കണ്ണൂർ: വീട്ടിൽ ആരുമില്ലാത്ത സമയത്ത് അതിക്രമിച്ച് കയറി വീട്ടമ്മയെ പീഡിപ്പിക്കാൻ ശ്രമിച്ച യുവാവ് പൊലീസിന്റെ പിടിയിലായി. പെരിങ്ങത്തൂർ കിട്ടൻ പീടികയിലെ ലിബിനാലയത്തിൽ ബാലന്റെ മകൻ എം.കെ. ലിജിൻ ആണ് പിടിയിലായത്. ഭർത്താവ് ജോലിക്ക് പോയ സമയത്താണ് പ്രതി വീട്ടിലെത്തിയത്. താൻ ഭർത്താവിന്റെ നാട്ടുകാരനും സുഹൃത്തുമാണെന്ന് സ്വയം പരിചയപ്പെടുത്തിയാണ് ഇയാൾ വീട്ടിലേക്ക് കയറിയത്. കോലായിൽ ഇരിക്കാൻ പറഞ്ഞ വീട്ടമ്മയോട് കുടിക്കാൻ കുറച്ച് വെള്ളം ആവശ്യപ്പെട്ടു. തുടർന്ന് വെള്ളമെടുക്കാൻ അടുക്കളയിലേക്ക് പോയ യുവതിയെ പിന്നാലെ ചെന്ന് കെട്ടിപ്പിടിച്ച് ഉപദ്രവിക്കാൻ ശ്രമിക്കുകയായിരുന്നു.

യുവതി കുതറിമാറി ബഹളം വെച്ചതോടെ പ്രതി സ്ഥലത്തുനിന്ന് രക്ഷപ്പെട്ടു. മദ്യപിക്കുന്നതിനായാണ് ഇയാൾ മാഹിയിലെത്തിയത്. സംഭവം നടന്ന ഉടൻ തന്നെ മാഹി സർക്കിൾ ഇൻസ്പെക്ടർ പി.എ. അനിൽ കുമാർ, എസ്.ഐ ജയശങ്കർ എന്നിവരുടെ നേതൃത്വത്തിലുള്ള പൊലീസ് സംഘം പ്രതിയെ പിടികൂടി. ഇയാളെ മാഹി കോടതിയിൽ ഹാജരാക്കി രണ്ടാഴ്ചത്തേക്ക് റിമാൻഡ് ചെയ്തു.