നടി മുത്തുമണിക്കും സംവിധായകൻ അരുണിനും ആൺ കുഞ്ഞ് പിറന്നു. 15 വർഷത്തെ കാത്തിരിപ്പിനൊടുവിലാണ് ഇരുവരുടെയും ജീവിതത്തിലേക്ക് കു‍ഞ്ഞതിഥി എത്തിയത്. കഴിഞ്ഞ ദിവസം നിറവയറുള്ള മുത്തുമണിക്കൊപ്പം നിൽക്കുന്ന ചിത്രം അരുൺ സോഷ്യൽ മീഡിയയിൽ പങ്കുവച്ചിരുന്നു. നിരവധി പേരാണ് ഇരുവർക്കും ആശംസകളുമായി എത്തിയിരിക്കുന്നത്.

2006ലാണ് അര‌ുണും മുത്തുമണിയും വിവാഹിതരായത്. അഭിഭാഷകയായി എൻറോൾ ചെയ്തതിനു ശേഷമാണ് മുത്തുമണി സിനിമയിലെത്തിയത്. സത്യൻ അന്തിക്കാടിന്റെ ‘രസതന്ത്രം’ എന്ന ചിത്രത്തിലൂടെയാണ് സിനിമയിൽ അരങ്ങേറ്റം കുറിച്ചത്.

മുത്തുമണിയും അരുണും നാടകത്തിൽ നിന്നാണ് സിനിമയിലേക്കെത്തിയത്. നെല്ലിക്ക എന്ന ചിത്രത്തിനു വേണ്ടി കഥ എഴുതിക്കൊണ്ടാണ്‌ അരുൺ സിനിമയിൽ തുടക്കമിട്ടത്‌. കഴിഞ്ഞ വർഷം പുറത്തിറങ്ങിയ ഫൈനൽ എന്ന സിനിമ സംവിധാനം ചെയ്തു. തേവര സേക്രഡ് ഹാർട്ട് കോളേജിലെ അധ്യാപകൻ കൂടിയാണ് അരുൺ.