കൊച്ചി: താരസംഘടനയായ 'അമ്മ'യിലെ തർക്കങ്ങളിൽ പ്രതികരിച്ച് നടൻ പൃഥ്വിരാജ്. അവർക്ക് എത്രയും പെട്ടെന്ന് ഒരു പരിഹാരം കണ്ടെത്താനും അം​ഗങ്ങളുടെ സംശയങ്ങൾക്കും ചോദ്യങ്ങൾക്കുമൊക്കെ ഉത്തരം കണ്ടെത്താൻ സാധിക്കട്ടെ എന്ന് പൃഥ്വിരാജ് പറഞ്ഞു. തന്റെ പുതിയ ചിത്രമായ 'ഐ നോബഡി'യുടെ പ്രൊമോഷന്റെ ഭാ​ഗമായി നടത്തിയ വാർത്താ സമ്മേളനത്തിൽ സംസാരിക്കുകയായിരുന്നു പൃഥ്വിരാജ്.

"എല്ലാവർക്കും അറിയാവുന്നതു പോലെ തന്നെ 'അമ്മ' സംഘടനയിലെ അം​ഗങ്ങൾക്കിടയിൽ വലിയ തർക്കങ്ങൾ ആശയപരമായിട്ടും അല്ലാതെയും സംഭവിച്ചു. അതിന് സംഘടനയ്ക്കുള്ളിൽ നിന്നുകൊണ്ട് രമ്യമായ രീതിയിൽ ഒരു പരിഹാരം കണ്ടെത്താൻ സാധിച്ചില്ല എന്നതിന്റെ പ്രതിഷേധാർഥം കുറച്ചം​ഗങ്ങൾ അവരുടെ അം​ഗത്വവും സ്ഥാനവും രാജിവച്ചു. അത് യാഥാർഥ്യമാണ്.

അപ്പോൾ ഒരു സംഘടനയ്ക്ക് എന്താണ് ചെയ്യാൻ കഴിയുക. ഒരു ജനറൽ ബോഡി വിളിച്ചുകൂട്ടി ഈ പ്രശ്നത്തിന് എന്തെങ്കിലും പരിഹാരത്തിന് സാധ്യതയുണ്ടോയെന്ന് ചർച്ച് ചെയ്ത് ഇല്ല എന്ന് അഭിപ്രായമുള്ള കുറച്ചു പേർ സംഘടനയിൽ നിന്ന് രാജിവച്ച് പുറത്തുപോയി. കുറച്ചു ആൾക്കാർ അവരുടെ സ്ഥാനങ്ങൾ രാജിവച്ചു.

ഇനി മുന്നോട്ട് എന്ത് ചെയ്യാം എന്നതിന്റെ ഭാ​ഗമായിട്ട് ഒരു താല്ക്കാലിക അഡ്ഹോക്ക് കമ്മിറ്റിയെ വച്ച് ഇതിനൊരു പരി​ഹാരം കണ്ടെത്താൻ സാധിക്കുമോ എന്ന പ്രോസസിന് തുടക്കമിട്ടു. ഇതിൽ കൂടുതൽ എന്താണ് സാധിക്കുക ?. അവർക്ക് എത്രയും പെട്ടെന്ന് ഒരു പരിഹാരം കണ്ടെത്താനും അം​ഗങ്ങളുടെ സംശയങ്ങൾക്കും ചോദ്യങ്ങൾക്കുമൊക്കെ ഉത്തരം കണ്ടെത്താൻ സാധിക്കട്ടേ എന്ന് ഒരു സിനിമാ പ്രവർത്തകനെന്ന നിലയിലും ആ സംഘടനയിലെ ഒരം​ഗമെന്ന നിലയിലും ഞാനും ആ​ഗ്രഹിക്കുന്നു. അത്രയേ പറയാൻ പറ്റൂ".- പൃഥ്വിരാജ് പറഞ്ഞു.