി ഇനി സൗജന്യമായി വിഡിയോ കോൺഫെറൻസിങ് നടത്താൻ സാധിക്കുക. സേവനം തുടരണമെങ്കിൽ പ്രത്യേകം പണം ചിലവഴിക്കണം.

ഈ വർഷം ഏപ്രിലിൽ തന്നെ ഗൂഗിൾ മീറ്റിന്റെ സൗജന്യ ഉപയോഗ പരിധി ഒരു മണിക്കൂർ ആണെന്ന് ഗൂഗിൾ വ്യക്തമാക്കിയിരുന്നു. എങ്കിലും സെപ്റ്റംബർ 30 വരെ ഈ നിയന്ത്രണം നടപ്പിൽ വരുത്തുന്നത് താമസിപ്പിച്ചു ഗൂഗിൾ. ഒറ്റ ഡൊമൈൻ ഉപയോഗിച്ച്  ഒരുലക്ഷത്തിലേറെ പേരുമായുള്ള ലൈവ് സ്ട്രീമിങ് അടക്കമുള്ള ഫീച്ചറുകൾക്കും ഈ മാസം 30 മുതൽ നിയന്ത്രണങ്ങളുണ്ടാകും.