ബംഗളൂരു: ലോകത്തെ ഏറ്റവും കൂടുതല്‍ ടെക്നോളജി സ്റ്റാര്‍ട്ടപ്പുകളുളള നഗരങ്ങളുടെ പട്ടികയില്‍ ബംഗളൂരുവിന് മൂന്നാം സ്ഥാനം. ഏറ്റവും കൂടുതല്‍ ടെക് സ്റ്റാര്‍ട്ടപ്പുകള്‍ കേന്ദ്രീകരിച്ചിട്ടുളള നഗരമെന്ന നേട്ടം സിലിക്കണ്‍ വാലിക്കാണ്. പട്ടികയില്‍ രണ്ടാം സ്ഥാനം ലണ്ടനും സ്വന്തമാക്കി. ആഗോള വ്യവസായ സംഘടയായ നാസ്കോം പുറത്തുവിട്ട റിപ്പോര്‍ട്ടിലാണ് വിവരങ്ങളുളളത്. 

അന്താരാഷ്ട്ര തലത്തില്‍ മൂന്നാമത്തെ വലിയ സ്റ്റാര്‍ട്ടപ്പ് സമ്പദ് വ്യവസ്ഥ എന്ന ഖ്യാതി നിലനിര്‍ത്താനും ഇന്ത്യക്കായിട്ടുണ്ട്. നാസ്കോമിന്‍റെ കണക്കുകള്‍ പ്രകാരം മൊത്തം 7,200-7,700 സ്റ്റാര്‍ട്ടപ്പുകളാണ് ഇന്ത്യയിലുളളത്. രാജ്യത്തെ സ്റ്റാര്‍ട്ടപ്പ് മേഖലയിലുളള നിക്ഷേപത്തില്‍ അത്ഭുതപ്പെടുത്തുന്ന തരത്തിലുളള വളര്‍ച്ചയാണുണ്ടായതെന്നും നാസ്കോം റിപ്പോര്‍ട്ടിൽ പറയുന്നു. ഈ വര്‍ഷം ജനുവരി-സെപ്റ്റംബര്‍ കാലയളവില്‍ മാത്രം 1,200 ടെക് സ്റ്റാര്‍ട്ടപ്പുകളാണ് ഇന്ത്യയില്‍ വളര്‍ന്നു വന്നത്.