പുതിയ തൊഴിൽ സാധ്യതകൾ കൂടുതൽ തുറന്നു വരുമെന്ന് പ്രതീക്ഷിക്കുന്ന ട്രാവൽ, ടൂറിസം, ഹോസ്പിറ്റാലിറ്റി മേഖലകളിൽ ഊന്നൽ നൽകുന്ന കോഴ്സുകളിലേക്ക് കിറ്റ്സ് അപേക്ഷ ക്ഷണിച്ചു.

കേരള ടൂറിസം വകുപ്പിന് കീഴിലുള്ള കേരള ഇൻസ്റ്റിറ്റ്യൂട്ട് ഓഫ് ട്രാവൽ ആൻഡ് ടൂറിസം (കിറ്റ്സ്) നടത്തുന്ന എംബിഎ കോഴ്സുകൾക്ക് അപേക്ഷ ക്ഷണിച്ചു. ട്രാവൽ ആൻഡ് ടൂറിസത്തിൽ രണ്ട് വർഷ പൂർണ്ണ സമയ എംബിഎ കോഴ്സാണ് കിറ്റ്സ് നടത്തുന്നത്.

വരുന്ന അക്കാദമിക് വർഷത്തെ അടിസ്ഥാനമാക്കി 2026-2028 കാലയളവിലെ കോഴ്സിലേക്കാണ് അപേക്ഷ ക്ഷണിച്ചിട്ടുള്ളത്. ഓൺലൈനായി അപേക്ഷ സമർപ്പിക്കാം.

അംഗീകൃത സർവ്വകലാശാലയിൽ നിന്നും ഏതെങ്കിലും വിഷയത്തിൽ 50 ശതമാനം മാർക്കോടു കൂടിയ ബിരുദവും, KMAT/CMAT/CAT യോഗ്യതയും ഉള്ളവർക്ക് അപേക്ഷിക്കാം. അവസാന വർഷ ഡിഗ്രി വിദ്യാർത്ഥികൾക്കും അപേക്ഷ സമർപ്പിക്കാം. അപേക്ഷാ ഫീസ് 400 രൂപയാണ്.

കേരള സർവകലാശാലയുടേയും, എ ഐ സി ടി ഇയുടേയും അംഗീകാരത്തോടെ നടത്തുന്ന ദ്വിവത്സര കോഴ്‌സിൽ, ട്രാവൽ, ടൂർ ഓപ്പറേഷൻ, ഹോസ്പിറ്റാലിറ്റി, എയർപോർട്ട് മാനേജ്‌മെന്റ് എന്നീ വിഷയങ്ങളിൽ സ്‌പെഷ്യലൈസേഷൻ ഉണ്ട്.

ഇതിന് പുറമെ കോഴ്സിനൊപ്പം ജർമ്മൻ, ഫ്രഞ്ച് ഭാഷകൾ പഠിക്കാനും വിദ്യാർത്ഥികൾക്ക് അവസരമുണ്ട്. ഇത് മറ്റ് രാജ്യങ്ങളിലെ തൊഴിലവസരങ്ങളെ സഹായിക്കുമെന്ന് കിറ്റ്സ് പ്രിൻസിപ്പൽ ഡോ. ബി രാജേന്ദ്രൻ പറഞ്ഞു.

എസ് സി/ എസ് ടി വിദ്യാർത്ഥികൾക്ക് സർക്കാർ അനുവദിച്ചിട്ടുള്ള സംവരണവും ആനുകൂല്യങ്ങളും ലഭിക്കും.

ഓൺലൈൻ വഴി അപേക്ഷിക്കാനുള്ള ലിങ്ക് ഇവിടെ കാണാം.

കൂടുതൽ വിവരങ്ങൾക്ക്: www.kittsedu.org, ഫോൺ: 9645176828, 9446529467.