മുംബൈ: റിസർവ് ബാങ്ക് ​ഗവർണർ സ്ഥാനത്ത് നിന്നും ഊർജിത് പട്ടേൽ രാജി വച്ചതിന് പിന്നാലെ ഡപ്യൂട്ടി ​ഗവർണർ വിരാൽ ആചാര്യ രാജിവച്ചേക്കുമെന്നുള്ള വാർത്തകൾ അടിസ്ഥാന രഹിതമെന്ന് ആർബിഐ അറിയിച്ചു. അഭ്യൂഹങ്ങൾ മാത്രമാണ് വ്യാപകമായി പ്രചരിച്ചു കൊണ്ടിരിക്കുന്നത്. പിടിഐയ്ക്ക് നൽകിയ അഭിമുഖത്തിലാണ് ആർബിഐ വക്താവ് ഇക്കാര്യം അറിയിച്ചത്.

ഇക്കഴിഞ്ഞ ഒക്ടോബർ 26 ന് നടത്തിയ പ്രസം​ഗത്തിൽ ബാങ്കിന്റെ സ്വയംഭരണാധികാരത്തിൽ കേന്ദ്രം ഇടപെടുന്നതിനെ വിരാൽ ആചാര്യ രൂക്ഷമായി വിമർശിച്ചിരുന്നു. ബാങ്കിന്റെ സ്വയംഭരണാവകാശം സംരക്ഷിക്കണമെന്ന് അദ്ദേഹം ആവശ്യം ഉന്നയിക്കുകയും ചെയ്തു. കേന്ദ്രസർക്കാരും ആർബിഐയുമായി നിലനിൽക്കുന്ന അസ്വാരസ്യങ്ങൾ മറനീക്കി പുറത്ത് വന്നത് ആചാര്യയുടെ ഈ പ്രസം​ഗത്തോടെയായിരുന്നു.  ഇതോടെയാണ് പട്ടേൽ രാജിവച്ച സാഹചര്യത്തിൽ വിരാൽ ആചാര്യയും പുറത്തേക്ക് പോകാനുള്ള സാധ്യതകൾ ഉണ്ടെന്നും രാജി ഉടൻ പ്രഖ്യാപിക്കുമെന്നുമുള്ള തരത്തിൽ വാർത്തകൾ പ്രചരിച്ചത്.