വയറു വേദന, ക്ഷീണം, ഛര്‍ദ്ദി, അസ്വസ്ഥത എന്നിങ്ങനെ ഒരുപാട് കാരണങ്ങള്‍ കാരണം ആവര്‍ത്ത ദിനങ്ങള്‍ പല സ്ത്രീകള്‍ക്കും ആശങ്കയുടെ നാളുകള്‍ കൂടിയാണ്. ശാരീരിക ബുദ്ധിമുട്ടുകള്‍ക്കു പുറമേ മാനസിക അസ്വസ്ഥതകളും ഈ സമയം പിടിമുറുക്കും. എന്നാൽ ശരീരത്തിലുണ്ടാകുന്ന പല ഘട്ടങ്ങളും പരിശോധിച്ച് കൃത്യ സമയങ്ങളിൽ പല തരം വിത്തുകൾ ഡയറ്റിൽ ഉൾപ്പെടുത്തുന്നത് ഹോർമോൺ സന്തുലനം നിലനിർത്താൻ സഹായിക്കും.

എന്താണ് സീഡ് സൈക്ലിങ്

ഹോർമോണുകളെ സന്തുലിതമാക്കാൻ സഹായിക്കുന്ന ഒരു പ്രകൃതിദത്ത രീതിയാണ് സീഡ് സൈക്ലിങ്. പ്രത്യേകിച്ച് ക്രമരഹിതമായ ആർത്തവമോ പിസിഒഎസ് പോലുള്ള അവസ്ഥകളോ ഉള്ള സ്ത്രീകൾക്ക്. നാരുകളാലും വിറ്റാമിനാലും പ്രോട്ടീനുകളാലും സമ്പന്നമാണ് വിത്തുകൾ. ഓരോ വിത്തുകള്‍ക്കും ഓരോ ഗുണങ്ങളാണ്. അവയ്ക്ക് സ്ത്രീകളുടെ ആര്‍ത്തവ ചക്രത്തിന്റെ വിവിധ ഘട്ടങ്ങളില്‍ ഹോര്‍മോണിനെ നിയന്ത്രിക്കാനാകും.

ഫോളികുലാർ ഘട്ടം (ഓവുലേഷന് മുമ്പ്, സൈക്കിളിന്റെ ആദ്യ പകുതി) (1-14 ദിവസങ്ങള്‍)

കഴിക്കേണ്ട വിത്തുകൾ: ഫ്ലാക്സ് വിത്തുകൾ, മത്തങ്ങയുടെ വിത്തുകൾ

ഈ ഘട്ടങ്ങളിൽ ഈസ്ട്രജൻ, പ്രോജസ്റ്ററോൺ ഹോർമോണുകളുടെ അളവു കുറയും. ഫ്ലാക്സ് സീഡുകളിൽ അധിക ഈസ്ട്രജനെ ഉൽപാദിപ്പിക്കാൻ സഹായിക്കുന്ന ലിഗ്നാനുകൾ അടങ്ങിയിട്ടുണ്ട്. ഒമേഗ-3 ഫാറ്റി ആസിഡുകളാൽ സമ്പുഷ്ടമാണ് ഫ്ലാക്സ് വിത്തുകള്‍, ലുട്ടെൽ ഘട്ടം ദീർഘിപ്പിക്കാനും, അണ്ഡോത്പാദനം മെച്ചപ്പെടുത്താനും, പിഎംഎസ് ലക്ഷണങ്ങൾ കുറയ്ക്കാനും ഇത് സഹായിച്ചേക്കാം.

കൂടാതെ മത്തങ്ങ വിത്തുകളിൽ സിങ്ക് ധാരാളമായി അടങ്ങിയിട്ടുണ്ട്, ഇത് പ്രോജസ്റ്ററോൺ ഉൽപാദനത്തെ പിന്തുണയ്ക്കുകയും മലബന്ധം ഒഴിവാക്കാൻ സഹായിക്കുകയും ചെയ്യുന്നു. ഫൈറ്റോ ഈസ്ട്രജൻ മത്തങ്ങ വിത്തുകളില്‍ ധാരാളം അടങ്ങിയിട്ടുണ്ട്. ഇത് ഹോർമോൺ ഉത്പാദനം സന്തുലിതമാക്കാനും പ്രത്യുൽപാദന ആരോഗ്യത്തെ പിന്തുണയ്ക്കാനും സഹായിക്കുന്നു.

ല്യൂട്ടൽ ഘട്ടങ്ങൾ (ഓവുലേഷനു ശേഷമുള്ള ചക്രത്തിന്റെ രണ്ടാം പകുതി) (15-28 ദിവസങ്ങൾ)

കഴിക്കേണ്ട വിത്തുകൾ: എള്ള്, സൂര്യകാന്തി വിത്തുകൾ

ഈ ഘട്ടത്തിൽ സ്ത്രീ ഹോർമോണുകൾ വീണ്ടും ഉയരുന്നു. സൂര്യകാന്തി വിത്തുകളിൽ സെലിനിയം, വിറ്റാമിന്‍ ഇ എന്നിവ ധാരാളം അടങ്ങിയിട്ടുണ്ട്. ഇത് കരളിൻ്റെ പ്രവർത്തനത്തെയും ഹോർമോൺ ഡിടോക്സിഫിക്കേഷനെയും പിന്തുണയ്ക്കുന്നു. കൂടാതെ എള്ളിൽ ലിഗ്നാനുകളും ഹോർമോൺ ബാലൻസ് പിന്തുണയ്ക്കുന്ന അവശ്യ ഫാറ്റി ആസിഡുകളും അടങ്ങിയിട്ടുണ്ട്.

സീഡ് സൈക്ലിങ് രീതി ഹോര്‍മോണ്‍ സന്തുലിതമാക്കുമെന്നതില്‍ ശക്തമായ ശാസ്ത്രികയ തെളിവുകള്‍ ലഭിച്ചിട്ടില്ലെങ്കിലും വിത്തുകളുടെ ആരോഗ്യഗുണങ്ങള്‍ അവഗണിക്കാനാകില്ലെന്ന് വിദഗ്ദര്‍ പറയുന്നു. ക്രമരഹിതമായ ആര്‍ത്തവങ്ങള്‍ പിസിഒഎസ് പോലുള്ള അവസ്ഥകളുള്ള സ്ത്രീകളില്‍ സീഡ് സൈക്ലിങ് പ്രയോജനം ചെയ്യാറുണ്ടെന്ന് വിദഗ്ധര്‍ ചൂണ്ടിക്കാണിക്കുന്നു.

തയ്യാറാക്കുന്ന രീതിയിലുമുണ്ട് കാര്യം

ഉപഭോഗം പോലെ തന്നെ ഭക്ഷണത്തിന്‍റെ തയ്യാറെടുപ്പും പ്രധാനമാണ്. വിത്തകള്‍ പൊടിക്കുന്നത് പോഷകങ്ങൾ കൂടുതൽ എളുപ്പത്തിൽ ലഭ്യമാകുന്നതിനും ശരീരത്തിന് ആഗിരണം ചെയ്യാനും എളുപ്പമാക്കുന്നു. ഭക്ഷണത്തിന്റെ ശരിയായ തയ്യാറാക്കൽ അതിന്റെ രോഗശാന്തി ഗുണങ്ങൾ വെളിപ്പെടുത്തുന്നതിന് പ്രധാനമാണെന്ന് ആയുർവേദത്തിൽ പറയുന്നു.

വിത്തുകള്‍ ചമ്മന്തിയിലും സലാഡുകളിലും സ്മൂത്തികളിലും പൊടിച്ചു ചേര്‍ക്കാവുന്നതാണ്.

നര മറയ്ക്കാന്‍ മെഹന്തി പുരട്ടാറുണ്ടോ? ​ഗുരുതര പാർശ്വഫലങ്ങൾ

സ്ഥിരത

ആരോഗ്യഗുണങ്ങള്‍ ലഭ്യമാകുന്നതിന് ഒരു നിശ്ചിത സമയപരിധിയില്ല. ഹോർമോൺ ബാലൻസ് സങ്കീർണ്ണമാണ്. ശരീരം പൊരുത്തപ്പെടാൻ സമയമെടുത്തേക്കാം. വളരെ വേഗത്തില്‍ ഫലം കിട്ടുമെന്ന് പ്രതീക്ഷിക്കരുത്. മൂന്ന് പൂർണ്ണ സൈക്കിളുകളെങ്കിലും തുടര്‍ച്ചയായി സീഡ് സൈക്ലിങ് പരിശീലിക്കുന്നതിലൂടെയാണ് വ്യത്യാസങ്ങള്‍ കണ്ടു തുടങ്ങുക.

ഹോര്‍മോണ്‍ സന്തുലിതമാകുന്നതോടെ ആര്‍ത്തവ അസ്വസ്ഥകള്‍ മാറുമെന്ന് മാത്രമല്ല, ചര്‍മം തളിയാനും ആരോഗ്യം വീണ്ടെടുക്കാനും സീഡ് സൈക്ലിങ് പ്രയോജനപ്രദമാണ്.