ഇരിട്ടി (കണ്ണൂര്‍): മാക്കൂട്ടം ചുരം റോഡില്‍ പെരുമ്പാടിക്ക് സമീപം മിനി ലോറിയും കാറും കൂട്ടിയിടിച്ച് യുവാവിന് ദാരുണാന്ത്യം. കൊട്ടിയൂര്‍ തീര്‍ത്ഥാടനം കഴിഞ്ഞ് സുഹൃത്തുക്കള്‍ക്കൊപ്പം മടങ്ങുകയായിരുന്ന ബെംഗളൂരു എസ്ആര്‍ നഗറിലെ താമസക്കാരനായ രോഹിതാണ് (29) മരിച്ചത്. കൂടെയുണ്ടായിരുന്ന മൂന്നു പേര്‍ക്ക് പരിക്കേറ്റു. ഇവരെ വീരാജ്‌പേട്ടയിലെ ആശുപത്രിയില്‍ പ്രവേശിപ്പിച്ചു.

ബുധനാഴ്ച വൈകിട്ട് മാക്കൂട്ടം ചുരം പൊലീസ് ചെക്ക്‌പോസ്റ്റില്‍ നിന്നും ഒരു കിലോമീറ്റര്‍ അകലെയായിരുന്നു അപകടം. കുടകില്‍ ചെങ്കല്‍ ഇറക്കി തിരികെ കൂട്ടുപുഴയിലേക്ക് വരികയായിരുന്ന മിനി ലോറിയുമായി ഇവര്‍ സഞ്ചരിച്ച മാരുതി സ്വിഫ്റ്റ് കാര്‍ കൂട്ടിയിടിക്കുകയായിരുന്നു. രോഹിത് സംഭവസ്ഥലത്തു തന്നെ മരിച്ചു. മൃതദേഹം വീരാജ്‌പേട്ട ഗവ. ആശുപത്രി മോര്‍ച്ചറിയിലേക്ക് മാറ്റി.