മലബാർ കലാപത്തെക്കുറിച്ച് അലി അക്ബർ ഒരുക്കുന്ന 1921 പുഴ മുതല്‍ പുഴ വരെ എന്ന ചിത്രം അണിയറയിൽ ഒരുങ്ങുകയാണ്. ക്രൗഡ് ഫണ്ടിങ് ഉപയോ​ഗിച്ചാണ് ചിത്രം നിർമിക്കുന്നത്. ഇപ്പോൾ ചിത്രത്തിനായി വീണ്ടും സഹായം അഭ്യർത്ഥിച്ച് രം​ഗത്തെത്തിയിരിക്കുകയാണ് അലി അക്ബർ. ഇനിയും മുമ്പോട്ട് പോവാനുണ്ടെന്നും അതിനുള്ള സഹായം വേണമെന്നുമാണ് അദ്ദേഹം സോഷ്യൽ മീഡിയയിൽ കുറിച്ച്. 

‘തിരക്കിലാണ്... തീർക്കണ്ടേ നമ്മുടെ സിനിമ.. ആർക്കും മറുപടി അയക്കാൻ കഴിയുന്നില്ല, ക്ഷമിക്കണം. അതിരാവിലെ ജോലി തുടങ്ങും അർദ്ധ രാത്രിവരെ തുടരും.. ഇനിയും അല്പം മുൻപോട്ട് പോവാനുണ്ട്, അതിനുള്ള സഹായം വേണം...സഹായം അഭ്യർത്ഥിക്കുന്നതിൽ വിഷമമുണ്ട്..കൂടെ നിൽക്കണം...നന്മയുണ്ടാകട്ടെ..’ - അലി അക്ബര്‍ കുറിച്ചു. 

ചിത്രത്തില്‍ വാരിയംകുന്നത്ത് കുഞ്ഞഹമ്മദ് ഹാജിയായി എത്തുന്നത് തലൈവാസല്‍ വിജയ് ആണ്. ജോയ് മാത്യുവും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. 1921ലെ മലബാറിന്‍റെ പശ്ചാത്തലത്തില്‍ വാരിയംകുന്നത്ത് കുഞ്ഞഹമ്മദ് ഹാജിയുടെ ജീവിതം പറയുന്ന സിനിമ പൃഥ്വിരാജിനെ നായകനാക്കി ആഷിക് അബു പ്രഖ്യാപിച്ചതിനു പിന്നാലെയാണ് അലി അക്ബറും തന്‍റെ സിനിമ പ്രഖ്യാപിച്ചത്. എന്നാൽ അടുത്തിടെ വാരിയംകുന്നനിൽ നിന്ന് പൃഥ്വിരാജും ആഷിക് അബുവും പിൻവാങ്ങിയിരുന്നു.