വീട്ടിലെ എലി ശല്യം കൊണ്ട് പൊറുതിമുട്ടുന്ന നിരവധി ആളുകളുണ്ട്. എത്ര ശ്രദ്ധിച്ചാലും അവ വീട്ടിൽ കയറിപ്പറ്റും. ഇലക്ട്രിക് വയറുകളും തുണികളും ഭക്ഷണസാധനങ്ങളും അവ കരണ്ട് നശിപ്പിക്കും. എലിയെ തുരത്താൻ വീട്ടിലെ വസ്തുക്കൾ കൊണ്ട് തന്നെ ചില പൊടിക്കൈകളുണ്ട്.

വെളുത്തുള്ളി

വെളുത്തുള്ളിയുടെ മണം എലികളെ തുരത്താൻ സഹായിക്കും. എലികളെ തുരത്താൻ അവ കടക്കാൻ സാധ്യതയുള്ള സ്ഥലങ്ങളിൽ ചതച്ച വെളുത്തുള്ളി ഇടുന്നത് ശല്യം കുറയ്ക്കാൻ സഹായിക്കും.

മുളകുപൊടി

സുരക്ഷിതമായി ഉപയോ​ഗിച്ചാൽ മുളകുപൊടിയും എലിയെ തുരത്താൻ സഹായിക്കും. മുളകുപൊടിയുടെ മണം എലിക്ക് അസഹനീയമാണ്. എലി കയറാൻ സാധ്യതയുള്ള പ്രദേശങ്ങളിൽ മുളകുപൊടി വിതറുന്നത് നല്ലതാണ്.

കർപ്പൂരതുളസി തൈലം

എലി ശല്യം ഇല്ലാതാക്കാൻ കർപ്പൂരതുളസി തൈലം ഫലപ്രദമാണ്. കുറച്ച് പഞ്ഞിയെടുത്ത് കർപ്പൂരതൈലത്തിൽ മുക്കി ജനൽ, വാതിൽ എന്നിവയുടെ അടുത്തായി വയ്‌ക്കുന്നത് എലി കയറാതെ സഹായിക്കും.

ഗ്രാമ്പൂ

കോട്ടൻ തുണിയിൽ ഏതാനും ​ഗ്രാമ്പൂ കെട്ടി എലി വരാൻ സാധ്യതയുള്ള സ്ഥലത്ത് സൂക്ഷിക്കുന്നത് എലി കടക്കാതെ സഹായിക്കും.

കറുവപ്പട്ടയുടെ ഇല

കറുവപ്പട്ടയുടെ ഇല എലികളെ തുരത്താൻ ഫലപ്രദമാണ്. ഇവയുടെ രുചിയും മണവും എലികളെ അസ്വസ്ഥമാക്കും. എലിയുടെ ശല്യമുള്ള ഇടങ്ങളിൽ കറുവപട്ടയുടെ ഇല വിതറുക.

ഇതിനെക്കാളൊക്കെ പ്രധാനം വീടും പരിസരവും വൃത്തിയായി സൂക്ഷിക്കുക എന്നതാണ്. ഭക്ഷണാവശിഷ്ടങ്ങൾ വലിച്ചെറിയാതിരിക്കാനും പ്രത്യേകം ശ്രദ്ധിക്കണം. അതുപോലെ ഉപയോഗ ശൂന്യമായ പെട്ടികൾ, കുപ്പികൾ, പാത്രങ്ങൾ തുടങ്ങിയവ വീട്ടിൽ നിന്നും ഒഴിവാക്കുക. പഴയ പുസ്‌തകങ്ങൾ, ഗൃഹോപകരണങ്ങൾ എന്നിവ നീക്കം ചെയ്യുക.

ആവശ്യമില്ലാത്ത വസ്‌തുക്കൾ വീട്ടിലോ പരിസരത്തോ സൂക്ഷിക്കുന്നത് എലികളുടെ ശല്യം വർധിക്കാൻ ഇടയാകും. വീടിൻറെ പരിസരത്ത് പൊത്തുകൾ ഉണ്ടെങ്കിൽ മണ്ണോ കല്ലോ ഉപയോഗിച്ച് അടയ്ക്കുക. വീടിനുള്ളിലേക്ക് എലിക്ക് കടക്കാൻ പാകത്തിലുള്ള ദ്വാരങ്ങൾ ഉണ്ടെങ്കിൽ അതും അടയ്ക്കുക.