മുടിയുടെ ആരോഗ്യത്തിന് എക്സ്ട്ര കെയര്‍ ആവശ്യമാണ്. പോഷകക്കുറവ്, കാലാവസ്ഥ, മലിനീകരണം തുടങ്ങിയ പല ഘടകങ്ങള്‍ മുടിയുടെ ആരോഗ്യത്തെ ബാധിക്കാം. എന്നാല്‍ പറഞ്ഞും കേട്ടും മുടിയുടെ ആരോഗ്യത്തെ സംബന്ധിച്ച് പല മിത്തുകളും ആളുകള്‍ക്കിടയില്‍ പ്രചരിക്കുന്നുണ്ട്. ഇത്തരം തെറ്റിദ്ധാരണകള്‍ ആരോഗ്യമുള്ള മുടിയുടെ വളര്‍ച്ച തടയാമെന്ന് സെലിബ്രിറ്റി ഹെയര്‍ സൈലിസ്റ്റ് ആയ ആലിം ഹക്കിം പറയുന്നു.

മുടി ഷാംപൂ ചെയ്യുന്നതു മുതല്‍ ഹെയല്‍ കളറിങ് വരെ സംബന്ധിച്ച് പലതരത്തിലുള്ള മിത്തുകള്‍ നിലനില്‍ക്കുന്നുണ്ട്. അതില്‍ പലതും വസ്തുതകളായി തെറ്റിദ്ധരിക്കപ്പെടുന്നുവെന്നും ആലിം ഹക്കിം പറയുന്നു.

മുടിയെ ചുറ്റിപ്പറ്റിയുള്ള ചില മിത്തുകളും വസ്തുതകളും

താരൻ ഉണ്ടാകുന്നത് വരണ്ട തലയോട്ടിയില്‍

വരണ്ട തലയോട്ടി മാത്രമല്ല, എണ്ണമയമുള്ള തലയോട്ടിയിലും താരൻ ഉണ്ടാകാം. ഇതില്‍ എണ്ണമയമുള്ള തലയോട്ടിയിലുണ്ടാകുന്ന താരനാണ് കൂടുതല്‍ സൂക്ഷിക്കേണ്ടത്. വരണ്ട തലയോട്ടിയിലെ താരൻ സ്വാഭാവികമായി അടര്‍ന്നു പോകുന്നു ഇത് പെട്ടെന്ന് കുറയ്ക്കാനും കഴിയും. എന്നാൽ എണ്ണമയമുള്ള തലയോട്ടിയിലുള്ള താരൻ കട്ടിയുള്ളതും നീക്കം ചെയ്യാൻ അത്ര പ്രയാസമുള്ളതുമാണ്. ഏത് തരമാണെങ്കിലും ശരിയായി വൃത്തിയാക്കുകയാണ് പ്രധാനം. സമ്മർദ്ദം, ഉറക്കക്കുറവ്, ചില മെഡിക്കൽ അവസ്ഥകൾ എന്നിവ മൂലവും താരൻ ഉണ്ടാകാം.

ട്രിം ചെയ്യുന്നത് മുടി വേഗത്തില്‍ വളരാന്‍ സഹായിക്കും

മുടിയുടെ അറ്റം പിളരുന്നതും കേടായതുമായ അറ്റങ്ങൾ ഒഴിവാക്കുന്നതിനാണ് മുടി ട്രിം ചെയ്യുന്നത്. ഇത് മുടി വൃത്തിയായി കിടക്കാന്‍ സഹായിക്കും. മുടിയുടെ വളര്‍ച്ചയും ട്രിം ചെയ്യുന്നതുമായി യാതൊരു ബന്ധവുമില്ല.

ഒരു ദിവസം 100 തവണ ചീകുന്നത് മുടിക്ക് തിളക്കം നൽകും

ഒരു ദിവസം 100 തവണ ചീകുന്നത് മുടിക്ക് തിളക്കം നൽകുമെന്നത് വെറുതെയാണ്. യഥാര്‍ഥത്തില്‍, ബ്രഷ് ചെയ്യുന്നതിലൂടെ ഉത്പാദിപ്പിക്കപ്പെടുന്ന സ്റ്റാറ്റിക് വൈദ്യുതിയാണ് മുടി കൂടുതൽ തിളക്കമുള്ളതായി തോന്നിപ്പിക്കുന്നത്. ഉപയോഗിക്കുന്ന ഹെയർ ബ്രഷും മുടിയിൽ സ്വാധീനം ചെലുത്തും. അമിതമായി ബ്രഷ് ചെയ്യുന്നത് മുടിക്ക് കേടുപാടുകൾ വരുത്തുന്നതിനും മുടി കൊഴിച്ചിലിനും കാരണമാകും.

എല്ലാ ദിവസവും മുടി കഴുകണം

ശരിയാണ്, ശരീരത്തെപ്പോലെ, മുടിയും ഇടയ്ക്കിടെ കഴുകേണ്ടതുണ്ട്. പ്രത്യേകിച്ച് കൂടുതൽ തവണ പുറത്തിറങ്ങുകയും പൊടിയും അഴുക്കും ഉണ്ടാവുകയും ചെയ്യുന്ന സാഹചര്യത്തില്‍. ദിവസവും തലമുടി കഴുകുന്നത് തലയോട്ടിയിലെ അഴുക്ക്, പൊടി, അടിഞ്ഞുകൂടൽ എന്നിവയിൽ നിന്ന് മുക്തമാക്കും.

വായുവിൽ ഉണക്കുന്നതാണ് എപ്പോഴും ബ്ലോ-ഡ്രൈ ചെയ്യുന്നതിനേക്കാൾ നല്ലത്

അമിതമായി ബ്ലോ-ഡ്രൈ ചെയ്യുന്നത് മുടിക്ക് ദോഷകരമാണ്. പകരം വായുവിൽ മുടി ഉണക്കുന്നത് മുടിയിൽ മൃദുവായി പ്രവർത്തിക്കുകയും അതിന്റെ സ്വാഭാവിക ഈർപ്പം നിലനിർത്തുകയും ചെയ്യാന്‍ സഹായിക്കും. എന്നാല്‍ ധാരാളം സമയം എടുത്തേക്കാം.

രാത്രി മുഴുവൻ മുടിയിൽ എണ്ണ തേയ്ക്കണം

നമ്മുടെ തലയോട്ടിയില്‍ സ്വാഭാവിക എണ്ണ ഉല്‍പാദിപ്പിക്കുന്ന ഗ്രന്ഥികളുണ്ട്. രാത്രി മുഴുവന്‍ എണ്ണം പുരട്ടിവെയ്ക്കണമെന്നില്ല. കൂടാതെ വൃത്തിയുള്ളതും അഴുക്കില്ലാത്തതുമായ മുടിയിൽ എണ്ണ തേയ്ക്കുന്നതാണ് നല്ലത്. ഇല്ലെങ്കില്‍ അഴുക്ക് അടിഞ്ഞു കൂടാനും സുഷിരങ്ങള്‍ അടയാനും കാരണമാകും.