ആരാധകർ കാത്തിരിക്കുന്ന മോഹൻലാൽ- ലിജോ ജോസ് പെല്ലിശ്ശേരി ചിത്രം മലൈക്കോട്ടൈ വാലിബൻ റിലീസിന് ഒരുങ്ങുകയാണ്. ചിത്രത്തിലെ ആദ്യത്തെ ​ഗാനം ഇന്നലെ പുറത്തുവന്നിരുന്നു. ​ഗായിക അഭയ ഹിരൺമയിയും ശ്രീകുമാർ വാക്കിയിലും ചേർന്നാണ് ​ഗാനം ആലപിച്ചിരിക്കുന്നത്. ഇപ്പോൾ മലൈക്കോട്ടൈ വാലിബനിലെ ​ഗാനം ആലപിക്കാനായതിന്റെ സന്തോഷം പങ്കുവച്ചിരിക്കുകയാണ് അഭയ ഹിരൺമയി. 

സോഷ്യൽ മീഡിയയിൽ പങ്കുവച്ച കുറിപ്പിലൂടെയാണ് ​ഗായിക സന്തോഷം പങ്കുവച്ചത്. ‘അവിശ്വസനീയം എന്നേ പറയാനാവൂ. വലിയ മൂല്യമുള്ള നിമിഷമാണിത്. പ്രശാന്ത് പിള്ളയുടെ വലിയ ആരാധികയാണു ഞാന്‍. ഈയവസരത്തിൽ അദ്ദേഹത്തോട് അങ്ങേയറ്റം നന്ദി പറയുന്നു. മാസ്റ്റർ ക്രാഫ്റ്റ്‌സ്മാൻ ലിജോ ജോസ് പെല്ലിശ്ശേരി ഈ ഗാനം സിസ്റ്റത്തിൽ കാണിച്ചുതന്ന ആ നിമിഷം ഞാൻ എക്കാലവും സ്നേഹപൂർവം സ്മരിക്കും. മോഹൻലാൽ സാറിനും ഒരുപാട് നന്ദി. ഗുരു കാരണവന്മാർക്കും ഈ നിമിഷം ഏറ്റവും അഭിമാനത്തോടെ മകളെ കുറിച്ച് നാടുമുഴുവൻ പാടി നടക്കുന്ന അച്ഛനെ ഞാൻ ഭൂമിയിൽ ഇരുന്നു കാണുന്നുണ്ട്. ശരിക്കും ഒരുപാടൊരുപാട് മിസ് ചെയ്യുന്നു അച്ഛാ...അമ്മക്ക്,കിളിക്കു,അപ്പൂന് ,ശങ്കരന് സമർപ്പിക്കുന്നു’-എന്നാണ് അഭയ കുറിച്ചത്.  

നിരവധി പേരാണ് ​ഗായികയെ പ്രശംസിച്ചുകൊണ്ട് രം​ഗത്തെത്തിയത്. അഭയയുടെ ശബ്ദത്തിലെ പ്രണയത്തെ പ്രശംസിച്ചുകൊണ്ടാണ് റിമ കല്ലിങ്കൽ കമന്റ് ചെയ്തിരിക്കുന്നത്. ഇന്നലെയാണ് മലൈക്കോട്ടൈ വാലിബനിലെ ആദ്യ ​ഗാനം പുറത്തുവന്നത്. ‘പുന്നാര കാട്ടിലെ പൂവനത്തിൽ’ എന്നു തുടങ്ങുന്ന ഗാനം ഇതിനോടകം സോഷ്യൽ മീഡിയയിൽ വൈറലാണ്. 

ഈ വാര്‍ത്ത കൂടി വായിക്കൂ 

എന്താണ് താടി വടിക്കാത്തത്? ആരാധകര്‍ കാത്തിരുന്ന ചോദ്യത്തിന് ലാലേട്ടന്റെ മറുപടി ​

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ