തുജേ ദേഖാ തോ യേ ജാനാ സനം... ഒരിക്കലെങ്കിലും ഈ പാട്ട് കേൾക്കാത്തവരോ മൂളാത്തവരോ വളരെ വിരളമായിരിക്കും. ഭാഷകളുടെ വേർതിരിവില്ലാതെ ഒഴുകിപ്പടർന്ന പ്രണയകാവ്യമായിരുന്നു 1995 ഒക്ടോബർ 20 ന് തിയറ്ററുകളിലെത്തിയ ദിൽവാലെ ദുൽഹനിയ ലേ ജായേംഗെ. ആദിത്യ ചോപ്രയുടെ സംവിധാനത്തിൽ പുറത്തിറങ്ങിയ ഡിഡിഎൽജെ ഇന്നും സിനിമാ പ്രേക്ഷകരുടെ ഫേവറീറ്റ് സിനിമകളുടെ ലിസ്റ്റിൽ ആദ്യ സ്ഥാനത്തു തന്നെയുണ്ടാകും.

ഷാരൂഖ് ഖാൻ- കജോൾ താരജോഡിയെ ജനപ്രിയമാക്കിയ ചിത്രമാണ് ഡിഡിഎൽജെ. ഇരുവരെയും സൂപ്പർസ്റ്റാർ പദവിയിലേക്ക് ഉയർത്തിയ ചിത്രം. ഇന്ന് ചിത്രം പുറത്തിറങ്ങിയിട്ട് 29 വർഷം പൂർത്തിയായി. ചിത്രത്തിന്റെ ഓർമ്മ നടി കജോളും പങ്കുവച്ചിട്ടുണ്ട്. രാജ് മൽഹോത്ര, സിമ്രാൻ എന്നീ കഥാപാത്രങ്ങളായാണ് ചിത്രത്തിൽ ഷാരൂഖ് ഖാനും കജോളുമെത്തിയത്.

റിലീസിന് ശേഷം ഇന്ത്യയിലും വിദേശത്തും മികച്ച കളക്ഷൻ നേടിയ ചിത്രം, ആ വർഷത്തെ മികച്ച ജനപ്രിയ ചിത്രത്തിനുള്ള ദേശീയ അവാർഡും നേടി. ഇന്ത്യയിൽ ഏറ്റവും കൂടുതൽ പ്രദർശിപ്പിച്ച ചിത്രങ്ങളിലൊന്ന് എന്ന അംഗീകാരവും ചിത്രം നേടിയിട്ടുണ്ട്. ചിത്രത്തിലെ ഗാനങ്ങളും വമ്പൻ ഹിറ്റുകളായിരുന്നു. തൊണ്ണൂറുകളിൽ കാമ്പസുകളെയും ആഘോഷവേദികളെയും ഒരുപോലെ ത്രസിപ്പിച്ച ഒരുപിടി നല്ല ഗാനങ്ങൾ ചിത്രം സമ്മാനിച്ചു.

വന്‍ പരാജയം, വിമര്‍ശകര്‍ക്ക് മറുപടി പറഞ്ഞ് കുഴഞ്ഞു: എക്‌സ് അക്കൗണ്ട് ഡിയാക്റ്റിവേറ്റ് ചെയ്ത് 'ജിഗ്ര' സംവിധായകന്‍

സഹോദരന്മാരായ ജതിൻ, ലളിത് എന്നിവരാണ് ചിത്രത്തിന്‍റെ സംഗീതമൊരുക്കിയത്. അമരീഷ് പുരി, അനുപം ഖേർ, മന്ദിര ബേദി, കരൺ ജോഹർ എന്നിവർ ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചു. സംവിധായകനെന്ന നിലയിൽ അരങ്ങേറ്റം കുറിച്ചുകൊണ്ട് ആദിത്യ ചോപ്ര ഒരുക്കിയ ഈ പ്രണയകാവ്യം അദ്ദേഹത്തിന്‍റെ സിനിമ ജീവിതത്തിലെ നാഴികക്കല്ലായി മാറി. ഇന്നും ഇന്ത്യൻ സിനിമാ പ്രേക്ഷകരുടെ മനസിൽ രാജും സിമ്രാനും മായാതെ നിൽക്കുന്നു.