കൊളറാഡോ : മദ്യപിച്ച് ലക്കുകെട്ട് കാർ ഡ്രൈവർ ബോധരഹിതനായി പിൻസീറ്റിൽ. 15 അടിയോളം നീളമുള്ള കൂറ്റൻ പാമ്പ് ഡ്രൈവിങ് സീറ്റിൽ. കൊളറാഡോയിലാണ് സംഭവം. കാറിന്റെ ജനാലയിലൂടെ പുറത്തേക്ക് പോകാനുള്ള വഴി തേടുകയായിരുന്നു പാമ്പ്. സ്ഥലത്ത് എത്തിയ അഗ്നിശമന സേന ഉദ്യോഗസ്ഥരാണ് ഇത് ആദ്യം കാണുന്നത്.

റോഡരികിൽ പാർക്ക് ചെയ്ത കാർ കണ്ടാണ് ഉദ്യോ​ഗസ്ഥർ വാഹനത്തിന് അരികിലേക്ക് ചെന്നത്. അപ്പോഴാണ് ഞെട്ടിക്കുന്ന കാഴ്ച കണ്ടത്. ഡെൻവർ ഫയർ ഡിപ്പാർട്മെന്റ് ഇതിന്റെ ചിത്രങ്ങൾ ട്വീറ്റ് ചെയ്തു. 

കാറുടമ വളർത്തുന്ന പാമ്പാണ് ഇതെന്നാണ് റിപ്പോർട്ട്. മദ്യപിച്ച് വാഹനമോടിക്കരുത്, പ്രത്യേകിച്ച് വളർത്തുപാമ്പുകളെയും കൊണ്ട് എന്നാണ് ഉദ്യോഗസ്ഥർ ട്വീറ്റിനൊപ്പം കുറിച്ചത്. ചിത്രങ്ങൾ സമൂഹമാധ്യമങ്ങളിൽ ഇതിനകം വൈറലായിരിക്കുകയാണ്. നിരവധിപ്പേരാണ് ഇത് റീട്വീറ്റ് ചെയ്തിരിക്കുന്നത്. 

മദ്യപിച്ച് ലക്കുകെട്ട ഒരാളോടൊപ്പം കാറിൽ യാത്ര ചെയ്യുന്നത് സുരക്ഷിതമല്ലെന്നുള്ള അറിവ് ആ പാമ്പിനുണ്ടെന്നാണ് ചിലർ കുറിച്ചത്.  ആ പാമ്പിനെ രക്ഷിച്ച ഫയർഫോഴ്സ് ഉദ്യോ​ഗസ്ഥർക്ക് നന്ദിയെന്ന് മറ്റൊരാൾ പറയുന്നു. മദ്യപനായ ഡ്രൈവറുടെ പേരുവിവരം പൊലീസ് പുറത്തുവിട്ടിട്ടില്ല.