ബാസ്‌ക്കറ്റ്‌ബോള്‍ കോര്‍ട്ടിന് കുറുകെ ഗോള്‍ഫ് പന്ത് അടിച്ച് ലക്ഷ്യസ്ഥാനത്ത് എത്തിക്കണം, ഒരു പുത്തന്‍ മോഡല്‍ കാര്‍ നേടിയെടുക്കാന്‍ 84 കാരിയായ മേരി ആന്‍ വാക്ക്ഫീല്‍ഡിന് ചെയ്യേണ്ടത് ഇത്രമാത്രമായിരുന്നു. ഒടുവില്‍ 28.6 മീറ്റര്‍ താണ്ടി യാതൊരു പാകപിഴയും കൂടാതെ അത് സംഭവിച്ചു. ഗോള്‍ഫ് ബോള്‍ കൊടി നാട്ടി വച്ചിരുന്ന കുഴിയിലേക്ക് കൃത്യമായി ചെന്ന് പതിച്ചു. 

ഒലെ മിസ് മെന്‍സ് ബാസ്‌ക്കറ്റ്‌ബോള്‍ ടീമും അലബാമയും തമ്മിലുള്ള മത്സരത്തിനിടയിലായിരുന്നു ആ രസകരമായ നിമിഷം അരങ്ങേറിയത്. പ്രമോഷണ്‍ ഇവന്റിന്റെ ഭാഗമായിരുന്നു ഗെയിം. നിസാന്‍ അള്‍ട്ടിമയുടെ 2020 മോഡല്‍ കാറാണ് ഈ നേട്ടത്തിലൂടെ മേരി ആന്‍ സ്വന്തമാക്കിയത്. വിജയിയായ അവരെ അഭിനന്ദനങ്ങള്‍ കൊണ്ടും കരഘോഷങ്ങള്‍ കൊണ്ടും മൂടുകയായിരുന്നു സ്റ്റേഡിയം.