50MP കാമറ, 6,500mAh ബാറ്ററി; വിവോ വി70 സീരീസ് ലോഞ്ച് ഈ മാസം

മുംബൈ: പ്രമുഖ സ്മാർട്ട്‌ഫോൺ നിർമ്മാതാക്കളായ വിവോയുടെ വി70, വി70 എലൈറ്റ് എന്നിവ ഉടൻ ഇന്ത്യയിൽ പുറത്തിറങ്ങുമെന്ന് പ്രതീക്ഷിക്കുന്നു. മിഡ്-പ്രീമിയം സെഗ്മെന്റിൽ മത്സരം കടുപ്പിച്ച് വിവോ ഇറക്കുന്ന ഈ ഫോണുകൾ ഈ മാസം ഇന്ത്യൻ വിപണിയിൽ അവതരിപ്പിച്ചേക്കും. ഇന്ത്യയിൽ, വിവോ വി70 സീരീസിന്റെ വില ഏകദേശം 55,000 രൂപയായിരിക്കാം.

സ്റ്റാൻഡേർഡ് വിവോ വി70 മോഡൽ പാഷൻ റെഡ്, ലെമൺ യെല്ലോ കളർ ഓപ്ഷനുകളിൽ ലഭ്യമായേക്കാം. അതേസമയം, വിവോ വി70 എലൈറ്റ് അതേ നിറങ്ങളിൽ ഒരു അധിക ബ്ലാക്ക് വേരിയന്റിനൊപ്പം വരുമെന്ന് പ്രതീക്ഷിക്കുന്നു. രണ്ട് സ്മാർട്ട്ഫോണുകൾക്കും ഏതാണ്ട് സമാനമായ രൂപകൽപ്പന ഉണ്ടായിരിക്കുമെന്ന് പ്രതീക്ഷിക്കുന്നു. ഫോണുകളിൽ ട്രിപ്പിൾ റിയർ കാമറ സജ്ജീകരണവും സെൽഫികൾക്കായി മുൻവശത്ത് ഒരു പഞ്ച്-ഹോൾ കാമറ ഡിസൈനും ഉണ്ടായിരിക്കാം.

രണ്ട് മോഡലുകളിലും 6.59 ഇഞ്ച് FHD+ AMOLED ഡിസ്പ്ലേ ഉണ്ടായിരിക്കാം. വിവോ വി70 സീരീസിന് ക്വാൽകോം ചിപ്സെറ്റ് കരുത്തുപകരും. ഒരു മോഡലിൽ സ്നാപ്ഡ്രാഗൺ 8s ജെൻ 3 പ്രോസസർ ഉണ്ടായിരിക്കാം. എലൈറ്റ് വേരിയന്റിൽ സ്നാപ്ഡ്രാഗൺ 7 ജെൻ 4 ചിപ്സെറ്റ് വാഗ്ദാനം ചെയ്യുമെന്നും കരുതുന്നു. ഒപ്റ്റിക്സിന്റെ കാര്യത്തിൽ, രണ്ട് ഫോണുകളിലും 50MP പ്രൈമറി റിയർ കാമറ ഉണ്ടായിരിക്കുമെന്ന് പ്രതീക്ഷിക്കുന്നു. ഇതോടൊപ്പം 8MP അൾട്രാ-വൈഡ് കാമറയും 50MP ടെലിഫോട്ടോ ലെൻസും ഉൾപ്പെട്ടേക്കാം. സെൽഫികൾക്കും വീഡിയോ കോളുകൾക്കുമായി, രണ്ട് മോഡലുകളിലും 50MP ഫ്രണ്ട് കാമറയും പ്രതീക്ഷിക്കുന്നു. സ്റ്റാൻഡേർഡ് വിവോ വി70 മോഡലിന് 6,320mAh ബാറ്ററി ഉണ്ടായിരിക്കാം. എലൈറ്റിന് അൽപ്പം വലിയ 6,500mAh ബാറ്ററി ഉണ്ടാകാനും സാധ്യതയുണ്ട്.