കൊച്ചി: ഹൃദയാരോഗ്യത്തിന് വില്ലന്‍ കൊഴുപ്പാണോ പഞ്ചസാരയാണോ ? കൊഴുപ്പാണെന്നാണ്, അല്ലെങ്കില്‍ കൊഴുപ്പു മാത്രമാണെന്നാണ് പൊതുവേയുള്ള ധാരണ. ഇങ്ങനെയൊരു ധാരണ ഉറപ്പിക്കുന്നതിനു പിന്നില്‍ ഒരു ചതിയുണ്ടെന്ന് വ്യക്തമാക്കുകയാണ്, ശാസ്ത്ര ലേഖകനായ സുരേഷ് കുട്ടി.

1950കളില്‍ അമേരിക്കയില്‍ ഹൃദ്രോഗം മൂലമുള്ള മരണങ്ങള്‍ വര്‍ധിച്ച സമയത്ത് ശാസ്ത്രലോകം നടത്തിയ പഠനം അട്ടിമറിച്ചതിന്റെ കഥയാണ് സുരേഷ് കുട്ടി പറയുന്നത്. ഒരു വിഭാഗം പഞ്ചസാരയാണ് ഹൃദ്രോഗത്തിന് കാരണമെന്ന് വാദിച്ചപ്പോള്‍ മറുവിഭാഗം കൊഴുപ്പാണ് കാരണമെന്ന് വാദമുയര്‍ത്തി. ഒടുവില്‍ തര്‍ക്കം മുറുകിയപ്പോള്‍ പഞ്ചസാര വ്യവസായം നിയന്ത്രിച്ചവര്‍ ഒരു നിഗൂഢ തന്ത്രം മെനഞ്ഞു. ഹാര്‍വാര്‍ഡ് പബ്ലിക് ഹെല്‍ത്ത് സ്‌കൂളിലെ മൂന്ന് പ്രമുഖ ഗവേഷകര്‍ക്ക് അവര്‍ പണം നല്‍കി ഒരു ദൗത്യം ഏല്‍പ്പിച്ചു. ഹൃദ്രോഗത്തിന് കാരണം പഞ്ചസാരയല്ല, മറിച്ച് കൊഴുപ്പാണെന്ന് സ്ഥാപിക്കുന്ന ഒരു പഠന റിപ്പോര്‍ട്ട് തയ്യാറാക്കുക എന്നതായിരുന്നു അത്. അന്നത്തെ 6,500 ഡോളര്‍ (ഇന്നത്തെ മൂല്യം വെച്ച് നോക്കിയാല്‍ ഏകദേശം 50,000 ഡോളറിലധികം) ഇതിനായി അവര്‍ പ്രതിഫലമായി നല്‍കുകയും ചെയ്തു. പഞ്ചസാര വ്യവസായത്തിന്റെ ഈ സ്വാധീനം ഹൃദ്രോഗ പഠനങ്ങളില്‍ മാത്രം ഒതുങ്ങിനിന്നില്ല. ദന്തക്ഷയത്തെക്കുറിച്ചുള്ള ശാസ്ത്രീയ ഗവേഷണങ്ങളെയും ഇവര്‍ സമാനമായ രീതിയില്‍ വഴിതിരിച്ചുവിട്ടു.

രക്തത്തിലെ കൊളസ്‌ട്രോളിനേക്കാള്‍ ട്രൈഗ്ലിസറൈഡുകളുടെ അളവ് വര്‍ദ്ധിപ്പിക്കുന്നതില്‍ പഞ്ചസാരയ്ക്കുള്ള പങ്ക് ഇന്ന് ഗൗരവമായി ചര്‍ച്ച ചെയ്യപ്പെടുന്ന സാഹചര്യമാണുള്ളതെന്നും കൊഴുപ്പിനെ മാത്രം പ്രതിക്കൂട്ടില്‍ നിര്‍ത്തുന്ന രീതി ശാസ്ത്രലോകം തിരിച്ചറിയണമെന്നും കുറിപ്പില്‍ പറയുന്നു.

ഫെയ്‌സ്ബുക്ക് കുറിപ്പിന്റെ പൂര്‍ണരൂപം

മധുരം പൊതിഞ്ഞ ചതിയുടെ കഥ

പതിറ്റാണ്ടുകൾക്ക് മുൻപ് നമ്മുടെ ഭക്ഷണ ശീലങ്ങൾക്ക് മേൽ നടന്ന ഒരു വലിയ ഗൂഢാലോചനയുടെയും ചതിയുടെയും കഥ

ഹൃദയത്തിന് വില്ലൻ ആരാണ്? കൊഴുപ്പോ അതോ പഞ്ചസാരയോ?

1950-കളിൽ അമേരിക്കയിൽ ഹൃദ്രോഗം മൂലമുള്ള മരണങ്ങൾ വർദ്ധിച്ചപ്പോൾ ശാസ്ത്രലോകം അതിന്റെ കാരണങ്ങൾ തേടുകയായിരുന്നു. അക്കാലത്ത് പഞ്ചസാരയാണ് ഹൃദയാരോഗ്യത്തിന് വില്ലനെന്ന് ലണ്ടൻ സർവകലാശാലയിലെ ഫിസിയോളജിസ്റ്റ് ആയ ജോൺ യുഡ്കിൻ (John Yudkin) ശക്തമായി വാദിച്ചു. എന്നാൽ മറുവശത്ത്, മിനസോട്ട സർവകലാശാലയിലെ ആൻസൽ കീസ് (Ancel Keys) കുറ്റപ്പെടുത്തിയത് ഭക്ഷണത്തിലെ കൊഴുപ്പിനെയായിരുന്നു..

എന്നാൽ ഈ തർക്കത്തിൽ തങ്ങളുടെ ലാഭം സംരക്ഷിക്കാൻ പഞ്ചസാര വ്യവസായം നിയന്ത്രിച്ചവർ ഒരു നിഗൂഢ തന്ത്രം മെനഞ്ഞു. കൊഴുപ്പ് കുറഞ്ഞ ഭക്ഷണം കഴിച്ചാൽ ആളുകൾ പഞ്ചസാര കൂടുതൽ കഴിക്കുമെന്ന് മനസ്സിലാക്കിയ ഷുഗർ റിസർച്ച് ഫൗണ്ടേഷൻ (SRF) ഇതിനെ ഒരു ബിസിനസ്സ് അവസരമായി കണ്ടു

1965-ൽ പ്രൊജക്റ്റ് 226 എന്ന പേരിൽ SRF ഒരു രഹസ്യ നീക്കം നടത്തി. ഹാർവാർഡ് പബ്ലിക് ഹെൽത്ത് സ്കൂളിലെ (Harvard School of Public Health) മൂന്ന് പ്രമുഖ ഗവേഷകർക്ക് അവർ പണം നൽകി ഒരു ദൗത്യം ഏൽപ്പിച്ചു. ഹൃദ്രോഗത്തിന് കാരണം പഞ്ചസാരയല്ല, മറിച്ച് കൊഴുപ്പാണെന്ന് സ്ഥാപിക്കുന്ന ഒരു പഠന റിപ്പോർട്ട് തയ്യാറാക്കുക എന്നതായിരുന്നു അത്. അന്നത്തെ 6,500 ഡോളർ (ഇന്നത്തെ മൂല്യം വെച്ച് നോക്കിയാൽ ഏകദേശം 50,000 ഡോളറിലധികം) ഇതിനായി അവർ പ്രതിഫലമായി നൽകി.

1967-ൽ 'ന്യൂ ഇംഗ്ലണ്ട് ജേണൽ ഓഫ് മെഡിസിൻ' (NEJM) എന്ന പ്രശസ്തമായ ജേണലിൽ "Dietary Fats, Carbohydrates and Atherosclerotic Vascular Disease" എന്ന പേരിൽ ഈ പഠനം പ്രസിദ്ധീകരിച്ചു. പഞ്ചസാര ഹൃദ്രോഗത്തിന് കാരണമാകുമെന്ന ജോൺ യുഡ്കിന്റെയും മറ്റും പഠനങ്ങളെ ഈ റിപ്പോർട്ടിൽ ഗവേഷകർ നിസ്സാരമായി തള്ളിക്കളയുകയും, കൊഴുപ്പാണ് യഥാർത്ഥ വില്ലനെന്ന് സ്ഥാപിക്കുകയും ചെയ്തു.

ഏറ്റവും ഞെട്ടിക്കുന്ന കാര്യം, ഈ പഠനത്തിന് പിന്നിൽ പ്രവർത്തിച്ചവർക്ക് ഷുഗർ റിസർച്ച് ഫൗണ്ടേഷൻ പണം നൽകിയ വിവരമോ, ആ വ്യവസായ ഗ്രൂപ്പിന് ഈ പഠനത്തിന്റെ ലക്ഷ്യങ്ങൾ നിശ്ചയിക്കുന്നതിൽ പങ്കുണ്ടായിരുന്നു എന്ന വസ്തുതയോ ആ സമയത്ത് വെളിപ്പെടുത്തിയിരുന്നില്ല എന്നതാണ്.

പണം നൽകിയവരുടെ താൽപ്പര്യങ്ങൾ സംരക്ഷിക്കാൻ ശാസ്ത്രത്തെ വളച്ചൊടിച്ച ഈ നടപടി ലോകമെമ്പാടുമുള്ള ആരോഗ്യനയങ്ങളെ ദശാബ്ദങ്ങളോളം തെറ്റായ വഴിയിലൂടെ നയിച്ചു.

ഈ വലിയ ചതിയുടെ ചുരുളഴിയാൻ അൻപത് വർഷത്തോളം കാത്തിരിക്കേണ്ടി വന്നു. സാൻ ഫ്രാൻസിസ്കോയിലെ കാലിഫോർണിയ സർവകലാശാലയിലെ (UCSF) ഗവേഷകരായ ക്രിസ്റ്റിൻ കിയേൺസ് (Cristin Kearns), സ്റ്റാൻറൺ ഗ്ലാൻറ്സ് (Stanton Glantz) എന്നിവർ നടത്തിയ അസാധാരണമായ അന്വേഷണമാണ് ഈ രഹസ്യം പുറത്തെത്തിച്ചത്. ഇല്ലിനോയി സർവകലാശാലയിലെയും ഹാർവാർഡ് ലൈബ്രറിയിലെയും പഴയ ആർക്കൈവുകളിൽ നടത്തിയ തിരച്ചിലിനിടെയാണ് പഞ്ചസാര വ്യവസായ ഗ്രൂപ്പായ SRF-ന്റെ ശാസ്ത്ര ഉപദേശക സമിതിയിൽ അംഗമായിരുന്ന പ്രൊഫസർ റോജർ ആഡംസിന്റെ വ്യക്തിപരമായ കത്തിടപാടുകൾ ഇവർ കണ്ടെത്തുന്നത്.

SRF-ന്റെ ഗവേഷണ വിഭാഗം ഡയറക്ടറായിരുന്ന ജോൺ ഹിക്സൺ (John Hickson) ഗവേഷകർക്ക് അയച്ച കത്തുകളിൽ, അവർ തയ്യാറാക്കുന്ന റിപ്പോർട്ടിൽ എന്ത് വരണമെന്നും ഏതെല്ലാം പഠനങ്ങളെ എതിർക്കണമെന്നും കൃത്യമായി നിർദ്ദേശിച്ചിരുന്നു. ഈ തെളിവുകളുടെ അടിസ്ഥാനത്തിലാണ് 2016-ൽ 'ജാമ ഇൻ്റേണൽ മെഡിസിൻ' എന്ന ജേണലിലൂടെ ലോകം ഈ ചതി മനസ്സിലാക്കിയത്.

പഞ്ചസാര വ്യവസായത്തിന്റെ ഈ സ്വാധീനം ഹൃദ്രോഗ പഠനങ്ങളിൽ മാത്രം ഒതുങ്ങിനിന്നില്ല. ദന്തക്ഷയത്തെക്കുറിച്ചുള്ള (Dental Caries) ശാസ്ത്രീയ ഗവേഷണങ്ങളെയും ഇവർ സമാനമായ രീതിയിൽ വഴിതിരിച്ചുവിട്ടു. 1971-ൽ നാഷണൽ ഇൻസ്റ്റിറ്റ്യൂട്ട് ഓഫ് ഡെന്റൽ റിസർച്ചിന്റെ പദ്ധതികളെ സ്വാധീനിച്ചുകൊണ്ട്, ഭക്ഷണത്തിലെ പഞ്ചസാരയുടെ അളവ് കുറയ്ക്കുക എന്ന മാർഗ്ഗത്തിന് പകരം മറ്റ് പരീക്ഷണങ്ങളിലേക്ക് ഗവേഷകരുടെ ശ്രദ്ധ മാറ്റാൻ ഇവർക്ക് കഴിഞ്ഞു. പുകയില കമ്പനികൾ എങ്ങനെയാണോ കാൻസർ പഠനങ്ങളെ സ്വാധീനിക്കാൻ "മർച്ചന്റ്സ് ഓഫ് ഡൗട്ട്" (Merchants of Doubt) തന്ത്രം ഉപയോഗിച്ചത്, അതേ പാതയാണ് പഞ്ചസാര വ്യവസായവും പിന്തുടർന്നത്.

കൊഴുപ്പിനെ മാത്രം വില്ലനായി കണ്ടിരുന്ന പഴയ രീതിയിൽ നിന്ന് മാറി, അധികമായി ഉപയോഗിക്കുന്ന പഞ്ചസാര (Added Sugar) ഹൃദ്രോഗം, അമിതവണ്ണം, പ്രമേഹം എന്നിവയുമായി നേരിട്ട് ബന്ധപ്പെട്ടിരിക്കുന്നുവെന്ന് ആധുനിക ശാസ്ത്രം ഇന്ന് വ്യക്തമാക്കുന്നു.

രക്തത്തിലെ കൊളസ്ട്രോളിനേക്കാൾ ട്രൈഗ്ലിസറൈഡുകളുടെ അളവ് വർദ്ധിപ്പിക്കുന്നതിൽ പഞ്ചസാരയ്ക്കുള്ള പങ്ക് ഇന്ന് ഗൗരവമായി ചർച്ച ചെയ്യപ്പെടുന്നുണ്ട്. അതിനാൽ, ഭക്ഷണക്രമത്തിൽ നിന്ന് കൊഴുപ്പ് പൂർണ്ണമായും ഒഴിവാക്കുന്നതിനേക്കാൾ ഹൃദയാരോഗ്യത്തിന് പ്രധാനം പഞ്ചസാരയുടെ അമിത ഉപയോഗം നിയന്ത്രിക്കുക എന്നതാണെന്ന് ഇന്ന് ശാസ്ത്രം തിരിച്ചറിയുന്നുണ്ട്.

എങ്കിലും വലിയ അളവ് വരെ പൊതുജന വിശ്വാസം ഇന്നും കൊഴുപ്പിനെ മാത്രം പ്രതി കൂട്ടിൽ നിർത്തുന്ന രീതിയിൽ ആണ്.

പണം നൽകി സ്വാധീനിക്കപ്പെടുന്ന ഇത്തരം ഗവേഷണങ്ങൾ ശാസ്ത്രത്തിന്റെ വിശ്വാസ്യതയെ തകർക്കുന്നതിനൊപ്പം പൊതുജനാരോഗ്യത്തിന് വലിയ വെല്ലുവിളിയുമാണ് ഉയർത്തുന്നത്. അതിനാൽ, നയരൂപീകരണ വേളയിൽ വ്യവസായ സ്പോൺസർഷിപ്പുള്ള പഠനങ്ങൾക്ക് കുറഞ്ഞ മുൻഗണന നൽകണമെന്നും കൂടുതൽ സുതാര്യത ഉറപ്പാക്കണമെന്നും ശാസ്ത്രലോകം ആവശ്യപ്പെടുന്നുണ്ട്.