ഒരു തക്കാളിയെങ്കിലും ഉപയോഗിക്കാത്ത ദിവസങ്ങള് നമ്മുടെ അടുക്കളകളില് കുറവായിരിക്കും. അതുകൊണ്ടുതന്നെ തക്കാളിയുടെ ഇപ്പോഴത്തെ വിലക്കയറ്റം എല്ലാ വീടുകളെയും ബാധിക്കുമെന്നുറപ്പ്. 60 രൂപ വിലയുണ്ടായിരുന്ന തക്കാളിയാണ് ഒറ്റ ദിവസം കൊണ്ട് 120 രൂപയ്ക്ക് മുകളില് ഉയര്ന്നത്. ഇനിയും വില കൂടുമെന്ന സൂചനയാണ് വിപണിയില് നിന്ന് ലഭിക്കുന്നത്. അതുകൊണ്ടുതന്നെ, അടുക്കളയിലെ സൂപ്പര്സ്റ്റാറുകളെല്ലാം കുറച്ച് ബുദ്ധി ഉപയോഗിക്കാന് സമയമായി. തക്കാളിവില അനിയന്ത്രിതമായി കുതിക്കുമ്പോള് പോക്കറ്റ് കാലിയാകാതിരിക്കാന് ചില വിദ്യകള് അറിഞ്ഞിരിക്കാം...
കാഴ്ച്ചയിലും രുചിയിലും തക്കാളിക്ക് പകരം വയ്ക്കാം ഇവ
ചുവന്ന കാപ്സിക്കം - തക്കാളിക്ക് പകരം ചുവന്ന കാപ്സിക്കം ഉപയോഗിക്കാം. സാന്ഡ്വിച്ച്, സലാഡ് എന്നിവയില് തക്കാളിക്ക് പകരമായി ഉപയോഗിക്കാവുന്ന ഒന്നാണിത്. തക്കാളിക്ക് സമാനമായ നിറവും ഘടനയുമാണ് കാപ്സിക്കത്തിനെന്നത് പാചകത്തിന് അനുകൂലമാകും. കൂടുതല് മനോഹരമാക്കണമെങ്കില് കാപ്സിക്കം പേസ്റ്റ് ആയി ഉപയോഗിക്കാം. പഞ്ചസാര, നാരങ്ങാനീര്, ഉപ്പ് എന്നിവയും ചുവന്ന കാപ്സിക്കത്തിന്റെ പ്യൂരിയും ചേര്ത്ത് തയ്യാറാക്കുന്ന പേസ്റ്റ് ഉപയോഗിച്ച് പാചകം ചെയ്താല് സംഗതി കലക്കും.
വിനാഗിരി - ചിക്കന്കറിയിലടക്കം തക്കാളിക്ക് പകരമായി പലരും വിനാഗിരി ഉപയോഗിക്കാറുണ്ട്. കറികള്ക്ക് പുളിരസം നല്കാന് വിനാഗിരി ബെസ്റ്റാണ്. വിനാഗിരി ഉപയോഗിക്കുന്നത് ദഹനത്തിനും നല്ലതാണ്.
പുളി - തക്കാളിയുടെ സ്വീറ്റ്-ടാങ്കി ഫ്ളേവറുമായി ഏറ്റവും ചേര്ന്നുനില്ക്കുന്ന ഒന്നാണ് പുളി. അതുകൊണ്ട് പരിപ്പുകറിയിലടക്കം തക്കാളിയെ പുളി വച്ച് പകരംവയ്ക്കാം.
തൈര് - തക്കാളി അരച്ച് തയ്യാറാക്കുന്ന ഇന്ത്യന് പാചകത്തില് മികച്ച സബ്സ്റ്റിറ്റിയൂട്ടാണ് തൈര്. ഇത് കറിക്ക് ആവശ്യത്തിന് കൊഴുപ്പും പുളിരസവും സമ്മാനിക്കും. അതുകൊണ്ട് തൈര് ഉപയോഗിച്ച് തക്കാളിയുടെ അമിത ചിലവ് നിയന്ത്രിച്ചുപിടിക്കാം. തൈര് ചേര്ക്കുമ്പോള് എപ്പോഴും പാചകത്തിന്റെ അവസാന ഘട്ടത്തില് വേണം ചേര്ക്കാന് എന്ന് മറക്കരുത്.
മത്തങ്ങ - പലര്ക്കും അത്ര താത്പര്യമില്ലാത്ത ഒന്നായിരിക്കും മത്തങ്ങ. പക്ഷെ, തക്കാളിക്ക് പകരം ഉപയോഗിക്കാവുന്ന ഏറ്റവും വിലകുറഞ്ഞ ഓപ്ഷനാണ് മത്തങ്ങ. വില നോക്കിയാല് തക്കാളിയുടെ പകുതി പോലും മത്തങ്ങയ്ക്ക് വരില്ല. പ്യൂരി രൂപത്തിലേക്കി കറികളില് ചേര്ത്താല് മധുരവും കൊഴുപ്പും കിട്ടും.
കെച്ചപ്പ് - ചില വിഭവങ്ങള് ചിന്തിക്കുമ്പോള് കെച്ചപ്പ് അത്ര നല്ല ഓപ്ഷനായി തോന്നില്ലെങ്കിലും ചില പ്രത്യേക പാചകവിധികളില് തക്കാളിയെ നല്ലരീതിയില് സബ്സ്റ്റിറ്റിയൂട്ട് ചെയ്യാന് ഇതിനാകും. ചെറിയ മധുരം വേണ്ട വിഭവങ്ങളില് കെച്ചപ്പ് പരീക്ഷിക്കാവുന്നതാണ്.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates