ന്യൂഡല്‍ഹി: വാര്‍ഷിക കണക്കെടുപ്പ് നടക്കുന്നതിനാല്‍ ഞായറാഴ്ച ആദായ നികുതി ഓഫീസുകളും ജിഎസ്ടി ഓഫീസുകളും തുറന്ന് പ്രവര്‍ത്തിക്കും. സെന്‍ട്രല്‍ ബോര്‍ഡ് ഓഫ് ഇന്‍ഡയറക്ട് ടാക്‌സസ് ആന്റ് കസ്റ്റംസാണ് ഇക്കാര്യം അറിയിച്ചത്. മാര്‍ച്ച് 30, 31 ദിവസങ്ങള്‍ പൊതു അവധിയായി വരുന്ന വര്‍ഷങ്ങളില്‍ നികുതിദായകരുടെ സൗകര്യാര്‍ത്ഥം ഈ ഓഫീസുകള്‍ തുറന്ന് പ്രവര്‍ത്തിക്കാറുണ്ട്. സാധാരണ ഓഫീസ് സമയം തന്നെയാവും പ്രവൃത്തി സമയം. 

2018-2019 സാമ്പത്തിക വര്‍ഷത്തെ  ആദായ നികുതി റിട്ടേണുകള്‍ സമര്‍പ്പിക്കേണ്ട അവസാന തിയതിയാണ് നാളെ. ഫെബ്രുവരി വരെയുള്ള ജിഎസ്ടി വരുമാനം 10.70 കോടി കവിഞ്ഞതായുള്ള റിപ്പോര്‍ട്ടുകള്‍ നേരത്തേ പുറത്ത് വന്നിരുന്നു. പ്രത്യക്ഷ നികുതിയിനത്തില്‍ 10.21 ലക്ഷം കോടി രൂപ മാത്രമേ മാര്‍ച്ച് 23 വരെ ഖജനാവിലേക്ക് എത്തിയിരുന്നുള്ളൂ. 12 ലക്ഷം കോടി രൂപ എത്തുമെന്നായിരുന്നു ആദായ നികുതി വകുപ്പിന്റെ കണക്ക്. 

സര്‍ക്കാരിന്റെ വാര്‍ഷിക സാമ്പത്തിക ഇടപാടുകള്‍ ക്ലോസ് ചെയ്യുന്നതിനാല്‍ എല്ലാ ബാങ്കുകളും തുറന്ന് പ്രവര്‍ത്തിക്കണമെന്ന് റിസര്‍വ് ബാങ്കും നിര്‍ദ്ദേശം നല്‍കിയിട്ടുണ്ട്.