മഞ്ഞുകാലമാണ് ബീറ്റ്‌റൂട്ടിന്റെ സീസണ്‍. പൊട്ടാസ്യം, മഗ്നീഷ്യം, ഫൈബര്‍, ഫോസ്ഫറസ്, ഇരുമ്പ്, വിറ്റാമിന്‍ എ, ബി, സി, ഫോളിക് ആസിഡ് തുടങ്ങിയ പോഷകങ്ങള്‍ അടങ്ങിയ ബീറ്റ്‌റൂട്ട് ദിവസവും ഡയറ്റില്‍ ഉള്‍പ്പെടുത്തുന്നത് ആരോഗ്യത്തിന് നല്ലതാണ്. എന്നാല്‍ അതിനായി കടയില്‍ നിന്ന് വാങ്ങേണ്ടതില്ല. ഈ തണുപ്പുകാലത്ത് ബീറ്റ്‌റൂട്ട് നമ്മള്‍ക്ക് വീട്ടില്‍ തന്നെ കൃഷി ചെയ്‌തെടുക്കാവുന്നതാണ്. രണ്ട് മാസത്തിനുള്ളില്‍ വിളവെടുപ്പും നടത്താം.

ബീറ്റ്‌റൂട്ട് കൃഷിയില്‍ ശ്രദ്ധിക്കേണ്ട കാര്യങ്ങള്‍

• സൂര്യപ്രകാശവും വെള്ളം നന്നായി വാര്‍ന്നുപോകുന്നതുമായ മണ്ണുള്ള ഒരിടം വേണം ബീറ്റ്റൂട്ട് കൃഷിക്കായി തിരഞ്ഞെടുക്കാന്‍.

• നിലം 10 ഇഞ്ച് ആഴത്തില്‍ കിളച്ചതിന് ശേഷം വിത്തുകള്‍ അര ഇഞ്ച് അകലത്തില്‍ നടുക. കൂടാതെ വരികള്‍ തമ്മില്‍ 12-18 ഇഞ്ച് അകലം പാലിക്കണം.

• ചെടികള്‍ വളര്‍ന്നു തുടങ്ങുമ്പോള്‍ 2-4 ഇഞ്ച് അകലം വരുന്ന രീതിയില്‍ മാറ്റിനടുക.

• ചെടിയുടെ വേരുകള്‍ക്ക് ആവശ്യമായ പോഷണം ലഭിക്കുന്നുണ്ടെന്ന് ഉറപ്പാക്കണം. അതിനായി എയറേഷന്‍ ട്യൂബുകള്‍ സ്ഥാപിക്കുന്നത് നല്ലതാണ്.

• ചെടികള്‍ പൂര്‍ണമായി വളരാന്‍ ഏകദേശം 50-60 ദിവസങ്ങള്‍ എടുക്കും. അതിന് ശേഷം വിളവെടുത്ത് തുടങ്ങാം.

ബീറ്റ്‌റൂട്ട് വീട്ടിനുള്ളില്‍ വളര്‍ത്താം

• വീടിനുള്ളില്‍ മോഡുലാര്‍ ട്രേകളില്‍ ബീറ്റ്‌റൂട്ട് വിത്തുകള്‍ നടാവുന്നതാണ്.

• ഓരോ ട്രേയിലും ഒരു വിത്ത് വെച്ച് ഏകദേശം ഒരിഞ്ച് ആഴത്തില്‍ നടുക.

• വിത്തുകള്‍ മുളയ്ക്കുമ്പോള്‍ നന്നായി വളരുന്ന തൈകളില്‍ ശ്രദ്ധ കേന്ദ്രീകരിക്കുന്നതിനായി ദുര്‍ബലമായ തൈകള്‍ നീക്കം ചെയ്യുക. (ചെറിയ ബീറ്റ്‌റൂട്ടുകള്‍ മതിയെങ്കില്‍ അവയെ നിലനിര്‍ത്താം.)

• ഏകദേശം രണ്ടിഞ്ച് നീളമാകുമ്പോള്‍ ചെടികള്‍ പുറത്തേക്ക് എടുത്ത് നടണം. ചെടി നില്‍ക്കുന്ന മണ്ണ് മുഴുവനായി എടുത്ത് തൈ നടുന്നതാണ് നല്ലത്.

• തുടക്കത്തില്‍ ചെടിക്ക് പതിവായി വെള്ളം നനക്കണം. പിന്നീട് വെള്ളം കുറച്ച് മതിയാകും. ചെടി നന്നായി വളരുന്നില്ലെങ്കില്‍ വളങ്ങള്‍ നല്‍കുകയും കളകള്‍ നീക്കം ചെയ്യുകയും ചെയ്യുക.

• ബീറ്റ്‌റൂട്ട് ആവശ്യമായ വലുപ്പത്തില്‍ വളര്‍ന്നു കഴിഞ്ഞാല്‍ വിളവെടുപ്പ് നടത്താം. പച്ചയായോ പാചകം ചെയ്‌തോ ബീറ്റ്‌റൂട്ട് കഴിക്കാവുന്നതാണ്.