മദ്യം ഭക്ഷ്യവിഷബാധയ്‌ക്കെതിരെ ഒരു മികച്ച ഔഷധമാണെന്ന് തെറ്റിദ്ധരിച്ചു വെച്ചിരിക്കുന്ന നിരവധി ആളുകളുണ്ട്. മദ്യത്തിന് ആന്റി-ബാക്ടീരിയൽ ​ഗുണങ്ങൾ ഉള്ളതിനാൽ ഭക്ഷ്യവിഷബാധ മൂലമുള്ള ലക്ഷണങ്ങളെ ലഘൂകരിക്കാൻ സാധിക്കുമെന്നാണ് ഇത്തരക്കാരുടെ ധാരണ. എന്നാൽ മദ്യത്തിൻ്റെ ആൻറി ബാക്ടീരിയൽ ഗുണങ്ങൾ പരിമിതവും ദോഷകാരികളായ ബാക്ടീരിയകളെ നിർവീര്യമാക്കാൻ മാത്രം ശക്തവുമല്ലെന്ന് വിദഗ്ധര്‍ ചൂണ്ടിക്കാണിക്കുന്നു.

ഹാൻഡ് സാനിറ്റൈസേഷനിൽ ആൽക്കഹോൾ പ്രധാന ഘടകമാകുന്നത് മദ്യത്തിന്റെ ഈ ആന്റി-ബാക്ടീരിയൽ ​ഗുണങ്ങൾ ഉള്ളതിനാലാണ്. എന്നാല്‍ അഞ്ച് മുതൽ 15 വരെ സാന്ദ്രതയിലാണ് കുടിക്കാൻ ആവശ്യമായ മദ്യം നിർമിക്കുന്നത്. ഇത് ബാക്ടീരിയകളെ ഫലപ്രദമായി നശിപ്പിക്കാൻ ഉപയോഗിക്കുന്ന 60 മുതൽ 90 ശതമാനം സാന്ദ്രതയെക്കാൾ (ഹാൻഡ് സാനിറ്റൈസർ പോലുള്ളവയിൽ ഉപയോ​ഗിക്കുന്നത്) കുറവാണ്. മദ്യത്തിൻ്റെ ആൻറി ബാക്ടീരിയൽ ഗുണങ്ങള്‍ വയറ്റിൽ ഫലപ്രദമാകില്ല. അതുകൊണ്ട് തന്നെ മദ്യം ഭക്ഷണത്തിലൂടെ പകരുന്ന ബാക്ടീരിയ, വൈറസ് പോലുള്ളവയെ നിര്‍വീര്യമാക്കില്ല.

അതേസമയം ഭക്ഷ്യവിഷബാധയുള്ളപ്പോൾ മദ്യം കുടിക്കുന്നത് ലക്ഷണങ്ങളെ ​ഗുരുതരമാക്കാനും കാരണമായേക്കാം. മദ്യം കുടലിന്റെ ആവരണത്തെ പ്രകോപിക്കുകയും രോ​ഗാവസ്ഥ കൂടുതൽ ​ഗുരുതരമാകാൻ കാരണമാകുകയും ചെയ്യുന്നു. മദ്യം ദഹനനാളത്തെ ബാധിക്കുന്നതോടെ ഓക്കാനം, ഛർദ്ദി, വയറിളക്കം തുടങ്ങിയ ലക്ഷണങ്ങൾ വഷളാകാൻ സാധ്യതയുണ്ട്. കൂടാതെ മദ്യം നിര്‍ജ്ജലീകരണത്തിന് കാരണമാകും. ഇത് ഭക്ഷ്യവിഷബാധയുടെ ലക്ഷണങ്ങള്‍ ഗുരുതരമാക്കും.

ദിവസവും ഒരുപിടി നട്സ് കഴിക്കുന്നത് ഡിമെന്‍ഷ്യ സാധ്യത കുറയ്ക്കും; പഠനം

ഭക്ഷ്യവിഷബാധ തടയാന്‍

• നന്നായി പാകം ചെയ്ത ഭക്ഷണം കഴിക്കാന്‍ ശ്രമിക്കുക.

• വൃത്തിഹീനമായതും പുറത്തുനിന്നുമുള്ള ഭക്ഷണം കഴിക്കുന്നത് പരമാവധി ഒഴിവാക്കുക.

• ഭക്ഷണം തുറന്ന് വെക്കുന്നത് ബാക്ടീരിയ ബാധിക്കാന്‍ കാരണമാകും. ബാക്കിയാകുന്ന ഭക്ഷണം നല്ലതുപോലെ അടച്ച് ഫ്രിഡ്ജില്‍ സൂക്ഷിക്കാം.

• ഭക്ഷണ സാധനങ്ങള്‍ വേര്‍ത്തിരിച്ച് സൂക്ഷിക്കുന്നത് ഭക്ഷണം പെട്ടെന്ന് മലിനമാകുന്നത് തടയാന്‍ സഹായിക്കും.

• കഴിക്കുന്നതിനും മുന്‍പും ശേഷവും കൈകള്‍ വൃത്തിയായി കഴുകുക. ഇത് ബാക്ടീരിയ കൈകളിലൂടെ ഉള്ളിലെത്തുന്നത് തടയും.