പ്രായമായ സ്ത്രീ വലിപ്പമുളള മൂര്‍ഖന്‍ പാമ്പിനെയും വലിച്ചിഴച്ചു കൊണ്ട്‌ തെരുവിലൂടെ നടന്നുപോകുന്നതിന്റെ വീഡിയോ വ്യാപകമായി പ്രചരിക്കുന്നു. സുശാന്ത നന്ദ ഐഎഫ്എസാണ് സോഷ്യല്‍മീഡിയയില്‍ വീഡിയോ പങ്കുവെച്ചത്.

പ്രായമായ സ്ത്രീ മൂര്‍ഖനെയും വലിച്ചിഴച്ചു കൊണ്ട് നടന്നു നീങ്ങുന്നതാണ് ദൃശ്യങ്ങളുടെ തുടക്കത്തില്‍. വിഷമുളള പാമ്പാണ് എന്ന ഒരു കൂസലുമില്ലാതെയാണ് സ്ത്രീയുടെ പ്രവൃത്തി. ഒരു കൈയില്‍ പാമ്പിന്റെ വാല്‍ മുറുകെപിടിച്ചാണ് സ്ത്രീ നടന്നുനീങ്ങുന്നത്. തുടര്‍ന്ന് വീടുകള്‍ ഒന്നും ഇല്ലാത്ത തുറസായ സ്ഥലത്ത് എത്തുമ്പോള്‍ പാമ്പിനെ വലിച്ചെറിയുന്നിടത്താണ് വീഡിയോ അവസാനിക്കുന്നത്.

മൂര്‍ഖന്‍ പാമ്പിനെ കൈകാര്യം ചെയ്യേണ്ട രീതി ഇങ്ങനെയല്ല എന്ന മുന്നറിയിപ്പോടെയാണ് സുശാന്ത നന്ദ വീഡിയോ പങ്കുവെച്ചിരിക്കുന്നത്. നിമിഷങ്ങള്‍ക്കകം ഏഴായിരത്തിലധികം ആളുകളാണ് വീഡിയോ കണ്ടത്.