മോട്ടോര്‍ വാഹന നിയമങ്ങള്‍ പുതുക്കിയതിന് പിന്നാലെ നിയമലംഘനം നടത്തിയതുമായി ബന്ധപ്പെട്ടുള്ള നിരവധി കൗതുകവാര്‍ത്തകളും പുറത്ത് വരുന്നുണ്ട്. അത്തരത്തിലൊരു വാര്‍ത്തയാണ് ഇപ്പോള്‍ സമൂഹമാധ്യമങ്ങളില്‍ തരംഗമാകുന്നത്. ബസ് ഓടിക്കുമ്പോള്‍ ഹെല്‍മെറ്റ് ധരിച്ചില്ല എന്ന് ചൂണ്ടിക്കാട്ടി ഡ്രൈവര്‍ക്ക് മോട്ടോര്‍ വാഹനവകുപ്പ് 500 രൂപ പിഴ ചുമത്തിയിരിക്കുകയാണ്.

നോയിഡയിലെ ട്രാന്‍സ്‌പോര്‍ട്ട് കമ്പനിയ്ക്കാണ് പിഴ ലഭിച്ചത്. സ്‌കൂള്‍ ബസും സ്വകാര്യ കമ്പനികളുടെ സ്റ്റാഫ് ബസുമായി വാഹനങ്ങളെ ഓടിക്കുന്ന കമ്പനിയാണിത്. മോട്ടോര്‍ വാഹന വകുപ്പിന്റെ ഓണ്‍ലൈന്‍ പോര്‍ട്ടലില്‍ പിഴയെ കുറിച്ചുള്ള വിവരങ്ങള്‍ നല്‍കിയിട്ടുണ്ട്. 

ഏകദേശം 50 ബസുകളുള്ള ട്രാന്‍സ്‌പോര്‍ട്ട് കമ്പനിയുടെ ഒരു ബസിന്റെ പേരിലാണ് പിഴ വന്നിരിക്കുന്നത്. സെപ്റ്റംബര്‍ 11 ന് നിയമ ലംഘനം നടത്തിയെന്നാണ് കുറ്റം. എന്നാല്‍ സാങ്കേതിക തകരാര്‍ കാരണമായിരിക്കും ഇങ്ങനെ സംഭവിച്ചതെന്നാണ് ഉദ്യോഗസ്ഥര്‍ പറയുന്നത്. അതേസമയം, സീറ്റ് ബെല്‍റ്റ് ധരിക്കാത്തതിന് ഇതിന് മുന്‍പ് 4 പ്രാവശ്യം ഈ ബസിന് പിഴ ചുമത്തിയിട്ടുണ്ടെന്നും അധികൃതര്‍ പറയുന്നു.