ഇന്ത്യൻ സിനിമാലോകത്തു തന്നെ ഏറ്റവും മൂല്യമുള്ള സം​ഗീത സംവിധായകരിൽ ഒരാളാണ് അനിരുദ്ധ് രവിചന്ദർ. ചെറിയപ്രായത്തിൽ സം​ഗീത ലോകത്തേക്ക് ചുവടുവച്ച അനിരുദ്ധാണ് ഇന്ന് തമിഴിൽ ഇറങ്ങുന്ന ഭൂരിഭാ​ഗം സൂപ്പർതാര സിനിമകളുടേയും സം​ഗീതം ഒരുക്കുന്നത്. അദ്ദേഹത്തിന്റെ ​ഗാനങ്ങളും പാശ്ചാത്യ സം​ഗീതവുമെല്ലാം സൂപ്പർഹിറ്റുകളാണ്. എന്നാൽ ഇപ്പോൾ അനിരുദ്ധിനെതിരെ കോപ്പിയടി ആരോപണം ഉയർന്നിരിക്കുകയാണ്. 

വിജയ്- ലോകേഷ് കനകരാജ് ഒന്നിച്ച ലിയോയിലെ ഒരു ട്രാക്കിന് എതിരെയാണ് ആരോപണം. ലിയോയിലെ പശ്ചാത്തല സം​ഗീതത്തിന്‍റെ ഭാ​ഗമായി ഇം​ഗ്ലീഷ് വരികളുള്ള ചില ട്രാക്കുകള്‍ കടന്നുവരുന്നുണ്ട്. അതിലൊന്നായ ഓര്‍ഡിനറി പേഴ്സണ്‍ എന്ന ട്രാക്ക് ആണ് വിവാദമായത്. ലോകപ്രശസ്തമായ ടെലിവിഷൻ സീരീസ് ആയ പീക്കി ബ്ലൈൻഡേഴ്സിലെ സം​ഗീതമാണ് ഇത് എന്നാണ് ആരോപണം. ബെലറൂസിയന്‍ സം​ഗീത സംവിധായകനായ ഓട്നിക്ക എന്ന് അറിയപ്പെടുന്ന അലക്സേ സ്റ്റാനുലേവിച്ചും ആര്‍ടെ മിഖായേന്‍കിന്നും ചേർന്നാണ് ഈ ട്രാക്ക് ഒരുക്കിയത്. ഇവരെ മെൻഷൻ ചെയ്തുകൊണ്ട് നിരവധി പേരാണ് കോപ്പിയടിയെക്കുറിച്ച് പോസ്റ്റുകൾ ഇടുന്നത്. 

തുടര്‍ന്ന് ഓട്നിക്ക തന്നെ ഇന്‍സ്റ്റ​ഗ്രാമിലൂടെ ഈ വിഷയത്തില്‍‌ പ്രതികരണം അറിയിച്ചിട്ടുണ്ട്. ലിയോയെക്കുറിച്ചുള്ള മെസേജുകള്‍ക്ക് നന്ദി. ഞാന്‍ എല്ലാം കാണുന്നുണ്ട്. പക്ഷേ എല്ലാവര്‍ക്കും മറുപടി തരിക സാധ്യമല്ല. ഇമെയിലും ഇന്‍സ്റ്റ​ഗ്രാമും ഇത് സംബന്ധിച്ച മെസേജുകള്‍ കൊണ്ട് നിറഞ്ഞിരിക്കുകയാണ്. അതുപോലെ യുട്യൂബില്‍ വേര്‍ ആര്‍ യു എന്ന ട്രാക്കിന്‍റെ കമന്‍റ് ബോക്സും. കാര്യങ്ങള്‍ അവ്യക്തമാണ് ഇപ്പോള്‍. ഞങ്ങള്‍ ഇത് പരിശോധിക്കുന്നുണ്ട്. കുറച്ചുകഴിഞ്ഞ് കാര്യങ്ങളെക്കുറിച്ച് നിങ്ങളെ അറിയിക്കാം എന്ന് കരുതുന്നു.- എന്നാണ് ഓട്നിക്ക ഇന്‍സ്റ്റ​ഗ്രാമിൽ കുറിച്ചത്. 

അനിരുദ്ധ് ഒരുക്കിയ ബീസ്റ്റിലെ സം​ഗീതത്തെക്കുറിച്ചും ആരോപണം ഉയർന്നിരുന്നു എന്നാണ് പുറത്തുവരുന്ന റിപ്പോർട്ടുകൾ. എന്നാൽ കോപ്പിയടി ആരോപണത്തിൽ അനിരുദ്ധിന്‍റെ ഭാ​ഗത്തുനിന്ന് വിശദീകരണമൊന്നും പുറത്തുവന്നിട്ടില്ല. 
 

ഈ വാര്‍ത്ത കൂടി വായിക്കൂ 

ലുക്കിലും നടത്തത്തിലും തനി തലൈവർ! സോഷ്യൽമീഡിയയിൽ തരം​ഗമായി കൊച്ചിക്കാരുടെ രജനീകാന്ത്; വിഡിയോ

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ