കോഴിക്കോട് എട്ട് കുട്ടികൾക്കാണ് നിലവിൽ ഷി​ഗെല്ല ബാധിച്ചിരിക്കുന്നത്. ശനിയാഴ്ച രോ​ഗബാധയെ തുടർന്ന് ജില്ലയിൽ നാലു വയസ്സുകാരി മരിച്ചു. 44 പേർ വിവിധ ആശുപത്രിയിൽ ചികിത്സയിലാണെന്നും ആരോ​ഗ്യ വകുപ്പ് അറിയിച്ചു. രോഗവ്യാപനത്തെ തുടർന്ന് ഹൈറിസ്‌ക് കോണ്ടാക്ടുള്ള 12 സ്കൂളുകൾക്ക് മൂന്ന് ദിവസത്തേക്ക് സർക്കാർ അവധി പ്രഖ്യാപിച്ചു. ഇത്രയെല്ലാം കോലാഹലം ഉണ്ടാക്കുന്ന പകർച്ചവ്യാധി, ഷി​ഗെല്ല എന്ന ബാക്ടീരിയ മൂലമാണ് ഉണ്ടാകുന്നത്.

ഷി​ഗെല്ല വന്ന വഴി

ചരിത്രം നോക്കിയാൽ ലോകത്തിന്റെ വിവിധ ഭാ​ഗങ്ങളിൽ പലപ്പോഴായി ഷി​ഗെല്ല പൊതുജനാരോ​ഗ്യത്തിന് വലിയ വെല്ലുവിളിയായിട്ടുണ്ട്. ശുചിത്വത്തിന്റെ അഭാവം, മലിനമായ കുടിവെള്ളം, ജനസാന്ദ്രത എന്നിവയാണ് ഇത്തരം രോഗവ്യാപനങ്ങൾക്കുള്ള പ്രധാന കാരണങ്ങളായി വിദ​ഗ്ധർ ചൂണ്ടിക്കാണിക്കുന്നത്.

1897-ൽ ജപ്പാനിൽ പടർന്നു പിടിച്ച പകർച്ചവ്യാധിയെ കുറിച്ച് പഠിക്കുന്നതിനിടെ ബാക്ടീരിയോളജിസ്റ്റായ (Bacteriologist) കിയോഷി ഷി​ഗ ആണ് ഷിഗെല്ല ഡിസെന്റീരിയ എന്ന ബാക്ടീരിയ കണ്ടെത്തുന്നത്. അദ്ദേഹത്തിന്റെ പേരിൽ നിന്നാണ് ഷി​ഗെല്ല (Shigella) എന്ന പേര് ലഭിച്ചത്. മലിനമായ ഭക്ഷണത്തിലൂടെയോ വെള്ളത്തിലൂടെയോ പകരുന്ന ഗുരുതരമായ വയറിളക്കരോഗങ്ങളിൽ ഒന്നാണ് ഷിഗല്ലോസിസ്.

ഷി​ഗെല്ല പ‌ർന്നു പിടിച്ച കാലം!

1897-ൽ ജപ്പാനിൽ ആയിരക്കണക്കിന് ആളുകളെ ബാധിച്ച രോഗവ്യാപനമാണ് ഷി​ഗെല്ലയെ ശാസ്ത്രീയമായി തിരിച്ചറിയാൻ വഴിവെച്ചതെന്ന് ​ഗവേഷകർ പറയുന്നു. ​രോ​ഗാണുക്കളെ കണ്ടെത്തുന്നതിലും വയറിളക്കരോഗങ്ങളെക്കുറിച്ചുള്ള പഠനങ്ങളിലും ഇത് ഒരു നിർണായക വഴിത്തിരിവായി.

ലോകമഹായുദ്ധകാലത്തെ രോഗവ്യാപനം

ഒന്നാം ലോക മഹായുദ്ധ കാലത്തും രണ്ടാം ലോക മഹായുദ്ധ കാലത്തും അഭയാർഥി ക്യാമ്പുകളിലും സൈനിക ക്യാമ്പുകളിലും ശുചിത്വക്കുറവു മൂലം ഷി​ഗെല്ല വ്യാപനം റിപ്പോർട്ട് ചെയ്തിരുന്നു. യുദ്ധസാഹചര്യങ്ങളിൽ ശുചിത്വത്തിന്റെ പ്രാധാന്യം ലോകത്തിന് ബോധ്യപ്പെടുത്തിയ സംഭവങ്ങളായിരുന്നു ഇത്.

ആഫ്രിക്ക, ഏഷ്യ, ലാറ്റിൻ അമേരിക്ക എന്നിവിടങ്ങളിലെ പ്രദേശങ്ങളിൽ മലിനജലവും ശുചിത്വപ്രശ്നങ്ങളും മൂലം ഷി​ഗെല്ല രോ​ഗവ്യാപനം പതിവായി റിപ്പോർട്ട് ചെയ്യപ്പെടാറുണ്ട്. കുട്ടികളെയാണ് രോ​ഗവ്യാപനം ഏറ്റവും കൂടുതൽ ബാധിക്കുന്നതായി കണ്ടെത്തിയിട്ടുള്ളത്.

അടുത്ത കാലത്ത് ആന്റിബയോട്ടിക്കുകളെ പ്രതിരോധിക്കാൻ കഴിവുള്ള ഷി​ഗെല്ല വകഭേദങ്ങൾ വിവിധ രാജ്യങ്ങളിൽ റിപ്പോർട്ട് ചെയ്തിരുന്നു. ഇത് ചികിത്സ കൂടുതൽ സങ്കീർണമാക്കുകയും പൊതുജനാരോ​ഗ്യ രം​ഗത്ത് പുതിയ വെല്ലുവിളി ഉയർത്തുകയും ചെയ്തിട്ടുണ്ട്.

ഷി​ഗെല്ലയുടെ പ്രധാന ലക്ഷണങ്ങൾ

വയറിളക്കം, പനി, വയറുവേദന, ചിലപ്പോൾ രക്തം കലർന്ന മലവിസർജനം എന്നിവയാണ് പ്രധാന ലക്ഷണങ്ങൾ. പ്രത്യേകിച്ച് കുട്ടികൾ, പ്രായമായവർ, പ്രതിരോധശേഷി കുറഞ്ഞവർ എന്നിവരിൽ രോഗം ഗുരുതരമാകാൻ സാധ്യത കൂടുതലാണ്.

വളരെ കുറവ് ബാക്ടീരിയ സാന്നിധ്യവും അതിവേ​ഗമുള്ള രോഗവ്യാപനത്തിന് കാരണമാകും. സ്കൂൾ, ഹോസ്റ്റലുകൾ പോലുള്ള ജനസാന്ദ്രമായ മേഖലയിൽ രോ​ഗം അതിവേ​ഗം പടരാം. അഞ്ച് വയസ്സിൽ താഴെയുള്ള കുട്ടികളിലാണ് ഷിഗെല്ലോസിസ് കൂടുതലായി കാണപ്പെടുന്നത്. കടുത്ത വയറിളക്കം മൂലം നിർജലീകരണം (Dehydration) ഉണ്ടാകുകയും ചികിത്സ വൈകുന്നതോടെ രോ​ഗം വഷളാവുകയും ചെയ്യാം. മാത്രമല്ല, രോഗബാധിതരുടെ എണ്ണം കൂടുമ്പോൾ ആശുപത്രികളിലും ആരോഗ്യകേന്ദ്രങ്ങളിലും രോഗികളുടെ തിരക്ക് കൂടും. ഇത് പൊതുജനാരോഗ്യ സംവിധാനങ്ങൾക്ക് കൂടുതൽ സമ്മർദ്ദം ഉണ്ടാക്കാം.

ഷിഗെല്ല പ്രതിരോധ മാർഗങ്ങൾ

• ഭക്ഷണം കഴിക്കുന്നതിന് മുമ്പും ശുചിമുറി ഉപയോഗിച്ചതിന് ശേഷവും സോപ്പ് ഉപയോഗിച്ച് കൈ കഴുകുക.

• തിളപ്പിച്ചോ ശുദ്ധീകരിച്ചതോ ആയ വെള്ളം മാത്രം കുടിക്കുക.

• ഭക്ഷണം ശുചിത്വത്തോടെ തയ്യാറാക്കുകയും സൂക്ഷിക്കുകയും ചെയ്യുക.

• വയറിളക്കമുള്ളവർ ഭക്ഷണം തയ്യാറാക്കുന്നത് ഒഴിവാക്കുക.

• കുട്ടികളിൽ വ്യക്തിശുചിത്വ ശീലങ്ങൾ വളർത്തുക.

• രോഗലക്ഷണങ്ങൾ കണ്ടാൽ ഉടൻ ചികിത്സ തേടുക.