പല സാഹചര്യങ്ങൾ കൊണ്ടും മൂത്രം ദീർഘനേരം പിടിച്ചുവയ്ക്കുന്ന ശീലം പലർക്കുമുണ്ട്. ഈ ശീലം ക്രമേണ നമ്മുടെ മൂത്രസഞ്ചിയെയും വൃക്കകളെയും തകരാറിലാക്കുന്നതാണ്. ശരീരത്തിൽ നിന്ന് മാലിന്യം പുറന്തള്ളാനുള്ള പ്രാഥമിക മാർ​ഗമാണ് മൂത്രമൊഴിക്കൽ. ഈ സ്വാഭാവിക പ്രക്രിയയെ തടസ്സപ്പെടുത്തുന്നത് ആരോ​ഗ്യത്തെ വിപരീതമായി ബാധിക്കാം.

വൃക്കകൾ ഫിൽട്ടർ ചെയ്യുന്ന മാലിന്യം മൂത്രത്തിലൂടെയാണ് പുറന്തള്ളപ്പെടുന്നത്. ഇവ പേശികൾക്കൊണ്ടാക്കിയ മൂത്രസഞ്ചയിൽ സംഭവിക്കുകയും മൂത്രസഞ്ചി നിറയുമ്പോൾ അതിന്റെ റിസപ്റ്ററുകൾ തലച്ചോറിലേക്ക് മൂത്രസഞ്ചി ശൂന്യമാക്കേണ്ടതിന്റെ സൂചനകൾ അയയ്ക്കുന്നു. മൂത്രമൊഴിക്കാനുള്ള പ്രേരണ ഓരോ വ്യക്തിയിലും വ്യത്യാസപ്പെടാം, അത് പ്രായം, മൂത്രാശയ ശേഷി, പകലിന്റെ സമയം എന്നിവയെ ആശ്രയിച്ചിരിക്കുന്നു.

മൂത്രം പിടിച്ചുവയ്ക്കുന്നതു കൊണ്ടുള്ള ആരോഗ്യ പ്രശ്നങ്ങൾ

മൂത്രാശയ അണുബാധ: മൂത്രം പിടിച്ചു വയ്ക്കുമ്പോൾ മൂത്രസഞ്ചിയിൽ ബോക്ടീരിയകൾ വളരാനുള്ള അനുകൂല സാഹചര്യം സൃഷ്ടിക്കുന്നു. ഇത് അണുബാധ, മൂത്രമൊഴിക്കുമ്പോൾ കത്തുന്ന സംവേദനം, അടിവയറ്റിലെ വേദന, ദുർഗന്ധം വമിക്കുന്ന മൂത്രം എന്നിവയ്ക്കുള്ള സാധ്യതയിലേക്ക് നയിക്കുന്നു.

മൂത്രസഞ്ചിയിലെ ആയാസവും പേശികളുടെ ബലഹീനതയും: ദീർഘനേരം മൂത്രം പിടിച്ചുവയ്ക്കുന്നത് മൂത്രസഞ്ചിയുടെ പേശികളെ ദുർബലപ്പെടുത്തും. ഇത് തുമ്മുമ്പോഴോ ചുമയ്ക്കുമ്പോഴോ മൂത്രം നിയന്ത്രണമില്ലാതെ പോകാനും കാരണമാകുന്നു.

വൃക്കയിലെ മർദ്ദവും തിരിച്ചുപോക്കും : സാധാരണയായി, മൂത്രം വൃക്കകളിൽ നിന്ന് മൂത്രസഞ്ചിയിലേക്ക് ഒഴുകുന്നു. എന്നാൽ, മൂത്രസഞ്ചി അമിതമായി നിറഞ്ഞാൽ ചിലപ്പോൾ മൂത്രം വൃക്കകളിലേക്ക് തിരികെ ഒഴുകുന്നു. ഇതിനെ വെസിക്കോറെറ്ററൽ റിഫ്ലക്സ് എന്ന് വിളിക്കുന്നു. ഈ അവസ്ഥ വൃക്ക തകരാറിനും ഗുരുതരമായ അണുബാധയ്ക്കും കാരണമാകും.