പൊണ്ണത്തടിയുള്ളവര്‍ക്ക് ആസ്ത്മ ഉണ്ടായേക്കാമെന്നായിരുന്നു പഴമക്കാര്‍ പറഞ്ഞിരുന്നതെങ്കില്‍, ആസ്ത്മയുള്ളവര്‍ക്ക് പൊണ്ണത്തടിക്ക് സാധ്യത കൂടുതലുണ്ടെന്നാണ് പുതിയ പഠനം തെളിയിച്ചിരിക്കുന്നത്.  പ്രായപൂര്‍ത്തിയായ ശേഷം ആസ്ത്മ പിടിപെട്ടവരിലും അലര്‍ജി മൂലം അല്ലാത്ത ആസ്ത്മ ഉള്ളവരിലുമാണ് പൊണ്ണത്തടിക്ക് സാധ്യതയുണ്ടെന്ന് കണ്ടെത്തിയത്.  അമിതവണ്ണവും ആസ്ത്മയും പരസ്പരം ബന്ധപ്പെട്ട് കിടക്കുന്നുവെന്ന കണ്ടെത്തല്‍ കൂടുതല്‍ പഠനങ്ങള്‍ ആവശ്യപ്പെടുന്നുണ്ടെന്നും റിസര്‍ച്ചര്‍മാരുടെ സംഘം വിലയിരുത്തി. 

 20 വര്‍ഷം നീണ്ട നിരീക്ഷണത്തിനും പഠനത്തിനുമൊടുവിലാണ് ഈ റിപ്പോര്‍ട്ട് പ്രസിദ്ധീകരിച്ചിരിക്കുന്നത്. ആസ്ത്മ ഉണ്ടായിരുന്നവരെ പത്ത് വര്‍ഷത്തിന് ശേഷം നിരീക്ഷിച്ചപ്പോള്‍ പത്ത് ശതമാനത്തിലധികം പേര്‍ക്ക് അമിതവണ്ണം റിപ്പോര്‍ട്ട് ചെയ്തു. ആസ്ത്മ ഇല്ലാത്തവരില്‍ ഇത് ഏഴ് ശതമാനത്തിലേക്ക് ചുരുങ്ങി. 

സാധാരണയായി അലര്‍ജി ഉള്ളവരിലാണ് ആസ്ത്മ കണ്ടുവരുന്നത്. ഇതിനും പുറമേ ചെറുപ്രായത്തിലെ ചിലരില്‍ ആസ്ത്മ ഉള്ളതായും കാണാന്‍ കഴിയും. ഇത് ക്രമേണെ ഇല്ലാതാവുമ്പോള്‍ മുതിര്‍ന്ന ശേഷം ആസ്ത്മ പിടിപെടുന്നവര്‍ക്ക് ആരോഗ്യപ്രശ്‌നങ്ങള്‍ മറ്റുള്ളവരെക്കാള്‍ കൂടുതലായി കണ്ടുവരുന്നുണ്ടെന്നും വൈദ്യസംഘം വിലയിരുത്തി.