ബാത്ത്റൂം വൃത്തിയാക്കുന്നത് വെറും വെള്ളം ഒഴിച്ച് കഴുകിയെടുക്കുന്ന ജോലിയല്ല. ടൈലുകളിലും ഫ്ലോറിലും വാഷ്‌ബേസിനിലും ടോയ്‌ലെറ്റിലും ഓരോന്നും പ്രത്യേകം വൃത്തിയാക്കണം. പ്രത്യേകിച്ച് ആദ്യം വൃത്തിയാക്കേണ്ട ഭാഗവും അവസാനം വൃത്തിയാക്കേണ്ട ഭാഗവും തെറ്റിച്ചാൽ നേരത്തെ വൃത്തിയാക്കിയ ഭാഗങ്ങളിലേക്ക് വീണ്ടും അഴുക്ക് എത്താനും സാധ്യതയുണ്ട്. അതിനാൽ ബാത്ത്റൂം വൃത്തിയാക്കുമ്പോൾ പിന്തുടരേണ്ട ശരിയായ ക്രമം അറിഞ്ഞിരിക്കണം.

ആദ്യം ചെയ്യേണ്ടത്

ബാത്ത്റൂമിലെ സാധനങ്ങൾ പുറത്തെടുക്കുക

വൃത്തിയാക്കൽ ആരംഭിക്കുന്നതിന് മുമ്പ് ബാത്ത്റൂമിലുള്ള ഷാംപൂ ബോട്ടിലുകൾ, സോപ്പ്, ബക്കറ്റ്, മഗ്, ബ്രഷ്, ക്ലീനിങ് സാധനങ്ങൾ തുടങ്ങിയവ കഴിയുന്നത്ര പുറത്തെടുക്കുക. ഇവയ്ക്കടിയിൽ പൊടിയും സോപ്പ് അവശിഷ്ടങ്ങളും അടിഞ്ഞുകൂടിയിട്ടുണ്ടാകാം. സാധനങ്ങൾ അവിടെത്തന്നെ വച്ചുകൊണ്ട് വൃത്തിയാക്കിയാൽ പല ഭാഗങ്ങളിലും അഴുക്ക് അവശേഷിക്കും.

മുടിയും വലിയ അഴുക്കും നീക്കം ചെയ്യുക

അടുത്തതായി ഫ്ലോറിലും ഡ്രെയിനിന് സമീപവും അടിഞ്ഞുകൂടിയിരിക്കുന്ന മുടി, ടിഷ്യൂ, പേപ്പർ കഷണങ്ങൾ, മറ്റ് വലിയ അഴുക്കുകൾ എന്നിവ നീക്കം ചെയ്യുക. ഇത് ചെയ്യാതെ നേരിട്ട് വെള്ളം ഒഴിച്ചാൽ മുടിയും അഴുക്കും ഡ്രെയിനിലേക്ക് പോകുകയും ഡ്രെയിൻ ബ്ലോക്ക് ആകാനുള്ള സാധ്യത വർധിക്കുകയും ചെയ്യും.

ജനൽ, വെന്റിലേഷൻ എന്നിവ തുറക്കുക

ക്ലീനിങ് തുടങ്ങുന്നതിന് മുമ്പ് ജനലുകളും എക്സോസ്റ്റ് ഫാനും ഉണ്ടെങ്കിൽ അതും ഉപയോഗിക്കുക. ഇതിലൂടെ ഈർപ്പം കുറയ്ക്കാനും ക്ലീനിങ് ഉൽപ്പന്നങ്ങളുടെ മണം പുറത്തേക്ക് പോകാനും സഹായിക്കും. ക്ലീനിങ് ഉൽപ്പന്നങ്ങൾ ഉപയോഗിക്കുമ്പോൾ വായുസഞ്ചാരം ഉറപ്പാക്കണം.

ഇനി മുകളിൽ നിന്ന് താഴേക്ക് വൃത്തിയാക്കാം

ബാത്ത്റൂം വൃത്തിയാക്കുമ്പോൾ ഏറ്റവും പ്രധാനപ്പെട്ട നിയമമാണ് "മുകളിൽ നിന്ന് താഴേക്ക്" എന്നത്. കാരണം മുകളിലെ ഭാഗങ്ങൾ വൃത്തിയാക്കുമ്പോൾ പൊടിയും വെള്ളവും അഴുക്കും താഴേക്ക് വീഴും. ആദ്യം ഫ്ലോർ വൃത്തിയാക്കിയ ശേഷം മുകളിലെ ഭാഗങ്ങൾ വൃത്തിയാക്കിയാൽ ഫ്ലോർ വീണ്ടും വൃത്തികേടാകും.

ജനൽ, കണ്ണാടി, ഷെൽഫുകൾ എന്നിവ വൃത്തിയാക്കുക

• ജനൽ ഫ്രെയിം

• വെന്റിലേഷൻ ഭാഗം

• ഷെൽഫുകൾ

• ചുമരിലെ ടൈലുകൾ

• കണ്ണാടി എന്നിവ വൃത്തിയാക്കുക.

കണ്ണാടി വൃത്തിയാക്കുമ്പോൾ അധികം വെള്ളം ഉപയോഗിക്കേണ്ടതില്ല. ഗ്ലാസ് ക്ലീനറും മൈക്രോഫൈബർ തുണിയും ഉപയോഗിച്ച് തുടയ്ക്കാം.

ചുമരിലെ ടൈലുകൾ വൃത്തിയാക്കുക

ടൈലുകളിൽ സോപ്പ് പാടുകളും വെള്ളത്തിലെ ധാതുക്കളുടെ അവശിഷ്ടങ്ങളും അടിഞ്ഞുകൂടാൻ സാധ്യതയുണ്ട്. ക്ലീനർ ഉപയോഗിക്കുന്നതിന് മുമ്പ് ഉൽപ്പന്നത്തിന്റെ ലേബലിലെ നിർദേശങ്ങൾ വായിക്കുക. പ്രത്യേകിച്ച് ബ്ലീച്ചും ആസിഡ് അടങ്ങിയ ക്ലീനറുകളും ഒരിക്കലും തമ്മിൽ കലർത്തരുത്. അപകടകരമായ വാതകങ്ങൾ ഉണ്ടാകാൻ സാധ്യതയുണ്ട്. ടൈലുകൾ വൃത്തിയാക്കിയ ശേഷം അവശിഷ്ടങ്ങൾ വെള്ളം ഉപയോഗിച്ച് നന്നായി കഴുകി നീക്കം ചെയ്യുക.

വാഷ്‌ബേസിൻ വൃത്തിയാക്കുക

അടുത്തതായി വാഷ്‌ബേസിൻ വൃത്തിയാക്കാം. അതിന് ആദ്യം, സോപ്പ് അവശിഷ്ടങ്ങൾ നീക്കം ചെയ്യുക, ബേസിനിലെ അഴുക്ക് കഴുകിക്കളയുക, ടാപ്പും അതിന്റെ ചുറ്റുമുള്ള ഭാഗങ്ങളും വൃത്തിയാക്കുക, ഡ്രെയിൻ ഭാഗം പരിശോധിക്കുക, വാഷ്‌ബേസിന്റെ അരികുകളിലും ടാപ്പിന്റെ അടിഭാഗത്തും വെള്ളവും സോപ്പും അടിഞ്ഞുകൂടി പാടുകൾ ഉണ്ടാകാറുണ്ട്. അതിനാൽ ഈ ഭാഗങ്ങൾ പ്രത്യേകം ശ്രദ്ധിക്കുക.

ഷവർ ഏരിയ വൃത്തിയാക്കുക

ഷവർ ഉപയോഗിക്കുന്ന ഭാഗത്ത് സോപ്പ്, ഷാംപൂ, ശരീരത്തിലെ എണ്ണ എന്നിവയുടെ അവശിഷ്ടങ്ങൾ അടിഞ്ഞുകൂടാൻ സാധ്യത കൂടുതലാണ്. ചുമരിലെ ടൈലുകൾ, ഷവർ ഹെഡ്, ടാപ്പുകൾ, കോണുകൾ എന്നിവ വൃത്തിയാക്കുക. ക്ലീനർ ഉപയോഗിച്ചാൽ നിർദേശിച്ച സമയത്തേക്കാൾ കൂടുതൽ നേരം ഉപരിതലത്തിൽ വയ്ക്കരുത്. പിന്നീട് വെള്ളം ഉപയോഗിച്ച് നന്നായി കഴുകുക.

ടോയ്‌ലെറ്റ് വൃത്തിയാക്കുക

ടോയ്‌ലെറ്റ് സാധാരണയായി ബാത്ത്റൂമിലെ ഏറ്റവും കൂടുതൽ ശ്രദ്ധ ആവശ്യപ്പെടുന്ന ഭാഗമാണ്. അതിനാൽ ഇത് പ്രത്യേകമായി വൃത്തിയാക്കണം. ആദ്യം ടോയ്‌ലെറ്റിന്റെ ബൗളിന്റെ അകത്തുള്ള ഭാഗം അനുയോജ്യമായ ടോയ്‌ലെറ്റ് ക്ലീനർ ഉപയോഗിച്ച് വൃത്തിയാക്കാം. തുടർന്ന്:

• സീറ്റ്

• ലിഡ്

• ഫ്ലഷ് ബട്ടൺ

• ടോയ്‌ലെറ്റിന്റെ പുറംഭാഗം

• അടിഭാഗം

• ടോയ്‌ലെറ്റിന് ചുറ്റുമുള്ള ഫ്ലോർ എന്നിവ വൃത്തിയാക്കുക. ടോയ്‌ലെറ്റ് വൃത്തിയാക്കാൻ ഉപയോഗിക്കുന്ന ബ്രഷും തുണിയും മറ്റ് ഭാഗങ്ങളിൽ ഉപയോഗിക്കാതിരിക്കുക.

അവസാനം ഫ്ലോർ വൃത്തിയാക്കുക

ഇതാണ് ബാത്ത്റൂം ക്ലീനിങ്ങിൻ്റെ അവസാന ഘട്ടം. മുകളിൽ പറഞ്ഞ എല്ലാ ഭാഗങ്ങളും വൃത്തിയാക്കിയ ശേഷം മാത്രമേ ഫ്ലോർ വൃത്തിയാക്കാവൂ. ആദ്യം ഫ്ലോറിലുള്ള മുടിയും വലിയ അഴുക്കുകളും നീക്കം ചെയ്യുക. തുടർന്ന് അനുയോജ്യമായ ഫ്ലോർ ക്ലീനർ ഉപയോഗിച്ച് കഴുകാം.

പ്രത്യേക ശ്രദ്ധ നൽകേണ്ട ഭാഗങ്ങൾ:

• ടോയ്‌ലെറ്റിന് ചുറ്റുമുള്ള ഭാഗം

• ഡ്രെയിനിന് സമീപം

• കോണുകൾ

• വാതിലിന് സമീപം

• ബാത്ത്റൂം മാറ്റ് വയ്ക്കുന്ന ഭാഗം

ഏറ്റവും അവസാനം ഡ്രെയിൻ പരിശോധിക്കുക

ഫ്ലോർ വൃത്തിയാക്കിയ ശേഷം വെള്ളം ശരിയായി ഒഴുകുന്നുണ്ടോ എന്ന് പരിശോധിക്കുക. ഡ്രെയിനിൽ മുടിയോ മറ്റ് അഴുക്കുകളോ അടിഞ്ഞുകൂടിയിട്ടുണ്ടെങ്കിൽ അവ നീക്കം ചെയ്യുക. ഡ്രെയിൻ പതിവായി മന്ദഗതിയിൽ ഒഴുകുന്നുണ്ടെങ്കിൽ പ്രശ്നം അവഗണിക്കരുത്. ഡ്രെയിനിലേക്ക് ശക്തമായ രാസവസ്തുക്കൾ പതിവായി ഒഴിക്കുന്നത് പരിഹാരമെന്നില്ല. പ്രശ്നം തുടരുകയാണെങ്കിൽ പ്ലംബറുടെ സഹായം തേടുന്നതാണ് സുരക്ഷിതം.

ശ്രദ്ധിക്കേണ്ട കാര്യങ്ങൾ

• ക്ലീനർ ഉപയോഗിക്കുമ്പോൾ കൈയുറ ധരിക്കുക.

• ക്ലീനിങ് ഉൽപ്പന്നങ്ങൾ നേരിട്ട് ചർമ്മത്തിൽ പതിക്കുന്നത് ഒഴിവാക്കുക.

• കഴിയുമെങ്കിൽ വെള്ളം നീക്കം ചെയ്ത് ഫ്ലോർ ഉണങ്ങാൻ അനുവദിക്കുക. നല്ല വായുസഞ്ചാരം ഉറപ്പാക്കുന്നതും സഹായിക്കും.