നിരവധി പോഷകങ്ങൾ അടങ്ങിയ ഒരു സൂപ്പർഫുഡ് ആണ് ചീര. ചീര വെച്ചുള്ള ഒരു ഫാന്‍സി റെസിപ്പിയാണ് പാലക്ക് പനീർ. ചപ്പാത്തി, പൊറോട്ട, നാന്‍ അങ്ങനെ എന്തിനൊപ്പവും കിടിലന്‍ കോമ്പിനേഷനാണ് സംഗതി. എന്നാൽ ഈ കോമ്പിനേഷൻ എത്ര ആരോ​ഗ്യകരമാല്ലെന്നാണ് വിദ​​ഗ്ധരുടെ അഭിപ്രായം.

ആരോഗ്യകരമായ ഭക്ഷണമെന്ന് പറയുമ്പോള്‍ പോഷകസമ്പുഷ്ടമായ ഭക്ഷണം കഴിക്കണം, കൃത്യസമയത്ത് കഴിക്കണം എന്നു മാത്രമല്ല, ശരിയായ കോമ്പിനേഷനുകള്‍ തെരഞ്ഞെടുക്കുകയെന്നതും പ്രധാനമാണെന്ന് സെലിബ്രിറ്റി ന്യൂട്രീഷണിസ്റ്റായ നമാമി അഗര്‍വാള്‍ പറയുന്നു.

ചില ഭക്ഷണപദാര്‍ത്ഥങ്ങള്‍ ഒന്നിച്ചു കഴിച്ചാല്‍ ഒന്നിലെ പോഷകങ്ങള്‍ മറ്റൊന്ന് തടയുമെന്നും അത്തരത്തില്‍ ഒന്നാണ് കാല്‍സ്യവും ഇരുമ്പുമെന്നും നമാമി വിശദീകരിച്ചു. പനീറില്‍ ധാരാളം കാല്‍സ്യം അടങ്ങിയിട്ടുണ്ടെങ്കില്‍ ചീരയില്‍ ഇരുമ്പ് ധാരാളമുണ്ട്.

ഒന്നിച്ചു കഴിക്കുമ്പോള്‍ പനീറിലെ കാല്‍സ്യം ചീരയിലെ ഇരുമ്പിന്‍റെ ആഗിരണം തടയും. അതുകൊണ്ട് ചീരയുടെ പോഷകങ്ങള്‍ പൂര്‍ണ്ണമായും ലഭിക്കണമെന്നുണ്ടെങ്കില്‍ ഉരുളക്കിഴങ്ങിനൊപ്പമോ ചോളത്തിനൊപ്പമോ കഴിക്കുന്നതാണ് നല്ലതെന്നും നമാമി കൂട്ടിച്ചേര്‍ത്തു.