കണ്ണൂർ: കണ്ണൂർ സർവകലാശാല വിദ്യാർത്ഥി യൂണിയൻ 2026 തെരഞ്ഞെടുപ്പിൽ എംഎസ്എഫിന് ചരിത്ര നേട്ടം.നോമിനേഷൻ സൂക്ഷ്മപരിശോധനയും മറ്റു പ്രക്രിയകളും പൂർത്തിയായപ്പോൾ വയനാട് ജില്ലാ എക്സിക്യുട്ടീവ് അംഗമായി എംഎസ്എഫ് സ്ഥാനാർത്ഥി എം ഫാത്തിമ നിഹ എൻകെ എതിരില്ലാതെ തെരഞ്ഞെടുക്കപ്പെട്ടു. മാനന്തവാടി ഗവൺമെന്റ് കോളേജിൽ നിന്നും തെരഞ്ഞെടുക്കപ്പെട്ട യുയുസിയാണ് ഫാത്തിമ നിഹ. കഴിഞ്ഞ തവണ ശക്തമായ മത്സരത്തിനൊടുവിൽ നറുക്കെടുപ്പിലൂടെയാണ് എംഎസ്എഫ് പ്രതിനിധി നിഹാൽ വിജയിച്ചിരുന്നത്.

എംഎസ്എഫ് മുന്നോട്ടുവെക്കുന്ന വിദ്യാർത്ഥിപക്ഷ നിലപാടുകൾക്കും പ്രവർത്തനങ്ങൾക്കും സർവകലാശാലയിലെ വിദ്യാർത്ഥി സമൂഹം നൽകുന്ന വലിയ അംഗീകാരമാണിതെന്ന് എംഎസ്എഫ് സംസ്ഥാന വൈസ് പ്രസിഡന്റ് അനസ് എതിർത്തോട് പ്രതികരിച്ചു. വയനാട് എക്സിക്യുട്ടീവ് സീറ്റിലേക്ക് സ്ഥാനാർത്ഥിയെ നിർത്തി നോമിനേഷൻ നൽകാൻ പോലും സാധിക്കാത്തത് എസ്എഫ്ഐയുടെ രാഷ്ട്രീയ പരാജയമാണെന്ന് എംഎസ്എഫ് കണ്ണൂർ ജില്ലാ പ്രസിഡന്റ് യൂനുസ് പടന്നോട്ടും ജനറൽ സെക്രട്ടറി കെ പി റംഷാദും ആരോപിച്ചു.

വിജയാഹ്ലാദത്തിന്റെ ഭാഗമായി സംഘടിപ്പിച്ച ചടങ്ങിൽ എം.എസ്.എഫ് കാസർഗോഡ് ജില്ലാ പ്രസിഡന്റ് സൈഫുദ്ദീൻ തങ്ങൾ, വയനാട് ജില്ലാ സെക്രട്ടറി ജിൻഷാദ് മാനന്തവാടി, ജില്ലാ ഭാരവാഹികളായ അനസ് കെ.കെ, ആദിൽ എടയന്നൂർ, തസ്‌ലീം അടിപ്പാലം, കാലം ഇരിക്കൂർ, എം.കെ. സുഹൈൽ, കെ.വി. ഷാനിബ്, ഫർഹാന ടി.പി, സർവകലാശാല സെനറ്റ് അംഗം മുനവ്വർ പഴയങ്ങാടി, യൂത്ത് ലീഗ് നേതാക്കളായ ഷിനാജ് കെ.കെ, ഷജീർ ഇക്ബാൽ, ശബീർ എടയന്നൂർ, നസീർ പുറത്തിൽ തുടങ്ങിയവർ പങ്കെടുത്തു.