ലക്‌നൗ: ഉത്തര്‍പ്രദേശിലെ വിവിധ ജില്ലകളില്‍ ബുധനാഴ്ചയുണ്ടായ കൊടുങ്കാറ്റിലും കനത്ത മഴയിലും മിന്നലിലും വന്‍ നാശനഷ്ടമാണുണ്ടായത്. ദുരന്തത്തില്‍ സംസ്ഥാനത്ത് 89ലധികം മരണങ്ങളാണ് റിപ്പോര്‍ട്ട് ചെയ്തിരിക്കുന്നത്. നിരവധി പേര്‍ക്ക് പരിക്കേറ്റിട്ടുണ്ട്. ഇപ്പോള്‍ ബറേലിയില്‍ നിന്നുള്ള ഞെട്ടിക്കുന്ന ദൃശ്യങ്ങളാണ് വൈറലായിരിക്കുന്നത്. ബറേലി ജില്ലയിലെ ഭാമോറ പൊലീസ് സ്റ്റേഷന്‍ പരിധിയിലുള്ള ബാമിയാന ഗ്രാമത്തിലാണ് സംഭവം.

ശക്തമായ കൊടുങ്കാറ്റില്‍ മേല്‍ക്കൂരയ്‌ക്കൊപ്പം ഒരാള്‍ പറന്നുപോകുന്നതിന്റെ വിഡിയോ വൈറലാകുകയാണ്. മേല്‍ക്കൂരയ്‌ക്കൊപ്പം പറന്നുപോയ ഈ വ്യക്തി ഏകദേശം 50 അടി ഉയരത്തില്‍ നിന്ന് താഴേയ്ക്ക് വീഴുന്നതിന്റെ ദൃശ്യങ്ങളും വിഡിയോയിലുണ്ട്. ശക്തമായ കാറ്റ് അടിച്ചപ്പോള്‍ ഒരു കയര്‍ പിടിച്ചിരിക്കുകയായിരുന്നു ഇയാള്‍. കാറ്റില്‍ മേല്‍ക്കൂരക്കൊപ്പം ഈ വ്യക്തിയും പറന്നുപോകുകയായിരുന്നു. കാറ്റില്‍ പറന്നുപോയി നിലത്തു വീണ നാന്‍ഹെ മിയാന് സാരമായി പരിക്കേറ്റു. ഇയാളുടെ കൈകക്കും കാലിനും ഒടിവുണ്ടായിട്ടുണ്ട്.