കൊറോണ വന്നപ്പോള്‍ മലയാളികളുടെ മറ്റു രോഗങ്ങളൊക്കെ എവിടെപ്പോയി? പലരും ചോദിക്കുന്നുണ്ട്, ഈ ചോദ്യം. ശരിയാണ്. ആശുപത്രികളില്‍ തിരക്ക് നന്നേ കുറഞ്ഞിട്ടുണ്ട്. ഇനി വാട്ട്‌സ് ആപ്പ് ഫോര്‍വേഡുകളില്‍ പറയുന്ന പോലെ നമ്മുടെ രോഗമൊന്നും ശരിക്കും രോഗം അല്ലായിരുന്നോ? രോഗമെന്നു പറഞ്ഞ് ഡോക്ടര്‍മാരും ആശുപത്രികളും നമ്മളെ പറ്റിക്കുകയായിരുന്നോ? ഡോക്ടര്‍മാരുടെ കൂട്ടായ്മയായ ഇന്‍ഫോ ക്ലിനിക് ഈ ചോദ്യങ്ങള്‍ക്കു നല്‍കുന്ന ഉത്തരം നോക്കൂ. ഇന്‍ഫോക്ലിനിക്കിന്റെ ഫെയ്‌സ്ബുക്ക് പേജില്‍ പങ്കുവച്ച ഈ കുറിപ്പ് ഡോ. മനോജ് വെള്ളനാട് എഴുതിയതാണ്.

''മലയാളിയ്ക്കിപ്പോ രോഗമൊന്നുമില്ലേ? ആശുപത്രികളിലെങ്ങും ആരുമില്ലല്ലോ. ഇത്രയും ദിവസങ്ങളായിട്ട് ടെസ്റ്റുകൾ നടത്താത്തതുകൊണ്ടും ഡോക്റ്ററെ കാണാത്തതുകൊണ്ടും ആർക്കും ഒരു പ്രശ്നവുമില്ല. ഹാർട്ടറ്റാക്കുകളും ഇല്ല. ആൻജിയോപ്ലാസ്റ്റിയും ബൈപാസും ചെയ്യാത്തതുകൊണ്ട് ആരും മരിക്കുന്നുമില്ല. അപ്പൊ എല്ലാം നമ്മുടെ തോന്നൽ മാത്രമായിരുന്നില്ലേ…?''