വീട്ടിലെ ഫ്രിഡ്ജിന് പിന്നിൽ പതുങ്ങിയിരുന്ന് കൂറ്റൻ പെരുമ്പാമ്പ്. വീട്ടുകാരിൽ ഭയം ജനിപ്പിച്ച പെരുമ്പാമ്പിനെ ഒടുവിൽ മൃ​ഗസംരക്ഷണ പ്രവർത്തകരെത്തി പിടികൂടി. 

തായ്‌ലൻഡിലെ യുഡോൺ താനി പ്രവിശ്യയിലാണ് സംഭവം. വീട്ടുടമയായ വോറാപോട്ട് ടോർസൻലിലാണ് പാമ്പിനെ ആദ്യം കണ്ടത്. ഉടൻതന്നെ ഇദ്ദേഹം മൃഗസംരക്ഷണ പ്രവർത്തകരെ വിവരമറിയിക്കുകയായിരുന്നു. 13 അടിയോളം നീളമുള്ള കൂറ്റൻ പെരുമ്പാമ്പാണ് ഫ്രിഡ്ജിനു പിന്നിൽ ചുരുണ്ടു കിടന്നത്. 

തായ്‌ലൻഡിൽ ഇപ്പോൾ തണുത്ത കാലാവസ്ഥയാണ്. അതുകൊണ്ടുതന്നെ ചൂടു തേടിയാകാം പെരുമ്പാമ്പ് അടുക്കളയിലെ ഫ്രിഡ്ജിനു പിന്നിൽ പതുങ്ങിയതെന്നാണ് നിഗമനം. പിടികൂടിയ പാമ്പിനെ പിന്നീട് വനത്തിൽ കൊണ്ടുപോയി തുറന്നുവിട്ടു.