സാന്‍ ജോസ്: കടലില്‍ നിന്നും കരയിലേക്ക് കയറി വന്ന മുതലയെ യുവാവ് ടവല്‍ ഉപയോഗിച്ച് പിടിച്ചുകെട്ടുന്ന ദൃശ്യങ്ങളാണ് സോഷ്യല്‍മീഡിയയില്‍ വൈറലാകുന്നു. ഏകദേശം 8 അടിയോളം നീളമുണ്ടായിരുന്ന മുതലയെയാണ് യുവാവ് പിടികൂടിയത്.

കോസ്റ്റാ റിക്കയിലെ ഡൊമിനിക്കല്‍ ബീച്ചിലാണ് സംഭവം നടന്നത്. ബീച്ചില്‍ ഉല്ലസിക്കാനെത്തിയവരാണ് തിരകള്‍ക്കിടയിലൂടെ തീരത്തേക്ക് വരുന്ന മുതലയെ ആദ്യം കണ്ടത്. ഇവര്‍ സര്‍ഫിങ് നടത്തുന്നവര്‍ക്കും ബീച്ചിലുണ്ടായിരുന്നവര്‍ക്കും മുന്നറിയിപ്പ് നല്‍കി. എല്ലാവരോടും സുരക്ഷിതമായ പ്രദേശത്തേക്ക് മാറാന്‍ നിര്‍ദേശം നല്‍കി.

ഇതേസമയം ബീച്ചിലുണ്ടായിരുന്ന ധൈര്യശാലിയായ ഒരു യുവാവാണ് ആദ്യം മുതലയെ പിടികൂടാനിറങ്ങിയത്. തലയും വാലുമിളക്കി തീരത്തേക്ക് കയറിവന്ന മുതലയ്ക്ക് ഏകദേശം 8 അടിയോളം നീളമുണ്ടായിരുന്നു. കയ്യിലിരുന്ന ഒരു ടവല്‍ ഉപയോഗിച്ചാണ് ഇയാള്‍ മുതലയെ പിടികൂടിയത്.

മുതലയുടെ തലയിലേക്ക് ടവല്‍ എറിഞ്ഞ് അതിന്റെ ശ്രദ്ധ തിരിച്ചതിനുശേഷം വാലില്‍ പിടികൂടിയ യുവാവ് പിന്നീട് ചുറ്റും കൂടി നിന്നവരുടെ സഹായം തേടുകയായിരുന്നു. മുതലയുടെ തല ടൗവലുപയോഗിച്ച് മറച്ച ശേഷം പിന്നിലൂടെ മുതലയുടെ പുറത്തിരുന്ന് വായ അമര്‍ത്തിപ്പിടിച്ചു. മറ്റുള്ളവര്‍ ചേര്‍ന്ന് മുതലയുടെ വായ ബലമുള്ള  ചരടുപയോഗിച്ച് ബന്ധിക്കുന്നതാണ് ദൃശ്യങ്ങളിലുളളത്.