കാസർകോട്: സാമൂഹിക-രാഷ്ട്രീയ മേഖലകളിലെ മികച്ച പ്രവർത്തനങ്ങൾ മുൻനിർത്തി ബിജെപി കാസർകോട് ജില്ലാ പ്രസിഡന്റ് എംഎൽ അശ്വിനിക്ക് ഭാരത് സേവക് സമാജിന്റെ ഭാരത് സേവക് ദേശീയ പുരസ്കാരം ലഭിച്ചു. തിരുവനന്തപുരത്തെ സദ്ഭാവന ഓഡിറ്റോറിയത്തിൽ നടന്ന ചടങ്ങിൽ സെൻട്രൽ ഭാരത് സേവക് സമാജ് ദേശീയ ചെയർമാൻ ഡോ ബിഎസ് ബാലചന്ദ്രൻ പുരസ്കാരം സമ്മാനിച്ചു.

ഒരു രാഷ്ട്രീയ പ്രവർത്തക എന്ന നിലയിലും 'അക്ഷയമിത്ര ഫൗണ്ടേഷൻ' എന്ന സന്നദ്ധ സംഘടനയുടെ ഭാരവാഹി എന്ന നിലയിലും സമൂഹത്തിന്റെ വിവിധ തലങ്ങളിൽ നടത്തിയ ശ്രദ്ധേയമായ ഇടപെടലുകളാണ് പുരസ്കാരത്തിന് അർഹയാക്കിയത്. കേന്ദ്ര സർക്കാരിന്റെ വിവിധ ജനക്ഷേമ പദ്ധതികളുടെ ആനുകൂല്യങ്ങൾ സാധാരണക്കാരിലേക്ക് എത്തിക്കുന്നതിലും, ലഹരിവസ്തുക്കൾക്കെതിരെയുള്ള ക്യാമ്പയിനുകൾ ഉൾപ്പെടെയുള്ള ജനകീയ ബോധവൽക്കരണ പ്രവർത്തനങ്ങൾ സംഘടിപ്പിക്കുന്നതിലും നടത്തിയ നേതൃപാടവവും പുരസ്കാര നിർണ്ണയത്തിൽ പരിഗണിക്കപ്പെട്ടു.