തന്റെ വിശേഷങ്ങളെല്ലാം ആരാധകരുമായി പങ്കുവെക്കുന്ന താരമാണ് അമിതാഭ് ബച്ചന്‍. ഇപ്പോള്‍ സോഷ്യല്‍ മീഡിയയില്‍ ചര്‍ച്ചയാവുന്നത് ആരോഗ്യസ്ഥിതിയെക്കുറിച്ച് താരം പങ്കുവെച്ച ട്വീറ്റാണ്. ആരോഗ്യപ്രശ്‌നങ്ങളെത്തുടര്‍ന്ന് സര്‍ജറി നടത്തിയെന്നാണ് താരം കുറിച്ചത്. എന്നാല്‍ കൂടുതല്‍ വിവരങ്ങള്‍ ലഭ്യമായിട്ടില്ല. 

'ആരോഗ്യസ്ഥിതി... സര്‍ജറി... എഴുതാനാവില്ല'- എന്നാണ് അമിതാഭ് ബച്ചന്‍ ശനിയാഴ്ച കുറിച്ചത്. അതിന് പിന്നാലെ താരത്തിന്റെ ആരോഗ്യനിലയെക്കുറിച്ച് ആശങ്ക അറിയിച്ചുകൊണ്ട് ആരാധകര്‍ രംഗത്തെത്തി. എന്തിനു വേണ്ടിയായിരുന്നു സര്‍ജറി എന്നാണ് ആരാധകരുടെ ചോദ്യം. വേഗം ഭേദമാകട്ടെയെന്നും ആരാധകര്‍ ആശംസിക്കുന്നുണ്ട്. സിനിമ ഷൂട്ടിങ്ങുമായി ബന്ധപ്പെട്ട് അടുത്ത ദിവസം വരെ തിരക്കിലായിരുന്നു താരം. അതിനിടെ എന്താണ് സംഭവിച്ചതെന്നാണ് ആരാധകര്‍ ചോദിക്കുന്നത്. 

കഴിഞ്ഞ വര്‍ഷം ജൂലൈയില്‍ അമിതാഭ് ബച്ചന് കോവിഡ് ബാധിച്ചിരുന്നു. നീണ്ട നാളത്തെ ചികിത്സക്കൊടുവിലാണ് താരം രോഗമുക്തി നേടിയത്. അതിന് പിന്നാലെ താരം സിനിമയില്‍ സജീവമായിരുന്നു. ഇപ്പോള്‍ അജയ് ദേവ്ഗണിനൊപ്പമുള്ള ചിത്രത്തിന്റെ തിരക്കിലാണ് താരം. കഴിഞ്ഞ വര്‍ഷമാണ് അജയ് സംവിധാനം ചെയ്യുന്ന ചിത്രത്തെക്കുറിച്ച് ബിഗ് ബി പ്രഖ്യാപിച്ചത്.