പ്രേക്ഷകരുടെ മനസും കണ്ണും നിറച്ച് തിയറ്ററുകളിൽ തരം​ഗമായ ചിത്രമാണ് പൃഥ്വിരാജിനെ നായകനാക്കി ബ്ലെസി സംവിധാനം ചെയ്ത ആടുജീവിതം. ആ​ഗോളതലത്തിൽ ഇതിനോടകം ചിത്രം ബോക്സ്‌ ഓഫീസിൽ 150 കോടി കളക്ഷൻ നേടിക്കഴിഞ്ഞു. മലയാളത്തിൽ ഇതുവരെ കണ്ടിട്ടില്ലാത്തത്ര വലിയ കാൻവാസിൽ നിരവധി പ്രതിസന്ധികൾ തരണം ചെയ്താണ് ചിത്രം പൂർത്തിയായത്.

ബെന്യാമിന്റെ ആടുജീവിതം നോവലിനെ ആസ്പദമാക്കി ഒരുക്കിയ ചിത്രത്തിന്റെ ലോക്കേഷൻ തേടിയുള്ള യാത്രയെ കുറിച്ച് അണിയറപ്രവർത്തകർ പുറത്തുവിട്ട വിഡിയോ സോഷ്യൽമീഡിയയിൽ ഇപ്പോൾ ശ്രദ്ധിക്കപ്പെടുകയാണ്.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

'ഡസേർട്ട് ഡേയ്‌സ്' എന്ന പേരിൽ പുറത്തിറക്കിയ വിഡിയോ ഒരു ഡൊക്യുമെന്ററി അനുഭവമാണ് നൽകുന്നത്. വിഡിയോയിൽ ചിത്രീകരണത്തിന് പറ്റിയ ലൊക്കേഷൻ തേടിയുള്ള യാത്രാനുഭവമാണ് സംവിധായകൻ പങ്കുവെക്കുന്നത്. മരുഭൂമി തേടി രാജസ്ഥാനില്‍ നിന്ന് ആരംഭിച്ച യാത്ര ജോര്‍ദാനിലും അള്‍ജീരിയയിലുമൊക്കെയാണ് ചെന്ന് അവസാനിച്ചത്.

യാത്രകൾ റിസർച്ചിന് ഒരുപാട് സഹായിച്ചെന്നും അദ്ദേഹം പറയുന്നുണ്ട്. 13മിനിറ്റ് ദൈർഘ്യമുള്ള വിഡിയോയിൽ ചിത്രത്തിന് പിന്നിൽ എടുത്ത അധ്വാനത്തെ കുറിച്ചും വിശദീകരിക്കുന്നുണ്ട്. നേരത്തെ ലോക്ക്‌ഡൗൺ അതിജീവനം വിശദീകരിച്ച് കൊറോണ ഡേയ്‌സ്‌ എന്ന പേരിൽ ഡൊക്യുമെന്ററി അണിയറപ്രവർത്തകർ പുറത്തുവിട്ടിരുന്നു.