കോഴിക്കോട്: കോഴിക്കോട് കോർപ്പറേഷന്റെ ചരിത്രപ്രസിദ്ധമായ പാളയം മാർക്കറ്റ് സമുച്ചയം പൊളിച്ചുനീക്കുന്നതും വ്യാപാരികളെ പുനരധിവസിപ്പിക്കുന്നതുമായി ബന്ധപ്പെട്ട കൗൺസിൽ അജണ്ടകൾ ഭരണപക്ഷമായ എൽഡിഎഫ് താൽക്കാലികമായി മാറ്റിവെച്ചു. പ്രതിപക്ഷ കക്ഷികളായ യുഡിഎഫും ബിജെപിയും ഉയർത്താൻ സാധ്യതയുള്ള പ്രതിഷേധങ്ങളും രാഷ്ട്രീയ വിയോജിപ്പുകളും കണക്കിലെടുത്താണ് മേയർ ഒ. സദാശിവന്റെ നേതൃത്വത്തിലുള്ള കോർപ്പറേഷൻ ഭരണകൂടം വിഷയം വിശദമായ ചർച്ചയ്ക്കായി മാറ്റാൻ തീരുമാനിച്ചത്. കല്ലൂത്താൻകടവിൽ നിർമ്മിച്ച പുതിയ മാർക്കറ്റ് സമുച്ചയത്തിന്റെ നിർമ്മാണവുമായി ബന്ധപ്പെട്ട വിമർശനങ്ങളും നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജി കാലിക്കറ്റ് സമർപ്പിച്ച സാങ്കേതിക മൂല്യനിർണ്ണയ റിപ്പോർട്ടും പുറത്തുവന്നതിന് പിന്നാലെയാണ് കോർപ്പറേഷനിൽ ഈ നാടകീയ നീക്കങ്ങളുണ്ടായത്.

കെട്ടിടങ്ങൾ മനുഷ്യജീവന് ഭീഷണി; എൻഐടിയുടെ സാങ്കേതിക റിപ്പോർട്ട്

എൻഐടി കാലിക്കറ്റിലെ സിവിൽ എഞ്ചിനീയറിംഗ് വിഭാഗം നടത്തിയ വിപുലമായ സ്ഥലപരിശോധനയ്ക്ക് ശേഷമാണ് പാളയം മാർക്കറ്റിന്റെ ഘടനാപരമായ സുരക്ഷിതത്വത്തെ സംബന്ധിച്ച റിപ്പോർട്ട് സമർപ്പിച്ചത്. ആറു പതിറ്റാണ്ടിലേറെ പഴക്കമുള്ള ഈ വാണിജ്യ കേന്ദ്രം നിലവിൽ മനുഷ്യജീവന് ഭീഷണിയാണെന്നാണ് വിദഗ്ദ്ധ സംഘത്തിന്റെ കണ്ടെത്തൽ.ഭാരം താങ്ങുന്ന ചെങ്കൽ ചുവരുകളിൽ വലിയ വിള്ളലുകൾ വീണിട്ടുണ്ട്. പ്ലാസ്റ്ററിംഗ് പൂർണ്ണമായി അടർന്നുപോവുകയും കല്ലുകൾക്ക് ജീർണ്ണത സംഭവിക്കുകയും ചെയ്തിരിക്കുകയാണ്.ദീർഘകാലമായി ഈർപ്പം തട്ടിയതിനെ തുടർന്ന് മേൽക്കൂരയിലെ തടി ഘടനകൾ പൂർണ്ണമായും ദ്രവിച്ച് താഴേക്ക് തൂങ്ങിയ നിലയിലാണ്. അനുമതിയില്ലാതെ നിർമ്മിച്ച സൺഷെയ്ഡുകൾ കനത്ത മഴയിലും കാറ്റിലും ഏത് നിമിഷവും തകർന്നു വീഴാം. ബീമുകൾ, സ്ലാബുകൾ, ഹോട്ടൽ കെട്ടിടം, ഓവർഹെഡ് വാട്ടർ ടാങ്ക് എന്നിവയിലെ കോൺക്രീറ്റ് പൂർണ്ണമായും അടർന്നുമാറുകയും അതിനുള്ളിലെ ഇരുമ്പ് കമ്പികൾ കടുത്ത രീതിയിൽ തുരുമ്പെടുത്ത് പുറത്തുകാണുന്ന അവസ്ഥയിലുമാണ്.

നിലവിലെ ഇന്ത്യൻ മാനദണ്ഡങ്ങൾ അനുസരിച്ച് ഈ ചെങ്കൽ നിർമ്മിതികളെ സുരക്ഷിതമായി അറ്റകുറ്റപ്പണികൾ നടത്തി നിലനിർത്താൻ പ്രായോഗികമായ യാതൊരു എഞ്ചിനീയറിംഗ് മാർഗ്ഗങ്ങളും ഇല്ലെന്ന് എൻഐടി വ്യക്തമാക്കുന്നു. കെട്ടിടം ഭാഗികമായോ പൂർണ്ണമായോ തകരാൻ സാധ്യതയുണ്ടെന്നും അതിനാൽ അടിയന്തിരമായി മാർക്കറ്റ് അടച്ചുപൂട്ടി ഘട്ടംഘട്ടമായി പൊളിച്ചുനീക്കണമെന്നുമാണ് സാങ്കേതിക സമിതിയുടെ അന്തിമ ശുപാർശ.

കല്ലൂത്താൻകടവിലേക്ക് മാറ്റുന്നതിൽ നിയമ-സാമ്പത്തിക കുരുക്കുകൾ

മാർക്കറ്റിലെ ലൈസൻസുള്ള 152 വ്യാപാരികളെ പുതുതായി പൂർത്തിയാക്കിയ കല്ലൂത്താൻകടവ് സമുച്ചയത്തിലേക്ക് മാറ്റുന്നതിൽ കോർപ്പറേഷന് സാമ്പത്തിക, നിയമ ബാധ്യതകളുണ്ട്. കല്ലൂത്താൻകടവ് ഏരിയ ഡെവലപ്‌മെന്റ് കമ്പനിയുമായി ഒപ്പുവെച്ച കരാർ പ്രകാരം നിശ്ചിത സമയത്തിനകം വ്യാപാരികളെ പുനരധിവസിപ്പിച്ചില്ലെങ്കിൽ കോർപ്പറേഷൻ വലിയ തുക നഷ്ടപരിഹാരം നൽകേണ്ടി വരും.പഴയ മാർക്കറ്റിലെ കെട്ടിട നമ്പറുകൾ റദ്ദാക്കാനും വ്യാപാര ലൈസൻസ് പുതുക്കുന്നത് തടയാനും ധനകാര്യ സ്റ്റാൻഡിംഗ് കമ്മിറ്റി ശുപാർശ ചെയ്തിരുന്നെങ്കിലും കമ്മിറ്റിക്കുള്ളിൽ തന്നെ ഇതിനെതിരെ ശക്തമായ രാഷ്ട്രീയ വിയോജിപ്പുകൾ ഉയർന്നിട്ടുണ്ട്.

ഇക്കാര്യത്തിൽ പെട്ടെന്നുള്ള നീക്കങ്ങൾ രാഷ്ട്രീയ പ്രതിസന്ധി രൂക്ഷമാക്കുമെന്ന് കണ്ടാണ് ഭരണസമിതി പിൻവാങ്ങിയത്. 'നഗരത്തിന്റെ സുരക്ഷയെയും വ്യാപാര മേഖലയെയും ബാധിക്കുന്ന അത്യന്തം ഗൗരവമുള്ള വിഷയമാണിത്. അതിനാൽ പ്രതിപക്ഷ പാർട്ടികളുമായി വിശദമായി ചർച്ച നടത്തി അവരുടെ അഭിപ്രായങ്ങൾ കൂടി പരിഗണിച്ച ശേഷമേ അടുത്ത കൗൺസിൽ യോഗത്തിൽ ഈ അജണ്ടകൾ അവതരിപ്പിക്കുകയുള്ളൂ'— മേയർ ഒ സദാശിവൻ നിലപാട് വ്യക്തമാക്കി.