അധികം മെനക്കെടാതെ പൊണ്ണത്തടി കുറയ്ക്കാനുള്ള വഴിയാണോ തേടുന്നത്. എങ്കില്‍ അതിന് പറ്റിയ ഒരു സിംപിള്‍ ടെക്നിക് ആണ് പോഷകാഹാര വിദഗ്ധനായ അലന്‍ ആരഗൊണ്‍ പങ്കുവെക്കുന്നത്. വെറും രണ്ട് ഗ്ലാസ് വെള്ളം മതി ഈ ടെക്നിക് പ്രാവര്‍ത്തികമാക്കാന്‍.
ഭക്ഷണത്തിന് മുന്‍പ് രണ്ട് ഗ്ലാസ് (500-1000 മില്ലിലിറ്റര്‍) വെള്ളം കുടിക്കുന്നത് നിങ്ങളുടെ പൊണ്ണത്തടി കുറയ്ക്കാന്‍ സഹായിക്കുമെന്ന് അലന്‍ പറയുന്നു. വാട്ടര്‍ ബിഫോര്‍ മീല്‍ ട്രിക് എന്നാണ് ആ ടെക്നിക് അറിയപ്പെടുന്നത്. 12 ആഴ്ച കൊണ്ട് ഇത്തരത്തില്‍ പൊണ്ണത്തടി ഒഴിവാക്കാനാകുമെന്നാണ് പഠനങ്ങള്‍ സൂചിപ്പിക്കുന്നത്.
ശരീരത്തില്‍ ജലാംശം ഉണ്ടാകേണ്ടത് വളരെ പ്രധാനമാണ്. ഭക്ഷണത്തിന് മുന്‍പ് വെള്ളം കുടിക്കുന്നത് വിശപ്പിനെ നിയന്ത്രിക്കാനും കലോറി എടുക്കുന്നത് കുറയ്ക്കാനും സഹായിക്കും. കലോറി എടുക്കുന്നത് നിയന്ത്രിക്കുകയാണ് വാട്ടര്‍ ട്രിക് ടെക്നിക്കിലൂടെ ചെയ്യുന്നത്. ഇതിലൂടെ അമിതമായ ശരീരഭാരം നിയന്ത്രിക്കാനാകുമെന്ന് വിദഗ്ധര്‍ ചൂണ്ടിക്കാണിക്കുന്നു.
പ്രധാനമായും നാല് സ്റ്റെപ്പുകളാണ് വാട്ടര്‍ ട്രിക്കിലുള്ളത്
ഭക്ഷണം കഴിക്കുന്നതിന് ഏതാണ്ട് 20 മിനിറ്റ് മുന്‍പ് രണ്ട് ഗ്ലാസ് (500-1000 മില്ലിലിറ്റല്‍) കുടിക്കുക.
ഭക്ഷണം സമയമെടുത്ത് നന്നായി ചവച്ച് കഴിക്കുക. ഇതിനൊപ്പം ഇടയ്ക്ക് വെള്ളം കുടിക്കുന്നത് പെട്ടെന്ന് വയറു നിറഞ്ഞ തോന്നല്‍ ഉണ്ടാക്കാന്‍ സഹായിക്കും.
കലോറി കുറഞ്ഞ ഭക്ഷണം വേണം ആദ്യം കഴിക്കാന്‍. കൂടുതലുള്ളത് അവസാനവും.
വയറു നിറഞ്ഞതായി സംതൃപ്തി ഉണ്ടാകുന്നതിന് ഓരോ തവണ ഭക്ഷണം കഴിക്കുന്നതിനിടെയും സമയം അനുവദിക്കുക.
ഭക്ഷണത്തിനൊപ്പം വെള്ളം കുടിക്കാമോ?
ഭക്ഷണത്തിനൊപ്പം വെള്ളം കുടിക്കരുത് എന്നത് വെറും ഒരു മിത്ത് മാത്രമാണ്. ഇതിന് ശാസ്ത്രിയ തെളിവുകളൊന്നും ഇതുവരെ ലഭിച്ചിട്ടില്ല. ഭക്ഷണത്തിനൊപ്പം വെള്ളം കുടിക്കുമ്പോള്‍ ദഹന എന്‍സൈമുകള്‍ നേര്‍ത്തതാകുകയും ദഹനം കൃത്യമായി നടക്കില്ലെന്നുമാണ് വാദം. എന്നാല്‍ വെള്ളം ദഹനം മെച്ചപ്പെടുത്താനും കലോറി എടുക്കുന്നത് കുറയ്ക്കാനും സഹായിക്കുമെന്ന് വിദഗ്ധര്‍ പറയുന്നു.
വാട്ടര്‍-ബിഫോര്‍- മീല്‍ ട്രിക് ഗുണങ്ങള്‍
ഭക്ഷണത്തിന് മുന്‍പ് വെള്ളം കുടിക്കുന്നത് ശരീരഭാരം നിയന്ത്രിക്കുമെന്ന് മുന്‍ പഠനങ്ങള്‍ തെളിയിച്ചിട്ടുള്ളതാണ്. വെള്ളം കലോറി രഹിതമാണ്. ഇത് വയറ് നിറഞ്ഞ തോന്നല്‍ ഉണ്ടാക്കും. കൂടാതെ വെള്ളം ദഹനത്തെയും ശരീരത്തിന്‍റെ പ്രവര്‍ത്തനങ്ങള്‍ക്കും ഇന്ധനമാകുന്നു.
ചില സന്ദര്‍ഭങ്ങളില്‍ ദാഹത്തെ വിശപ്പായി തെറ്റിദ്ധരിക്കാറുണ്ട്. ഭക്ഷണത്തിന് മുന്‍പ് വെള്ളം കുടിക്കുന്നത് വിശപ്പും നിര്‍ജ്ജലീകരണം തമ്മില്‍ തിരിച്ചറിയാന്‍ സഹായിക്കും.
എന്നാല്‍ ഭക്ഷണത്തിന് മുന്‍പ് വെള്ളം കുടിക്കുന്നതു കൊണ്ട് മാത്രം കാര്യമില്ല. ശരിയായ ജീവിതശൈലി കൂടി പിന്തുടരുമ്പോഴാണ് ഈ ടെക്നിക് പ്രാവര്‍ത്തികമാവുകയെന്നും വിദഗ്ധര്‍ പറയുന്നു. പ്രായമായവര്‍ ഇത് പിന്തുടരുന്നത് ശ്രദ്ധിക്കണം. വെള്ളം ധാരാളം കുടിക്കുന്നത് പ്രായമായവരില്‍ വിശപ്പ് കുറയ്ക്കുകയും ഇത് പോഷകമില്ലായ്മയിലേക്ക് നയിക്കുകയും ചെയ്യുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates