കുട്ടികളുടെ വളർച്ചയ്ക്ക് ആരോ​ഗ്യകരമായ ഡയറ്റ് പിന്തുടരേണ്ടത് വളരെ പ്രധാനമാണ്. എന്നാൽ കുട്ടികളെ നല്ല ഭക്ഷണം കഴിപ്പിക്കുക എന്നത് മാതാപിതാക്കളെ കുറച്ചൊന്നുമല്ല ബുദ്ധിമുട്ടിക്കുന്നത്. ടിഫിൻ ബോക്സിൽ കൊടുത്താലും പാത്രത്തിൽ കൊടുത്താലും ഭക്ഷണം ഉള്ളിലേക്ക് ചെല്ലുക വളരെ കുറിച്ചായിരിക്കും. കുട്ടികളിൽ ഭക്ഷണത്തെ കുറിച്ചും ആരോ​ഗ്യത്തെ കുറിച്ചും അവബോധം സൃഷ്ടിക്കേണ്ടത് പ്രധാനമാണ്.

കുട്ടികളില്‍ ആരോഗ്യ അവബോധം ഉണ്ടാക്കാനുള്ള ചില ടിപ്സ്

• അതിനായി വീട്ടിൽ നിന്നും പഠനം ആരംഭിക്കണം. വിവിധ ആരോ​ഗ്യാവസ്ഥകളെ കുറിച്ചും ഭക്ഷണങ്ങൾ കഴിക്കുന്നതു കൊണ്ടുള്ള ​ഗുണങ്ങളെ കുറിച്ചും കഥകളായും വർത്തമാനങ്ങളായും കുട്ടികളോട് പങ്കുവെക്കുക.

• പാചകം ചെയ്യുമ്പോൾ കുട്ടികളുടെ പങ്കാളിത്തം ഉറപ്പാക്കണം. വസ്തുക്കൾ കണ്ടു മനസിലാക്കുന്നത് കാര്യങ്ങൾ കൂടുതൽ മനസിലാക്കാൻ അവരെ സഹായിക്കും.

• കുട്ടികളെ ആകർഷിക്കുന്ന തരത്തിൽ ഭക്ഷണത്തിൽ വൈവിധ്യങ്ങൾ കൊണ്ടു വരുന്നത് അവർക്ക് ഭക്ഷണം കഴിക്കാൻ പ്രോത്സാഹനമാകും.

• മുതിർന്നവർക്കൊപ്പമിരുന്ന് ഭക്ഷണം കഴിക്കുന്നത് കുട്ടികൾക്കും സ്വന്തമായി ഭക്ഷണം കഴിക്കാൻ പ്രോത്സാഹനമാകും.

കൂടാതെ കുട്ടികൾ നന്നായി വെള്ളം കുടിക്കുന്നുവെന്ന് ഉറപ്പുവരുത്തണം. കുട്ടികൾ സദാ ഊർജ്ജസ്സ്വലരായിരിക്കുന്നതും നിരന്തരം കളികളിലേർപ്പെടുന്നതും അവരുടെ ശരീരത്തിലെ ജലാംശം എളുപ്പത്തിൽ നഷ്ടപ്പെടുത്തും. വ്യത്യസ്ത ഇടവേളകളിൽ ശുദ്ധജലം കുടിക്കുന്നത് ശീലമാക്കുക. കുട്ടികളുടെ ഡയറ്റിൽ പ്രോട്ടീൻ, കാൽസ്യം, വിറ്റാമിൻ ഡി, ഇരുമ്പ്, ഒമേ​ഗ-3 ഫാറ്റി ആസിഡ്, നാരുകൾ എന്നിവ അടങ്ങിയ ഭക്ഷണം ഉൾപ്പെടുത്താൻ ശ്രമിക്കുക. ഇത് അവരുടെ വളർച്ചയെയും രോ​ഗ പ്രതിരോധ ശേഷിയും മെച്ചപ്പെടുത്താൻ സഹായിക്കും.