മീനില്ലാതെ ചോറെങ്ങനെ കഴിക്കുമെന്ന് അത്ഭുതപ്പെടുന്ന മലയാളികളാണ് കൂടുതലും. മീൻ പൊരിച്ചും കറിവെച്ചും പീരവെച്ചും പിന്നെ പല വെറൈറ്റികളും ട്രൈ ചെയ്തു മീൻ ദിവസവുമുള്ള നമ്മുടെ ഡയറ്റിലെ പ്രധാന ഭാ​ഗമാണ്. രുചിയിൽ മാത്രമല്ല, പ്രോട്ടീൻ കൊണ്ടും സമ്പന്നമാണ് മീൻ. ഒമേഗ–3 ഫാറ്റി ആസിഡുകൾ, വിറ്റാമിനുകൾ എന്നിവയുടെ കലവറ.

എന്നാൽ എല്ലാ മത്സ്യങ്ങളും എല്ലാവർക്കും കഴിക്കാൻ സാധിക്കുമോ? ​ഗർഭിണികളും ചെറിയ കുട്ടികളും കഴിക്കാൻ പാടില്ലാത്ത അല്ലെങ്കിൽ അവരുടെ ആരോ​ഗ്യത്തെ ബാധിക്കുന്ന മത്സ്യങ്ങളുമുണ്ട്. ചില സമുദ്ര മത്സ്യങ്ങളിൽ മെർക്കുറി എന്ന ലോഹത്തിന്റെ അളവ് കൂടുതലായിരിക്കും. ഇത് ഗർഭിണികൾ കഴിച്ചാൽ കുഞ്ഞിന്റെ മസ്തിഷ്ക വികസനത്തേയും നാഡീവ്യവസ്ഥയേയും നെ​ഗറ്റീവായി ബാധിക്കാനുള്ള സാധ്യത ഏറെയാണ്.

അതുപോലെ ചെറിയ കുട്ടികളിൽ ഇത് ആരോ​ഗ്യപ്രശ്നങ്ങൾ സൃഷ്ടിക്കുകയും ചെയ്യുമെന്നാണ് പഠനങ്ങൾ വ്യക്തമാക്കുന്നു. ഗർഭിണികളും കുട്ടികളും ഒഴിവാക്കേണ്ട മത്സ്യങ്ങൾ

• ഷാർക്ക്

• സ്വോർഡ് ഫിഷ്

• കിങ് മാക്കറൽ

• ടൈൽഫിഷ്

• മാർലിൻ

• ബിഗ് ഐ ട്യൂണ

• ഓറഞ്ച് റഫി

ഈ മത്സ്യങ്ങളൊക്കെ വലുതും ദീർഘകാലം ജീവിക്കുന്നതുമാണ്. അതുകൊണ്ടുതന്നെ, ശരീരത്തിൽ മെർക്കുറി കൂടുതൽ അടിഞ്ഞുകൂടിയിരിക്കും. സാൽമൺ, സാർഡിൻ, ആഞ്ചോവി, തിലാപിയ, കോഡ് എന്നീ മത്സ്യങ്ങൾ പോഷകഗുണം ഏറെയുള്ളതും സുരക്ഷിതവുമാണ്. ഗർഭിണികൾ ആഴ്ചയിൽ ഒന്ന് മുതൽ മൂന്ന് പ്രാവശ്യം മാത്രമായി മത്സ്യം കഴിക്കുന്നതാണ് നല്ലത്.