നടിയും അവതാരകയുമായ പേളി മാണിക്കും നടൻ ശ്രീനിഷ് അരവിന്ദിനും കുഞ്ഞു പിറന്നു. ജീവിതത്തിലേക്ക് പുതിയ അതിഥി എത്തിയ സന്തോഷം ശ്രീനിഷ് ആണ് പങ്കുവച്ചത്. അമ്മയും കുഞ്ഞും സുഖമായിരിക്കുന്നെന്ന് താരം സോഷ്യൽ മീഡിയയിലൂടെ ആരാധകരെ അറിയിച്ചു. 

"ദൈവം അയച്ച സമ്മാനത്തെക്കുറിച്ച് വളരെ സന്തോഷത്തോടെ നിങ്ങളോട് പങ്കുവയ്ക്കുന്നു. പെൺകുഞ്ഞാണ്. എന്റെ വലിയ വാവയും കുഞ്ഞു വാവയും സുഖമായിരിക്കുന്നു. പ്രാർത്ഥനകൾക്കും അനു​ഗ്രഹങ്ങൾക്കും എല്ലാവർക്കും നന്ദി." ശ്രീനിഷ് കുറിച്ചു. നിരവധി താരങ്ങളും ആരാധകരും ഇരുവർക്കും ആശംസകൾ നേർന്ന് എത്തിക്കഴിഞ്ഞു. 

പ്രമുഖ റിയാലിറ്റി ഷോയായ ബി​ഗ് ബോസിലൂടെ പരിചയപ്പെട്ട് പ്രണയത്തിലാകുകയായിരുന്നു ശ്രീനിഷും പേളിയും. പേർളിഷ് എന്ന ഹാഷ്ടാ​ഗിൽ കൊണ്ടാടിയ ഇവരുടെ പ്രണയവും വിവാഹവും ആരാധകർ ആവേശത്തോടെ ആഘോഷമാക്കുകയായിരുന്നു. 2019 മെയ് 5,8 തിയ്യതികളിലായി ഹിന്ദു-ക്രിസ്ത്യൻ ആചാരപ്രകാരമായിരുന്നു വിവാഹം.