ആലപ്പുഴ: കാടുപിടിച്ചുകിടക്കുന്ന ഭൂമി, പാതിവഴിയിൽ ഉപേക്ഷിക്കപ്പെട്ട വികസനപദ്ധതികൾ, മാറിമാറിവന്ന സർക്കാരുകളുടെ പ്രഖ്യാപനങ്ങൾ... ഒടുവിൽ കേരളത്തിന്റെ സ്വപ്നപദ്ധതിയായ എയിംസിനായി പുതിയ പ്രതീക്ഷ. ആലപ്പുഴയുടെ ആരോഗ്യരംഗത്തും വികസനഭൂപടത്തിലും വലിയ മാറ്റമുണ്ടാക്കാൻ ശേഷിയുള്ള മണക്കൽ പാടശേഖരത്തിന്റെ കഥയാണിത്. ഒരു കാലത്ത് നെല്ല് വിളഞ്ഞിരുന്ന പാടശേഖരം പിന്നീട് വനവൽക്കരണത്തിന്റെ പേരിൽ സർക്കാർ ഏറ്റെടുത്ത ഭൂമിയാണ്. അതിനുശേഷം ഐടി പാർക്ക് മുതൽ വിവിധ വികസനപദ്ധതികൾ വരെ പലതും പ്രഖ്യാപിക്കപ്പെട്ടെങ്കിലും മൂന്നര പതിറ്റാണ്ട് പിന്നിട്ടിട്ടും ഈ ഭൂമിയുടെ വികസനസ്വപ്നങ്ങൾ യാഥാർഥ്യമായില്ല. ഇപ്പോൾ അതേ ഭൂമിയിലേക്ക് കേരളത്തിന്റെ ഏറ്റവും വലിയ ആരോഗ്യവികസന പദ്ധതികളിലൊന്നായ എയിംസ് എത്തുമോ എന്ന ചോദ്യമാണ് ഉയരുന്നത്.

660.9 ഏക്കർ; ഒരൊറ്റ പ്രദേശത്ത് ഇത്രയും ഭൂമി

പുറക്കാട് ഗ്രാമപഞ്ചായത്തിലെ 6, 7, 13 വാർഡുകളിലായി വ്യാപിച്ചുകിടക്കുന്ന മണക്കൽ പാടശേഖരത്തിൽ നിയമസഭയിൽ ഉന്നയിച്ച കണക്കുകൾ പ്രകാരം 660.9 ഏക്കർ ഭൂമി ലഭ്യമാണെന്നാണ് മനസിലാക്കുന്നത്. ഇതിൽ 500 ഏക്കറിലധികം ഭൂമി ഇതിനകം സർക്കാർ ഏറ്റെടുത്തിട്ടുള്ളതാണ്. ശേഷിക്കുന്ന ഭൂമി കൂടി ഏറ്റെടുക്കുന്നതിനുള്ള നടപടികൾ സ്വീകരിച്ചാൽ വലിയൊരു ഭൂവിസ്തൃതി ഒരുമിച്ച് ലഭ്യമാക്കാൻ കഴിയുമെന്നാണ് നിർദേശം. ദേശീയപാത 66-ൽനിന്ന് ഏകദേശം ഒന്നര കിലോമീറ്റർ മാത്രം അകലെയാണ് പ്രദേശം. പുറക്കാട് ജങ്ഷൻ, ഇല്ലിച്ചിറ റോഡ് തുടങ്ങിയവയിലൂടെയും സമീപത്തെ റോഡുകളിലൂടെയും ഇവിടേക്ക് എളുപ്പത്തിൽ എത്തിച്ചേരാം. ജനവാസം താരതമ്യേന കുറവായതിനാൽ വലിയ തോതിലുള്ള പുനരധിവാസം വേണ്ടിവരില്ലെന്നതും അനുകൂല ഘടകമായി ചൂണ്ടിക്കാണിക്കപ്പെടുന്നു.

1991 മുതൽ തുടങ്ങിയ കാത്തിരിപ്പ്

മണക്കൽ പാടശേഖരത്തിന്റെ കഥയ്ക്ക് മൂന്ന് പതിറ്റാണ്ടിലേറെ പഴക്കമുണ്ട്. വനമില്ലാത്ത ആലപ്പുഴ ജില്ലയിൽ വനംവച്ചുപിടിപ്പിക്കുക എന്ന ലക്ഷ്യത്തോടെയാണ് 1991-ൽ അന്നത്തെ കെ കരുണാകരൻ സർക്കാർ നെൽകൃഷി നടന്നിരുന്ന ഏകദേശം 650 ഏക്കർ ഭൂമി ഏറ്റെടുത്തത്. സ്മൃതിവനം അഥവാ വനവൽക്കരണ പദ്ധതിയായിരുന്നു ലക്ഷ്യമെങ്കിലും പ്രഖ്യാപനം നടന്ന് വർഷങ്ങൾ പിന്നിട്ടിട്ടും പദ്ധതി പ്രതീക്ഷിച്ച രീതിയിൽ മുന്നോട്ടുപോയില്ല. പിന്നീട് പലയിടത്തും പ്രദേശം കാടുപിടിച്ച നിലയിലായി. വിഎസ് അച്യുതാനന്ദൻ മുഖ്യമന്ത്രിയായിരുന്ന കാലത്ത് ഇവിടെ ഐടി പാർക്ക് സ്ഥാപിക്കാനുള്ള നീക്കമുണ്ടാവുകയും, ഇതിനായി നാലരക്കോടി രൂപ ചെലവഴിച്ച് നൂറ് ഏക്കറോളം ഭൂമി മണ്ണിട്ട് ഉയർത്തി ശിലാസ്ഥാപനം നടത്തുകയും ചെയ്തിരുന്നു. എന്നാൽ കേന്ദ്ര പരിസ്ഥിതി മന്ത്രാലയത്തിന്റെ അനുമതി ലഭിക്കാത്തത് പദ്ധതിക്ക് തടസ്സമായി. പിന്നീട് കാർഷിക ഗവേഷണ കേന്ദ്രം, ഇക്കോ ടൂറിസം തുടങ്ങിയ ആശയങ്ങളും ചർച്ചകളിൽ ഇടംപിടിച്ചെങ്കിലും വലിയൊരു വികസനപദ്ധതിയുടെ കേന്ദ്രമാകാൻ ഈ ഭൂമിക്ക് കഴിഞ്ഞിരുന്നില്ല.

എയിംസ് എന്ന സ്വപ്നത്തിലേക്ക് ആലപ്പുഴയുടെ പുതിയ നീക്കം

കേരളത്തിൽ എയിംസ് സ്ഥാപിക്കണമെന്ന ആവശ്യം വർഷങ്ങളായി നിലനിൽക്കുന്ന പശ്ചാത്തലത്തിൽ, 2026 ഒക്ടോബർ 29-ന് നിയമസഭയിൽ അമ്പലപ്പുഴ എംഎൽഎ ജി സുധാകരനാണ് മണക്കൽ പാടശേഖരത്തിൽ എയിംസ് സ്ഥാപിക്കണമെന്ന ആവശ്യം ഉന്നയിച്ചത്. 660.9 ഏക്കർ ഭൂമിയുടെ ലഭ്യതയും ദേശീയപാതയോടുള്ള സാമീപ്യവും അദ്ദേഹം ചൂണ്ടിക്കാണിച്ചു. തുടർന്ന് ആരോഗ്യവകുപ്പ് മന്ത്രി കെ മുരളീധരൻ നിർദേശം ഗൗരവമായി പരിഗണിക്കാമെന്നും, സ്ഥലത്തിന്റെ സാധ്യതകൾ പരിശോധിച്ച് വിശദമായ റിപ്പോർട്ട് സമർപ്പിക്കാൻ ജില്ലാ കളക്ടറോട് ആവശ്യപ്പെടാമെന്നും മറുപടി നൽകി. നവംബർ മൂന്നിന് ചേർന്ന ജില്ലാ വികസന സമിതി യോഗത്തിലും ഈ വിഷയം ശക്തമായി ഉയർന്നു വന്നു. കോഴിക്കോട് കിനാലൂർ, കോട്ടയം വെള്ളൂർ, കാസർകോട് പെരിയ-പനയാൽ, തൃശൂർ ചാലക്കുടി തുടങ്ങിയ വിവിധ ജില്ലകളിലെ സ്ഥലങ്ങൾക്കൊപ്പം മണക്കൽ പാടശേഖരവും പരിഗണനയ്ക്ക് വരുന്നത് ആലപ്പുഴയ്ക്ക് പുതിയ പ്രതീക്ഷയാണ് നൽകുന്നത്. എയിംസ് പോലൊരു ദേശീയ സ്ഥാപനം യാഥാർഥ്യമായാൽ അത് ആലപ്പുഴയുടെ ആരോഗ്യ-സാമൂഹിക മേഖലകളിൽ വലിയ കുതിച്ചുചാട്ടത്തിന് വഴിയൊരുക്കുമെന്നാണ് വിലയിരുത്തപ്പെടുന്നത്.