കൊച്ചി: കേരളത്തിൽ കൂടുതൽ സേവനങ്ങൾ ലഭ്യമാക്കുന്നതിന്റെ ഭാ​ഗമായി ​ഗൂ​ഗിൾ മാപ്സ് കൊച്ചിയിൽ ഇരുചക്ര വാഹനങ്ങൾക്കായുള്ള ടൂ വീലർ മോഡ് സേവനങ്ങൾ വിപുലീകരിച്ചു. ലക്ഷ്യസ്ഥാനത്ത് എളുപ്പത്തിൽ എത്തിച്ചേരാൻ സഹായിക്കുന്നതിനൊപ്പം അതതു പ്രദേശത്തെ കടകളും ഭക്ഷണശാലകളും ഉൾപ്പെടെ ഇരുചക്ര യാത്രികർക്ക് എളുപ്പത്തിൽ കണ്ടെത്താനാകുന്ന രീതിയിലാണ് സേവനങ്ങൾ വിപുലീകരിച്ചിരിക്കുന്നത്. 

യാത്രക്കാർക്ക് വിവിധ ലൊക്കേഷനുകളും ഷോർട്ട് കട്ടുകളുമുൾപ്പെടെ പങ്കുവയ്ക്കാനും അവസരം ലഭിക്കും. ഓരോ പ്രദേശത്തേയും തത്സമയ ട്രാഫിക്ക് വിവരങ്ങളും മുന്നറിയിപ്പുകളും അപ്ഡേറ്റ് ചെയ്യുന്നതിനൊപ്പം പ്രത്യേക റിവാർഡ് പോയിന്റുകൾ നേടാനും അവസരമുണ്ട്. മലയാളം ഉൾപ്പെടെ ഏഴ് പ്രാദേശിക ഭാഷകളിൽ നാവി​ഗേഷൻ സേവനങ്ങൾ ലഭ്യമാക്കുമെന്ന് ​ഗൂ​ഗിൾ മാപ്സ് ഇന്ത്യ ലീഡ് അനൽ ഘോഷ് പറഞ്ഞു. 

നിലവിൽ പ്രതിമാസം രണ്ട് കോടിയിലധികം ആളുകളാണ് രാജ്യത്ത് ​ഗൂ​ഗിൾ മാപ്സിന്റെ ഇരുചക്ര വാഹനങ്ങൾക്കായുള്ള സൗകര്യങ്ങൾ പ്രയോജനപ്പെടുത്തുന്നത്.