പെട്ടെന്ന് ഒരു ബ്രേക്ക്ഫാസ്റ്റ് അല്ലെങ്കിൽ ഡിന്നറോ സ്നാക്ക്സോ റെഡിയാക്കാൻ ​ആട്ടയും മൈദയും എപ്പോഴും വീട്ടിൽ സ്റ്റോക്ക് വെയ്ക്കുന്നവരാണ് ഏറെയും. എന്നാൽ ശരിയായ രീതിയിൽ സൂക്ഷിച്ചില്ലെങ്കിൽ ഇവ കേടുവാരാനുള്ള സാധ്യതയും കൂടുതലാണ്.

ഈർപ്പമുള്ള കാലാവസ്ഥയാണെങ്കിൽ മാവ് പെട്ടെന്ന് കട്ടപിടിക്കാനും പ്രാണികൾ കയറിക്കൂടാനും സാധ്യതയുണ്ട്. വലിയ അളവിൽ മാവ് വാങ്ങി സൂക്ഷിക്കുന്നവർക്കാണ് ഈ ബുദ്ധിമുട്ട് പലപ്പോഴും നേരിടുന്നത്. മാവിന്റെ ഫ്രഷ്നസ് നഷ്ടപ്പെടുന്നത് ഭക്ഷണത്തിന്റെ രുചിയും ​ഗുണവും ഒരുപോലെ നഷ്ടമാകാൻ കാരണമാകുന്നു.

ആട്ടയും മൈദയും വീട്ടിൽ സൂക്ഷിക്കുമ്പോൾ

• ഇത്തരം മാവ് സൂക്ഷിച്ചുവയ്ക്കാൻ ഏറ്റവും നല്ലത് വായു കടക്കാത്ത എയർടൈറ്റ് ആയ പാത്രങ്ങളാണ്. സ്റ്റീൽ പാത്രങ്ങളിലോ ചില്ലു ഭരണിയിലോ വായു കടക്കാത്ത തരത്തിൽ ഇവ സൂക്ഷിക്കാവുന്നതാണ്. ഇത് വായുവിലെ ഈർപ്പം മാവിൽ തട്ടുന്നത് തടയുന്നു.

• അതുപോലെ, നേരിട്ട് വെയിൽ തട്ടിന്ന സ്ഥലത്തോ അടുപ്പിന് സമീപമോ മാവ് സൂക്ഷിക്കരുത്. പകരം തണുപ്പും ഉണങ്ങിയതുമായ സ്ഥലത്ത് വെയ്ക്കാം. അമിതമായ ചൂട് ആട്ടയും മൈദയും പെട്ടെന്ന് കേടുവരാൻ കാരണമാകും.

• മാവിൽ പ്രാണികൾ കയറുന്നത് തടയാൻ മാവ് സൂക്ഷിക്കുന്ന പാത്രത്തിൽ ഒന്നോ രണ്ടോ വറ്റൽ മുളക് ഇട്ടു വെയ്ക്കുന്നത് നല്ലതാണ്. ഇവയുടെ രൂക്ഷ ​ഗന്ധം പ്രാണികളെ അകറ്റിനിർത്താൻ സഹായിക്കും. അതുപോലെ മാവിൽ നേരിയ തോതിൽ ഉപ്പ് ചേർത്ത് വയ്ക്കുന്നതും പ്രാണികളെ അകറ്റിനിർത്താൻ സഹായിക്കും.

• ബിരിയാണിയുടെ രുചി കൂട്ടാൻ ഉപയോ​ഗിക്കുന്ന വയനയില ആട്ട അല്ലെങ്കിൽ മൈദ സൂക്ഷിക്കുന്ന പാത്രിത്തിൽ വയ്ക്കുന്നത് പ്രാണികളെ അകറ്റി നിർത്താൻ സഹായിക്കും. വയനയിലയുടെ രൂക്ഷഗന്ധം പ്രാണികൾക്ക് അസഹനീയമാണ്.

• പാത്രത്തിൽ നിന്ന് മാവ് എടുക്കുമ്പോൾ ഉണങ്ങിയ സ്പൂൺ ഉപയോഗിക്കാൻ ശ്രദ്ധിക്കുക. നനഞ്ഞ സ്പൂണോ ഉപയോഗിക്കുന്നത് മാവിൽ പൂപ്പൽ ബാധിക്കാൻ കാരണമാകും.