അഹമ്മദാബാദ്: ബൈക്ക് യാത്രക്കാരെ കണ്ട് വഴി മാറി പോകുന്ന പെണ്‍ സിംഹത്തിന്റെയും കുഞ്ഞുങ്ങളുടെയും ദൃശ്യങ്ങള്‍ വൈറലാകുന്നു. മനുഷ്യനും മൃഗങ്ങളും തമ്മിലുളള സംഘര്‍ഷം വര്‍ധിച്ചുവരുന്ന കാലഘട്ടത്തിലാണ്, പെണ്‍സിംഹത്തിന്റെയും കുഞ്ഞുങ്ങളുടെയും പെരുമാറ്റം.

ഗുജറാത്തിലെ ഗിര്‍ വനത്തിലാണ് സംഭവം. ഗിര്‍ വനത്തിന് സമീപമുളള ഗ്രാമത്തിലെ  മണ്‍റോഡിലൂടെ നടന്നു പോകുകയാണ് പെണ്‍സിംഹവും രണ്ട് കുഞ്ഞുങ്ങളും. ഈസമയത്ത് തന്റെ കൃഷിയിടത്തേയ്ക്ക് ബൈക്കില്‍ വരികയായിരുന്നു ബൈക്ക് യാത്രക്കാര്‍. എതിര്‍ദിശയില്‍ നിന്ന് വരുന്ന ബൈക്ക് യാത്രക്കാരെ കണ്ട പെണ്‍സിംഹവും കുഞ്ഞുങ്ങളും വഴിമാറിപ്പോകുന്നിടത്താണ് വീഡിയോ അവസാനിക്കുന്നത്. രാജ്യസഭ അംഗമായ പരിമള്‍ നത്‌വാനിയാണ് വീഡിയോ ട്വിറ്ററില്‍ പങ്കുവെച്ചത്.