പലരുടെയും സ്കിൻ കെയർ റൂട്ടീന്റെ സ്ഥിരം സാന്നിധ്യമാണ് റോസ് വാട്ടർ. ഇത് ചർമം ഫ്രഷ് ആയിരിക്കാൻ സഹായിക്കുന്നു. പ്രകൃതിദത്തമായതുകൊണ്ട് പൂർണമായും സുരക്ഷിതമാണെന്നാണ് പലരുടെയും ധാരണ. എന്നാൽ എല്ലാവർക്കും റോസ് വാട്ട‍ർ ഒരുപോലെ വർക്ക് ആകണമെന്നില്ല. ശരിയായ രീതിയിൽ ഉപയോഗിച്ചാൽ നിരവധി ഗുണങ്ങൾ ലഭിക്കുമെങ്കിലും ചില സാഹചര്യങ്ങളിൽ പാർശ്വഫലങ്ങളും ഉണ്ടാകാം.

എന്താണ് റോസ് വാട്ടർ?

റോസാപ്പൂവിന്റെ ഇതളുകൾ ആവിയിൽ വാറ്റിയെടുത്ത് ലഭിക്കുന്ന ദ്രാവകമാണ് റോസ് വാട്ടർ. ഇതിൽ സ്വാഭാവിക ആന്റിഓക്സിഡന്റുകളും സുഗന്ധഘടകങ്ങളും ചെറിയ അളവിൽ വിറ്റാമിനുകളും അടങ്ങിയിട്ടുണ്ട്. സൗന്ദര്യവർധക ഉൽപ്പന്നങ്ങൾ, ഭക്ഷ്യവസ്തുക്കൾ, പാനീയങ്ങൾ, ആയുർവേദ-യൂണാനി ചികിത്സ എന്നിവയിലും റോസ് വാട്ടർ ഉപയോഗിക്കാറുണ്ട്.

റോസ് വാട്ടറിന്റെ ആരോഗ്യഗുണങ്ങൾ

ചർമത്തെ ശാന്തമാക്കുന്നു

സൂര്യപ്രകാശം, പൊടി, മലിനീകരണം എന്നിവ മൂലമുണ്ടാകുന്ന ചർമത്തിലെ ചുവപ്പും ചെറിയ അസ്വസ്ഥതയും കുറയ്ക്കാൻ റോസ് വാട്ടർ സഹായിക്കും. തണുപ്പിക്കുന്ന സ്വഭാവം ചർമ്മത്തിന് ആശ്വാസം നൽകുന്നു.

ചർമത്തിലെ ഈർപ്പം നിലനിർത്തുന്നു

ചർമം വരണ്ടുപോകുന്നത് കുറയ്ക്കാനും സ്വാഭാവിക ഈർപ്പം നിലനിർത്താനും സഹായിക്കും. അതിനാൽ ഡ്രൈ സ്കിൻ ഉള്ളവർക്ക് ഇത് ഒരു മികച്ച ഫേഷ്യൽ മിസ്റ്റായി ഉപയോഗിക്കാം.

ആന്റിഓക്സിഡന്റ് ഗുണങ്ങൾ

റോസ് വാട്ടറിലെ ആന്റിഓക്സിഡന്റുകൾ ഫ്രീ റാഡിക്കലുകളുടെ ദോഷഫലങ്ങളിൽ നിന്ന് ചർമത്തെ ഒരു പരിധിവരെ സംരക്ഷിക്കാൻ സഹായിക്കുന്നു.

വീക്കം കുറയ്ക്കാൻ സഹായിക്കും

കണ്ണിന് ചുറ്റുമുള്ള ചെറിയ വീക്കവും ക്ഷീണവും കുറയ്ക്കാൻ തണുപ്പിച്ച റോസ് വാട്ടർ കോട്ടൺ പാഡിൽ നനച്ച് ഉപയോഗിക്കാറുണ്ട്.

മുഖം ഫ്രഷായി നിലനിർത്തുന്നു

ചൂടുകാലത്തും യാത്രയ്ക്കിടയിലും മുഖം ഉന്മേഷത്തോടെ നിലനിർത്താൻ ഫേസ് മിസ്റ്റായി ഉപയോഗിക്കാം.

സുഗന്ധം

റോസാപ്പൂവിന്റെ സുഗന്ധം ചിലരിൽ സമ്മർദ്ദവും ഉത്കണ്ഠയും കുറയ്ക്കാൻ സഹായിക്കുമെന്ന് ചില പഠനങ്ങൾ സൂചിപ്പിക്കുന്നു. അതുകൊണ്ടുതന്നെ അരോമാതെറാപ്പിയിലും റോസ് സുഗന്ധം ഉപയോഗിക്കാറുണ്ട്.

റോസ് വാട്ടറിന്റെ ചില ദോഷങ്ങൾ

അലർജി ഉണ്ടാകാം

എല്ലാവരുടെയും ചർമം ഒരുപോലെയല്ല. ചിലർക്ക് റോസ് വാട്ടർ ഉപയോഗിച്ചാൽ ചൊറിച്ചിൽ, ചുവപ്പ്, കുരു, കത്തുന്ന അനുഭവം എന്നിവ ഉണ്ടാകാം.

മായം കലരാം

വിപണിയിൽ ലഭിക്കുന്ന എല്ലാ റോസ് വാട്ടറുകളും ശുദ്ധമായവയല്ല. ചിലതിൽ കൃത്രിമ സുഗന്ധവും ആൽക്കഹോളും പ്രിസർവേറ്റീവുകളും ചേർത്തിട്ടുണ്ടാകാം. ഇവ സെൻസിറ്റീവ് ചർമത്തിൽ പ്രശ്നങ്ങൾ സൃഷ്ടിക്കാം.

കണ്ണിന് ദോഷം

റോസ് വാട്ടർ കണ്ണിലേക്ക് നേരിട്ട് ഒഴിക്കുന്നത് സുരക്ഷിതമല്ല. കണ്ണിൽ അസ്വസ്ഥതയോ അണുബാധയോ ഉണ്ടാകാനുള്ള സാധ്യതയുണ്ട്.

അമിത ഉപയോഗം ഒഴിവാക്കുക

ദിവസത്തിൽ പലതവണ ഉപയോഗിക്കുന്നത് ചിലരിൽ ചർമത്തിന്റെ സ്വാഭാവിക സംരക്ഷണ പാളിയെ ബാധിക്കാം. മിതമായ ഉപയോഗമാണ് ഉചിതം.

കാലാവധി ശ്രദ്ധിക്കണം

കാലാവധി കഴിഞ്ഞ റോസ് വാട്ടറിൽ ബാക്ടീരിയ വളരാൻ സാധ്യതയുണ്ട്. ഇത് ചർമപ്രശ്നങ്ങൾക്കും അണുബാധയ്ക്കും കാരണമാകാം.