മലയാളത്തിൽ മികച്ച വിജയം നേടിയ അടി കപ്യാരെ കൂട്ടമണിയുടെ തമിഴ് റീമേക്ക് റിലീസിന് ഒരുങ്ങുന്നു. ഹോസ്റ്റൽ എന്ന് പേരിലാണ് തമിഴിൽ ചിത്രമെത്തുന്നത്. അശോക് സെൽവനാണ് ചിത്രത്തിൽ നായകനാകുന്നത്. ചിത്രത്തിന്റെ ടീസർ പുറത്തിറങ്ങി. 

ധ്യാൻ ശ്രീനിവാസൻ അവതരിപ്പിച്ച കഥാപാത്രമായാണ് അശോക് സെൽവൻ എത്തുക. നമിത പ്രമോദിന്റെ വേഷത്തിൽ പ്രിയ ഭവാനി ശങ്കർ എത്തുന്നു. സതീഷ്, നാസർ, കെപിഐ യോ​ഗി, കൃഷ് എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. മുകേഷ് അവതരിപ്പിച്ച അച്ചൻ വേഷത്തിൽ നാസർ അഭിനയിക്കുന്നു. സുമന്ത് സംവിധാനം ചെയ്യുന്ന ചിത്രം ആർ രവീന്ദ്രനാണ് നിർമിക്കുന്നത്. പ്രവീൺ കുമാർ ഛായാ​ഗ്രഹണവും ബോബോ ശശി സം​ഗീതവും നിർവഹിക്കുന്നു.

മെൻസ് ഹോസ്റ്റലിന്റെ പശ്ചാത്തലത്തിൽ ഒരുക്കിയ ഹൊറർ കോമഡി ചിത്രമാണ് അടി കപ്യാരെ കൂട്ടമണി. ധ്യാൻ ശ്രീനിവാസൻ, നമിത പ്രമോദ്, അജു വർ​ഗീസ്, നീരജ് മാധവ്, മുകേഷ് എന്നിവരാണ് ചിത്രത്തിൽ പ്രധാന കഥാപാത്രങ്ങളായി എത്തിയത്. ജോൺ വർ​ഗീസായിരുന്നു ചിത്രത്തിന്റെ സംവിധാനം. മെൻസ് ഹോസ്റ്റലിൽ ഒരു പെൺകുട്ടി കുടുങ്ങിപ്പോകുന്നതും പുറത്തേക്ക് കൊണ്ടുവരാനുള്ള ശ്രമങ്ങളുമാണ് ചിത്രത്തിൽ പറയുന്നത്.